Baebol i Talem Wanem

?Olgeta Haf Blong Baebol Oli Stret Yet Long Taem Blong Yumi?

“Baebol i no gat paoa nating long laef blong ol man tede. Hem i gat sam smosmol save nomo we man i save yusum blong wokem ol ridel, no blong givim ansa long ol kwestin long ol gem we oli stap kamaot long televisen, hemia nomo.”

“Ol save long saed blong laen blong ol man, stap klin bifo mared, mo onagud long God, oli stret long laef blong ol man long taem blong Baebol. Be oli no stret nating long ol man tede.”

“Oli no wokem faswan Baebol yet, be ol save blong hem oli olfala finis, oli no moa stret long laef blong ol man.”

OLGETA tingting ya oli kamaot i no longtaem long Intenet, blong ansarem kwestin ya se: “?I tru we Baebol i wan buk blong bifo mo se i no stret long taem blong yumi tede?” ?Wanem tingting blong yu? ?Yu yu agri wetem tingting blong ol man ya?

Ating bambae yu no agri wetem olgeta ya we oli stap agensem Baebol fulwan. Be maet bambae yu wantem save sipos tede olgeta tok blong Baebol oli stret yet long yumi. Tede plante jos oli seraotem Baebol long tu haf, hemia Oltesteman mo Niutesteman. Oli givim tingting ya se bighaf blong Baebol (75 pesen) i blong ol man bifo nomo, i no stret long yumi tede.

Tede i no gat wan man we i gohed blong kilim anamol blong mekem sakrefaes, olsem we loa blong Moses i talem bifo. ?Taswe, from wanem yumi holem yet ol save long saed blong ol sakrefaes, we oli stap long buk blong Levitikas? (Levitikas 1:1–7:38) ?Mo olsem wanem long ol famle laen, we yumi faenem long ol faswan japta blong 1 Kronikel? (1 Kronikel 1:1–9:44) ?Sipos i no gat wan man tede we i save pruvum se i kamaot long ol laen ya, from wanem yumi nidim ol nem ya?

Tingbaot se yu pusum han blong yu, yu pikimap frut blong wan tri. ?Naoia we yu holem frut ya finis long han blong yu, yu ting se tri ya i no moa impoten? !Si hem i impoten yet, sipos yu wantem kasem sam moa frut! Baebol i olsem wan tri. Sam haf blong hem olsem Ol Sam mo ol bigfala toktok blong Jisas antap long hil, oli isi blong kasem save mo oli pulum tingting blong man. ?Taem yumi laekem sam haf blong Baebol, olsem we yumi laekem tumas wan frut, i stret we yumi sakemaot ol narafala haf blong hem? ?Baebol i talem wanem long saed ya?

Samwe long yia 65 K.T.,a aposol Pol i raetem seken leta blong hem long Timoti, blong mekem hem i tingbaot se: “Taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, mo i save lidim yu blong yu save stanap strong long bilif blong yu long Jisas Kraes, blong God i save sevem yu.” Pol i gohed i se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:15, 16) ?Taem Pol i raetem se ‘olgeta tok blong Baebol oli kamaot long God mo oli stret gud,’ hem i wantem tokbaot Niutesteman nomo? I klia se nogat.

Makem gud ol tok we Pol i talem long saed blong Timoti se, hem i savegud “ol tok blong Baebol” stat taem hem i “pikinini” nomo. Samfala oli ting se, Timoti i gat bitim 30 yia taem Pol i raetem leta ya long hem. Sipos tingting ya i stret, i min se Timoti i pikinini nomo long taem ya we Jisas i ded. Hemia bifo we oli raetem Niutesteman, no Grik haf blong Baebol. Mama blong Timoti i woman Jiu, taswe hem i mas tijim Timoti long Oltesteman, no Hibru haf blong Baebol, taem we Timoti i smol. (Ol Wok 16:1) Taem Pol i tokbaot “olgeta tok blong Baebol,” i klia se hem i minim olgeta haf blong Oltesteman tu, we i tokbaot ol stret rul blong mekem sakrefaes mo ol laen blong man.

Naoia 1,900 yia i pas finis, be ol haf ya blong Baebol oli givhan long yumi yet, long plante defren rod. Sipos God i no meksua se neson blong Isrel we hem i jusumaot i raetem Baebol, mo se i holem i stapgud kasem tede, bambae yumi no save gat Baebol. (Rom 3:1, 2) Long Isrel bifo, loa blong Moses i no wan tabu samting nomo we oli holem i stap blong olgeta we bambae oli kam biaen. Be hem i olsem mama loa blong neson ya. Ol smosmol samting insaed long loa ya, maet yumi tede yumi luk se oli no impoten nating. Be long Isrel bifo, ol samting ya oli impoten tumas from we oli givhan long olgeta blong oli stap sef, mo blong mekem evri samting i rongud long neson ya. Olgeta laen blong man we oli raetem long Baebol oli impoten, from we oli makemaot Mesaea, we ol profet oli bin talem bifo, se bambae i kamaot stret long laen blong King Deved —2 Samuel 7:12, 13; Luk 1:32; 3:23-31.

Tede ol Kristin oli no moa stap aninit long Loa blong Moses, oli mas bilif nomo long Mesaea, Jisas Kraes. Ol laen blong ol man ya bifo we oli holem nem blong olgeta i stap gud long Baebol, oli pruvum se Jisas nao i “pikinini blong Deved” we ol profet oli bin tokbaot. Ol smosmol save we yumi gat long ol sakrefaes bifo, oli mekem se yumi tinghae moa long sakrefaes blong Jisas. Mo oli mekem se yumi bilif moa long ol samting we sakrefaes ya i mekem long ol man.—Hibrus 9:11, 12.

Long faswan handred yia, Pol i raet long Kristin kongregesen blong Rom se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Vas ya i mekem yumi tingbaot se, oli raetem Baebol blong mekem i gud long yumi, be i no long yumi nomo. Bitim 3,500 yia finis, ol tok blong God oli lidim, tijim, mo stretem ol man blong hem—long drae ples ya Sinae, long Promes Lan, taem oli stap kalabus long Babilon, long Rom, mo naoia long ful wol. I no gat wan narafala buk we i stret gud olsem Baebol. Yumi no save luk rus blong wan tri, yumi mas digim graon smol blong faenem rus ya. Long sem fasin, Baebol tu i gat sam impoten save insaed long hem, we fastaem i had blong faenem. Be sipos yumi stadi long hem, bambae yumi faenem ol gudfala save ya, mo bambae yumi kasem bigfala blesing from traehad ya we yumi mekem.

[Futnot]

?YU YU BIN TINGBAOT?

● ?Wetaem Timoti i stat blong lanem ol tok blong Baebol?—2 Timoti 3:15.

● ?Wanem haf blong Baebol i kamaot long God mo i stret gud?—2 Timoti 3:16.

● ?Olsem wanem, “olgeta tok ya we oli raetem long Baebol bifo” oli save mekem i gud long yumi?—Rom 15:4.

[Tok blong pija long pej 17]

Ol smosmol save we yumi gat long ol sakrefaes bifo, oli mekem se yumi tinghae moa long sakrefaes blong Jisas