Ol Yangfala Oli Askem . . .

?Olsem Wanem Blong Blokem Ol Fren We Oli No Gat Gudfala Fasin?

“Mi stat kampani wetem wan gel long skul. . . . Hem i no tekem drag, hem i no joen long ol krangke lafet, mo hem i no slip olbaot. Hem i no tokswea, mo hem i kasem beswan mak oltaem long klas. Be gel ya i rili wan rabis fren.”​—⁠Beverly.a

?FROM wanem Beverly i gat tingting olsem? Naoia, Beverly i luksave se gel ya i bin pulum hem blong folem sam nogud fasin. Beverly i talem se: “Taem mi mi fren wetem hem, mi stat blong ridim ol buk we oli tokbaot wok blong ol rabis spirit, mo mi raetem wan stori long saed ya tu.”

Long saed blong yangfala Melanie, wan rabis fren i lidim hem tu blong mekem sam nogud fasin. !Be fren ya i wan narafala Kristin! ?Olsem wanem blong save sipos wan boe no gel i save kam wan gudfala fren? ?I rong oltaem blong kampani wetem man we i no trufala Kristin? ?Olgeta Kristin evriwan oli gudfala fren?

?Antap moa, olsem wanem long fasin fren blong boe wetem gel? ?Sipos yu yu wantem fren wetem wan boe no gel blong mared wetem hem, olsem wanem blong save sipos bambae hem i wan gudfala fren? Bambae yumi luk sam rul blong Baebol we oli save givhan long yumi blong ansa long ol kwestin ya.

?Gudfala Fren i Olsem Wanem?

Fren blong Beverly long skul hem i no mekem wosip long trufala God. ?Olsem wanem? ?Samting ya i mas blokem Beverly blong i no fren wetem hem? I tru se, ol trufala Kristin oli no luk evri man afsaed long skul blong olgeta, olsem we oli rabis man no man blong mekem nogud fasin, nogat. Be sipos yumi gat tingting blong fren wetem olgeta, yumi mas lukaotgud. Long faswan handred yia, aposol Pol i givim woning long kongregesen blong Korin se: “Ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15⁠:33) ?Tok ya i minim wanem?

Ating sam Kristin long Korin oli fren wetem samfala we oli folem waes man ya blong Gris, nem blong hem Epicurus. Epicurus i tijim ol man long sam gudfala fasin, olsem, blong oli tingting gud, oli no fraet, oli bos long tingting blong olgeta, mo blong oli mekem i stret long narafala man. Hem i tijim ol man se oli no mas mekem nogud long fasin haed. ?Taswe, from wanem Pol i ting se ol man we oli folem Epicurus, mo samfala insaed long kongregesen tu, oli ‘ol fren we oli save spolem fasin blong ol Kristin’?

Ol man we oli folem tingting blong Epicurus, oli no mekem wosip long trufala God. Oli no bilif long laef bakegen long ded, ale oli mekem evri samting blong haremgud long laef naoia nomo. (Ol Wok 17⁠:​18, 19, 32) Taswe, yumi no sapraes se samfala long kongregesen blong Korin we oli stap kampani wetem ol man ya, oli no moa bilif long laef bakegen. Hemia nao from wanem japta we i karem woning ya blong Pol, hemia 1 Korin japta 15, i talem plante toktok blong pulum ol faswan Kristin ya blong mekem bilif blong olgeta i strong long laef bakegen.

?Oraet, stori ya i tijim yumi long wanem samting? Yumi lanem se ol man we oli no bilif long God, olgeta tu oli save mekem gudfala fasin. Be sipos yu jusum olgeta olsem ol gudfala fren blong yu, oli save jenisim tingting, bilif, mo fasin blong yu. Taswe, long seken leta we Pol i raetem long ol Kristin long Korin, hem i talem se: “Bambae yufala i no go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples.”​—⁠2 Korin 6⁠:​14-18.

Wan boe we i gat 16 yia, nem blong hem Fred, i faenemaot se tok blong Pol i waes. Hem i agri blong joen long wan skul projek long taem blong spel, we hem i mas wokbaot i go long ol pua kantri blong tijim ol pikinini longwe. Be taem hem wetem ol narafala studen oli stap mekemrere blong go, hem i jenisim tingting blong hem. Hem i se: “Mi mi luksave se sipos mi stap oltaem long kampani blong ol narafala studen ya, bambae oli save spolem mi long saed blong spirit.” Ale Fred i no moa joen long projek ya, be hem i givhan long ol puaman long sam narafala rod.

Fren Wetem Ol Narafala Kristin

?Be olsem wanem long ol fren insaed long Kristin kongregesen? Taem Pol i raetem leta long yangfala Timoti, hem i givim woning ya se: “Long haos blong rijman, i gat plante kaen plet mo besin. Sam, oli wokem long gol, no silva, mo sam, oli katem long wud, no oli wokem long graon blong graonpot. Sam, oli blong yusum long lafet, mo sam, oli blong yusum evri dei nomo. Sipos man i mekem laef blong hem i klin, i livim ol fasin nogud ya we mi stap talem, hem i save kam olsem plet we i blong yusum long lafet. Long fasin ya, man olsem bambae i tabu, i blong God, i stret gud blong Masta blong hem i yusum hem, mo i rere blong mekem wanem gudfala wok we i stap.” (2 Timoti 2⁠:​20, 21) Taswe Pol i no haedem poen ya se sam Kristin tu oli save mekem fasin we i no stret. Mo hem i no fraet blong talem stret long Timoti se hem i mas stap longwe long olgeta.

?Olsem wanem? ?Hemia i min se yu no save trastem ol Kristin brata sista blong yu? Nogat. Mo tu, yu no mas ting se ol fren blong yu oli mas stretgud olgeta. (Prija 7⁠:​16-18) Be sipos wan yangfala i stap kam long ol Kristin miting mo papa mama blong hem tufala i wok strong insaed long kongregesen, hemia nomo i no mekem se yangfala ya i wan gudfala fren.

Ol Proveb 20⁠:11 i talem se: “Nating we smol pikinini nomo, be ol samting we hem i mekem i stap soemaot fasin blong hem. Sipos hem i no save giaman, mo fasin blong hem i stret, bambae yu save wantaem nomo.” Taswe, i waes blong tingbaot ol kwestin ya: ?Yangfala ya i soemaot klia se bigfala samting long laef blong hem, hemia blong frengud wetem Jeova? ?No hem i gat sam tingting mo fasin we oli soemaot ‘spirit blong wol ya’? (1 Korin 2⁠:12; Efesas 2⁠:⁠2) ?Kampani blong hem i pusum yu blong wantem mekem moa long wosip blong Jeova?

Sipos yu yu jusum ol fren we oli rili lavem Jeova mo ol samting long saed blong spirit, bambae yu blokem plante trabol, mo tu, bambae yu strong moa long wok blong God. Pol i talem long Timoti se: “Yu yu mas joen long ol man we tingting blong olgeta i klin gud, we oli stap ona long Masta blong yumi. Oltaem yu mas traehad blong mekem ol stret fasin, mo blong folem fasin blong bilif, mo blong lavem ol man, mo blong stap gud wetem ol narafala man.”​—⁠2 Timoti 2⁠:⁠22.

Fasin Fren Blong Boe Wetem Gel

Ating yu yu gat naf yia blong mared, mo maet yu wantem mared. ?Be yu yu tingbaot finis olsem wanem ol rul ya oli save givhan long yu blong jusum wan gudfala fren blong mared? I gat plante samting we oli save pulum yu blong laekem wan boe no gel. Be samting we i impoten moa, se hem i mas laekem tumas ol samting long saed blong spirit.

From samting ya, plante taem Baebol i givim woning se yumi mas mared long man nomo we i “man blong Masta blong yumi.” (1 Korin 7⁠:39; Dutronome 7⁠:​3, 4; Nehemaea 13⁠:25) I tru, maet yu save trastem samfala we oli no mekem trufala wosip, maet oli gat klin fasin blong laef, mo maet oli kaen. Be olgeta ya oli no gat sem tingting olsem yu, we i pusum yu blong traem kamgud moa long ol fasin ya, mo blong holemtaet promes blong mared long ol yia we oli kam.

Mo tu, wan boe no gel we i givim laef blong hem i go long Jeova mo i stap tru long God, hem i traehad blong wokem ol gudfala Kristin fasin mo holemtaet olgeta tru long ol gudtaem mo ol hadtaem tu. Hem i save ol tok blong Baebol we i soem se lav we man mo woman tufala i gat long tufala, i save stap strong nomo sipos tufala i frengud wetem Jeova. (Efesas 5⁠:​28, 33; 1 Pita 3⁠:⁠7) Taswe lav ya we tufala evriwan i gat long Jeova, hem i gat moa paoa i bitim ol narafala samting blong pulum tufala blong stap tru long tufala.

?Olsem wanem? ?Hemia i min se mared blong wan Kristin i no save kam nogud samtaem? Si, i save kam nogud. Tingbaot sipos yu yu mared wetem wan man we i laekem ol samting long saed blong spirit, smol nomo. ?Wanem i save hapen? Man we i no strong long saed blong spirit, hem i no naf blong winim ol traem blong wol, taswe i isi long hem blong lego Kristin kongregesen. (Filipae 3⁠:18; 1 Jon 2⁠:19) Tingbaot ol trabol we yu save kasem long mared blong yu mo olsem wanem bambae yu harem nogud, sipos yu yu mared long wan man we i stat folem ‘ol doti fasin blong wol.’​—⁠2 Pita 2⁠:⁠20.

Bifo we yu fren wetem wan boe no gel we maet bambae yu mared long hem, i gud blong tingbaot se: ?Hem i soemaot se hem i bigman long saed blong spirit? ?Hem i mekem ol Kristin fasin long laef blong hem? ?Hem i stanap strong long trutok blong Baebol, no hem i nidim moa taem blong gru long saed blong spirit? ?I klia se hem i lavem Jeova mo se lav ya nao i bigfala samting we i pusum hem? I gud sipos hem i gat gudnem wetem ol narafala. Be antap long samting ya, yu mas sua se fren blong yu i rili lavem Jeova mo se bambae hem i wan gudfala hasban no waef.

Yu mas rimemba tu, se samfala oli laekem olgeta we oli no gat gudfala fasin, from we oli laekem sam samting we oli nogud, olsem sam pleplei no sam narafala wok we i no stret. Ol yangfala long Kristin kongregesen we oli gat gudfala fasin, oli no save joen wetem yu long ol samting ya. Taswe yu mas skelemgud hat mo tingting blong yu.

Sipos yu faenem se yu nidim blong stretem tingting blong yu, yu no mas harem se i no gat rod. Yu save stretem tingting mo hat blong yu. (Ol Proveb 23⁠:12) Bigfala samting we yu mas tingbaot se: ?Yu yu rili wantem wanem long hat blong yu? ?Yu yu wantem se hat blong yu i pulum yu blong mekem samting we i gud mo blong fren wetem olgeta we oli mekem gudfala fasin? Jeova i save givhan long yu blong gat wan gudfala hat olsem. (Ol Sam 97⁠:10) Mo sipos yu trenem yu blong luksave wanem i stret mo wanem i no stret, bambae yu faenem i isi moa blong jusum ol fren we oli gat gudfala fasin mo we oli givhan long yu blong kam strong moa long bilif.​—⁠Hibrus 5⁠:⁠14.

[Futnot]

[Tok blong pija long pej 24]

Ol gudfala fren oli mekem yu yu kam strong moa long saed blong spirit