Baebol i Talem Wanem

?From Wanem Mared i Wan Samting We Yu Mas Tinghae Long Hem?

ATING bighaf blong ol man tede oli stap talem se oli tinghae long mared blong olgeta. ?Sipos tok blong olgeta i tru, from wanem plante man mo woman oli stap divos? Long tingting blong samfala, mared i wan promes we i stanap long filing blong lav nomo, no wan promes we i stap long pepa blong mared we oli saenem. Oli ting se i no wan bigfala samting sipos oli brekem promes ya. Ol man we oli tingting olsemia oli save finisim mared blong olgeta taem i gat wan smol trabol nomo i kamaot.

?Wanem tingting blong God long saed blong mared? Ansa i stap long Tok blong Hem, Baebol, long Hibrus 13⁠:4: “Mared i wan fasin we yufala evriwan i mas tinghae long hem.” Grik tok we oli tanem i kam “tinghae” long Bislama, i minim wan samting we i sas mo i impoten long tingting blong yumi. Taem yumi tinghae long wan samting, yumi lukaotgud long hem, yumi meksua se yumi no lusum samting ya, mo yumi no mekem wan krangke samting we yumi no minim blong mekem nao yumi lusum sas samting ya. Sem mak long saed blong mared. Ol Kristin oli tinghae long mared. Hem i olsem wan sas samting we oli mas lukaotgud long hem.

I klia se, taem Jeova God i stanemap fasin blong mared, hem i ting se plan ya i wan tabu samting. ?Olsem wanem yumi save soem se yumi tu yumi gat tingting ya?

Lav Mo Ona

Blong tinghae long mared, man mo woman tufala i mas ona long tufala. (Rom 12⁠:10) Aposol Pol i raetem leta i go long ol Kristin long faswan handred yia i se: “Mo bakegen, i blong yufala wanwan. Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.”​—⁠Efesas 5⁠:33.

Sam samtaem, maet man mo woman i no soem lav mo ona. Be ol trufala Kristin oli mas soem lav mo ona. Pol i raetem se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we [Jeova] i fogivim yumi.”​—⁠Kolosi 3⁠:13.

Spenem Taem Tugeta

Man mo woman we tufala i tinghae long mared blong tufala, tufala wanwan i tektaem blong lukaotgud long narawan, long saed blong bodi mo long saed blong filing. Hemia i min se wanwan long tufala i givim samting we narawan i nidim long saed blong seks tu. Baebol i talem se: “Oltaem man i mas stap wetem woman blong hem, mo woman tu i mas stap wetem man blong hem, blong tufala i save harem gud long tufala.”​—⁠1 Korin 7⁠:​3, 4.

Sam famle oli bin tekem disisen se hasban bambae i gowe blong smoltaem, blong hem i save wok blong winim moa mane. Maet oli ting se bambae hem i gowe blong smoltaem, be samfala oli bin stap longwe long woman blong olgeta blong longtaem. Nao samting ya i mekem trabol i kamaot long mared blong tufala, ale tufala i foldaon long rabis fasin blong seks wetem narafala man no woman, nao biaen tufala i divos. (1 Korin 7⁠:​2, 5) Taswe, sam Kristin man mo woman oli tekem disisen blong lego ol sas samting we oli save pem, blong oli save holemtaet gudfala mared blong olgeta we oli tinghae long hem.

Taem Trabol i Kamaot

Taem trabol i kamaot, ol Kristin we oli tinghae long mared blong olgeta, oli no hareap blong seraot mo divos, nogat. (Malakae 2⁠:16; 1 Korin 7⁠:​10, 11) Jisas i talem se: “Man we i mekem divos long woman blong hem, we woman ya i no mekem trabol wetem narafala man, hem i mekem i no stret. Sipos woman ya i mared bakegen, hem i mekem sin, be i fol blong man blong hem fastaem. Mo man we i mared long woman olsem, hem tu i mekem sin.” (Matiu 5⁠:32) Sipos man mo woman i seraot no i divos from wan narafala samting we i no laenap wetem ol tok blong Baebol, ale tufala i no stap tinghae long mared.

Yumi soemaot tingting blong yumi long saed blong mared taem yumi givim advaes long ol narafala we oli gat bigfala trabol insaed long mared blong olgeta. ?Olsem wanem? ?Yumi hareap blong talem long olgeta se oli mas seraot mo divos? Maet samfala oli tekem disisen blong seraot from wan risen we i stret wetem Baebol, olsem taem man i stap kilim nogud woman blong hem, mo taem man i no wantem wok blong givim ol samting we famle blong hem i nidim.a Mo tu, olsem yumi luk antap, Baebol i talem se man i gat raet blong mekem divos long woman blong hem nomo taem woman i mekem nogud wetem narafala man. Be ol narafala Kristin oli no mas traem fosem ol man mo woman we oli gat trabol olsem, blong oli seraot mo divos. Man we i givim advaes olsem, i no hem we bambae i karem frut blong disisen ya, be man we i gat trabol long mared blong hem, hem nao i mas karem frut ya.​—⁠Galesia 6⁠:​5, 7.

Blokem Fasin Blong No Kea Long Mared Blong Yu

Samfala oli mared long wan man blong narafala kantri from we oli wantem kam residen blong kantri we man ya i stap long hem. Plante we oli mekem olsem, oli pem man ya we i sitisen blong kantri ya blong i mared long olgeta. Plante man mo woman we oli mared long fasin ya, oli no stap tugeta nating. Oli stap wanwan, mo maet oli no frengud tu. Smoltaem afta we oli kam residen blong kantri we oli wantem go long hem, oli mekem divos long man we i mared wetem olgeta. Oli tingbaot mared blong olgeta olsem wan bisnes plan nomo, we oli pem narafala blong mekem samting blong olgeta.

Baebol i no agri long fasin ya. Nomata long tingting blong ol man mo woman we oli mared, be long tingting blong God, oli mekem wan tabu promes blong stap tugeta gogo oli ded. God i luk ol man mo woman ya olsem we oli mared. Olgeta oli stap aninit long loa blong Baebol se oli save divos mo mared bakegen nomo sipos narawan i mekem rabis fasin blong seks afsaed long mared.​—⁠Matiu 19⁠:​5, 6, 9.

Blong gat wan gudfala mared, yumi mas rere blong wokhad mo no kam slak long wok ya. Hemia i sem mak long olgeta haf blong laef we yumi tinghae long olgeta. Ol man mo woman we oli no tinghae long mared, oli lego long mared blong olgeta kwiktaem nomo. Sipos no, oli tekem tingting ya se oli mas gohed nomo insaed long wan mared we i no hapi. Be, olgeta we oli tinghae long mared oli save se God i wantem we oli stapgud tugeta blong olwe. (Jenesis 2⁠:24) Mo tu, oli luksave se sipos oli wokgud tugeta insaed long mared ya, oli givim ona long God we i stanemap fasin blong mared fastaem. (1 Korin 10⁠:31) Tingting ya i save pusum olgeta blong traehad blong mekem wan gudfala mared mo no lego kwik.

[Futnot]