En Blong Wol ?Yu Fraet, Yu Wantem Luk, Yu Les Blong Harem?

?Yu yu harem ol man oli bin talem se long namba 21 Disemba 2012, wan bigfala samting bambae i hapen long wol? Oli talem samting ya from we oli bilif long kalenda blong ol man Maya blong Sentrol Amerika. Be samting we oli talem, i no bin hapen. ?Samting ya i mekem yu yu harem olsem wanem? Maet yu glad se samting ya i no hapen, maet yu harem nogud, no maet yu no wantem save long olkaen stori ya. ?Olsem wanem? ?Hemia wan narafala giaman profet tok nomo?

Baebol tu i talem se bambae “wol ya i finis.” ?Tok ya i minim wanem? (Matiu 24:3) Sam man oli fraet se wol ya bambae i lus long faea. Sam narafala man oli wantem tumas blong save se wanem bambae i hapen long wol ya. Mo plante man oli les finis blong harem toktok ya se wol bambae i lus, from we oli harem gogo, be i neva hapen. ?From wanem oli gat tingting olsem? Maet hemia from we oli lesin long ol stori we oli no tru.

Taem yu save samting we Baebol i talem long saed blong en blong wol, ating bambae yu sapraes. Baebol i talem ol gudfala risen from wanem yumi mas glad se en i kam. Mo Baebol i talem tu se sam man bambae oli les blong wet, from we oli ting se en i longwe yet. Mifala i glad sipos yu ridim ol kwestin we i stap, mo yu faenemaot wanem we Baebol i talem.

?Wol ya bambae i bon long faea?

ANSA BLONG BAEBOL: ‘God i putum wol ya i stap strong long fandesen blong hem, we bambae hem i no save muf nating.’​—OL SAM 104:5.

Wol ya bambae i no save lus samtaem. I no gat faea no wan narafala samting we bambae i kam spolem wol ya. Baebol i talem se God i mekem wol ya blong ol man oli save stap long hem olwe. Ol Sam 37:29 i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 115:16; Aesea 45:18.

Afta we God i mekem wol ya, hem i talem se olgeta wok blong hem “oli gud we i gud tumas.” Tede, God i gat sem tingting ya yet. (Jenesis 1:31) God i no gat plan se bambae hem i spolem wol ya. Defren olgeta, hem i mekem promes se bambae hem i “spolem ol man ya we oli stap spolem wol,” mo bambae hem i no save letem wol ya i lus.​—Revelesen 11:18.

Be maet yu tingbaot 2 Pita 3:7 (Good News Bible [GNB]) we i talem se: “Heven mo wol we i stap naoia, . . . tufala i stap wet blong bambae faea i kasem tufala.” ?Olsem wanem? ?Yu ting se vas ya nao i soemaot se wol bambae i lus long faea? Blong talem stret, samtaem Baebol i yusum tok ya “heven,” “wol,” mo “faea” blong minim narafala samting. Yu traem tingbaot Ol Sam 97:1 we i talem se: “!Hae God, hem i King! !Wol, i gud yu yu glad long hem!” Vas ya i yusum tok ya “wol” blong minim ol man.

Ol narafala vas long 2 Pita japta 3 oli soemaot se tok ya heven, wol, mo faea, oli olsem pijatok nomo blong minim narafala samting. Seken Pita 3:5, 6 i talem se wol we i stap long taem blong Noa, i lus taem bigfala wota i ron i kavremap ples. Be long taem ya, prapa graon i no lus. Taswe “wol” we i lus long taem ya, hemia ol man we oli mekem rabis fasin. Mo “heven” we i lus, hemia ol lida we oli rulum ol man. (Jenesis 6:11) Olsem nao yumi save se “heven mo wol” we 2 Pita 3:7 i stap tokbaot, i minim ol rabis man mo ol gavman we oli mekem i no stret. Olgeta nao we bambae oli lus. Mo vas ya i yusum pijatok blong faea blong soemaot se bambae oli lus blong olwe, from we taem faea i kakae wan samting, samting ya i lus olgeta.

?Taem en blong wol i kam, wanem bambae i hapen?

ANSA BLONG BAEBOL: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”​—1 JON 2:17.

“Wol” ya we bambae i lus, i no minim prapa graon, be i minim olgeta man we oli no mekem ol samting we God i wantem. Taem wan man i mekem garen, hem i mas rutumaot ol smosmol tri mo rabis gras. Olsem nao, ol kakae long garen blong hem bambae oli grugud. Long sem fasin, God tu bambae i “rutumaot” ol rabis man long wol ya, blong mekem se ol gudfala man oli save gat wan gudfala laef long wol. (Ol Proveb 2:22) Taswe “en blong wol” hem i wan gudfala samting, from we bambae i mekem se i no moa gat rabis fasin long wol.

Sam man we oli tanem tok ya “en blong wol” long Baebol, oli kasem save mining blong tok ya, taswe oli talem se “en blong fasin blong laef blong wol ya.” (Matiu 24:3, GNB) Sipos ol rabis man nomo oli lus, ?olsem wanem long ol gudfala man mo graon ya? Ol gudfala man bambae oli stap nomo long graon ya mo bambae oli harem gud long wan niufala fasin blong laef. Hemia nao “niufala wol ya” we Baebol i talem se “bambae i kam.”​—Luk 18:30.

Jisas i talem se long niufala wol ya olgeta samting bambae oli kam “niu” bakegen. Bambae hem i mekem wol ya i kam wan gudfala ples bakegen, olsem we God i wantem fastaem. (Matiu 19:28, GNB) Long niufala wol ya bambae yumi harem gud long plante samting.

• Wol bambae i kam paradaes mo bambae ol man oli harem se oli stap sef mo oli gat plante samting.​​—Aesea 35:1; Maeka 4:4.

• Ol man bambae oli no hadwok blong nating, bambae oli glad long wok we oli mekem.​—Aesea 65:21-23.

• Bambae sik i finis.​—Aesea 33:24.

• Ol olfala bambae oli kam yang.​—Job 33:25.

• Ol dedman bambae oli laef bakegen.​—Jon 5:28, 29.

Sipos yumi mekem “ol samting we God i wantem,” yumi no save fraet long en blong wol. Defren olgeta, yumi wantem tumas we en ya i kam.

?I tru se en blong wol i klosap?

ANSA BLONG BAEBOL: “Taem yufala i luk we ol samting ya oli kamaot, bambae yufala i save se niufala wol ya we God i king long hem, bambae i no longtaem hem i kamtru.”​—LUK 21:31.

Wan man we nem blong hem Richard Kyle i raetem buk ya The Last Days Are Here Again. Long buk ya, hem i talem se: “Plante taem, ol man oli stat blong talemaot se en blong wol bambae i kam from we oli luk se kwiktaem nomo ol samting long ples blong olgeta i jenis, mo i gat plante trabol i kamaot.” Tru ya, taem ol man oli luk se ol trabol long wol oli kam antap, mo oli no save from wanem i gat ol trabol olsem, samting ya i pusum olgeta blong talem se en blong wol i stap kam.

Be taem ol man we oli raetem Baebol oli tokbaot en blong wol, i no from we oli stap luk plante trabol long taem blong olgeta. Nogat. God nao i putum long tingting blong olgeta blong oli talemaot ol samting ya. ?Ol man ya oli talemaot wanem? I gud yu ridim tok we oli raetem long Baebol. Ale yu traem tingbaot se: ?Ol samting ya oli stap kamtru tede?

• I gat faet, kakae i sot, graon i seksek bigwan, mo ol strong sik.​—Matiu 24:7; Luk 21:11.

• Ol fasin nogud bambae oli kam bigwan moa.​—Matiu 24:12.

• Ol man oli spolem wol.​—Revelesen 11:18.

• Ol man oli tingbaot olgeta nomo, oli wantem mane tumas, mo oli no save tingbaot God.​—2 Timoti 3:2, 4.

• Ol famle oli no moa joen gud.​—2 Timoti 3:2, 3.

• Plante man oli no wantem save se en i stap kam.​—Matiu 24:37-39.

• Wok blong talemaot gud nius blong Kingdom bambae i go kasem olgeta ples long wol.​—Matiu 24:14.

Jisas i talem se taem yumi luk olgeta samting ya, yumi save se en blong wol i klosap. (Matiu 24:33) Ol Witnes blong Jehova oli bilif se en i klosap, taswe oli talemaot bilif blong olgeta long ol man. Oli stap mekem samting ya long 236 kantri.

Ol man oli talem plante taem se en bambae i kam be i no kam yet, ?samting ya i min se bambae en i neva kam?

ANSA BLONG BAEBOL: “Taem ol man oli stap talem se, ‘Olgeta samting i kwaet, i gud nomo,’ long taem ya nao bambae bigfala trabol i save kasem olgeta, i spolem olgeta. Bambae trabol ya i kasem olgeta wantaem nomo, olsem we woman i harem we bak blong hem i soa blong i bonem pikinini. Mo olgeta bambae oli no save ronwe.”​—1 TESALONAEKA 5:3.

Baebol i talem se taem en i stap kam klosap, i sem mak olsem taem woman i harem we bak blong hem i soa blong i bonem pikinini. Mama i no save stopem samting ya, mo soa we hem i kasem long bak blong hem, i kam wantaem we hem i sek long hem. Moa we taem blong hem blong bonem pikinini i kam klosap, moa we hem i harem bak blong hem i soa. Maet dokta i talemaot stret dei we pikinini ya bambae i bon long hem. Nating se pikinini ya i no bon stret long taem ya we dokta i talem, be mama i save yet se pikinini blong hem bambae i mas bon i no longtaem. Long sem fasin, maet ol man oli talem wan stret dei we en bambae i kam, be toktok blong olgeta i no kamtru. Nating se i olsem, yumi sua se yumi stap finis long ol las dei.​—2 Timoti 3:1.

Maet yu gat tingting ya se: ‘?Sipos saen i klia finis se yumi stap klosap long en, from wanem plante man oli no luksave samting ya?’ Baebol i talem se taem en i kam klosap, plante man bambae oli ting nating long ol trabol we oli stap kamaot. Plante long olgeta bambae oli jikim ol man we oli bilif, oli se: “Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.” (2 Pita 3:3, 4) Tru ya, saen blong ol las dei i klia nomo, be plante man oli no wantem luksave.​—Matiu 24:38, 39.

Ol samting we yu ridim finis oli kamaot long Baebol, mo oli soemaot klia se en i klosap.a ?Olsem wanem? ?Yu yu wantem save moa? Sipos yes, ale i gud yu storian wetem ol Witnes blong Jehova long ples blong yu. Olgeta ya bambae oli glad blong givhan long yu blong stadi Baebol fri nomo. Yu save mekem stadi ya long telefon, long haos blong yu, no long eni narafala ples we yu wantem. Wan samting nomo se, yu mas faenem taem blong stadi. Ol blesing we oli kamaot from stadi olsem, oli bigwan tumas.