“Antap Long Ol Narafala Samting, Yufala i Mas Lavlavem Yufala”
“Yumi kam klosap finis long taem we ol samting blong wol ya bambae i lus. . . . Antap long ol narafala samting, yufala i mas lavlavem yufala [“wetem wan lav we i strong gud,” NW].”—1 PITA 4:7, 8.
JISAS i save se hem i mas yusumgud ol laswan aoa we hem i gat wetem ol aposol blong hem. Hem i save ol samting we i stap fored long olgeta. Oli mas mekem wan bigfala wok, be ol man bambae oli no laekem olgeta nating, bambae oli agensem olgeta olsem we oli agensem hem. (Jon 15:18-20) Long laswan naet ya we hem i stap wetem olgeta, hem i talem bakegen mo bakegen long olgeta se oli mas ‘lavlavem olgeta.’—Jon 13:34, 35; 15:12, 13, 17.
2 Aposol Pita we i stap wetem Jisas long naet ya, hem i kasem gud mining blong tok blong hem. Plante yia biaen, jes bifo we Jerusalem i lus, Pita i raetem leta blong hem, mo long leta ya, hem i tokbaot olsem wanem lav i impoten. Hem i talem long ol Kristin se: “Yumi kam klosap finis long taem we ol samting blong wol ya bambae i lus. . . . Antap long ol narafala samting, yufala i mas lavlavem yufala [“wetem wan lav we i strong gud,” NW].” (1 Pita 4:7, 8) Ol tok ya blong Pita oli gat bigfala mining long olgeta we oli stap laef long “ol las dei” blong rabis fasin blong wol ya. (2 Timoti 3:1, NW) ?Lav ya we i strong gud i olsem wanem? ?From wanem i impoten we yumi lavem narafala olsem? ?Olsem wanem yumi save soemaot lav ya?
Lav We i Strong Gud—?Hem i Olsem Wanem?
3 Plante man oli tingbaot lav olsem wan filing we i kamaot olsem nomo. Be Pita i no stap tokbaot enikaen lav nomo. Hem i stap tokbaot wan kaen lav we i hae we i hae. Long 1 Pita 4:8, Grik tok we oli yusum blong tokbaot lav ya, hemia a·gaʹpe. Tok ya i minim lav we man i soemaot taem i tingbaot narafala fastaem, mo taem ol stret rul mo stret fasin oli lidim hem no oli bos long hem. Wan buk i tokbaot lav ya se: “Agape lav, hem i kaen lav ya we yumi save bos long hem, from we lav ya i no kamaot long filing blong yumi nomo. Yumi mekemap tingting blong yumi blong soem lav ya, nao desisen ya i lidim yumi blong mekem wan samting blong soemaot.” From we yumi evriwan i bon wetem fasin ya blong tingbaot yumi wan fastaem, yumi nidim advaes oltaem blong pulum yumi blong lavlavem yumi, mo blong soemaot lav ya long wan rod we ol stret rul blong God oli lidim yumi long hem.—Jenesis 8:21; Rom 5:12.
4 Be hemia i no min se yumi lavlavem yumi nomo from we hem i wan samting we yumi mas mekem. Lav ya a·gaʹpe i joen wetem filing blong yumi tu. Pita i talem se yumi mas “lavlavem yumi [“wetem wan lav we i strong gud,” NW, we long lanwis Grik i minim “wan lav we yumi mekem i kam bigwan moa,” Kingdom Interlinear].”a Blong soem lav ya, i nidim bigfala traehad. Wan man blong stadi i tokbaot Grik tok ya we oli tanem i kam “lav we i strong gud” i se: “Grik tok ya i givim tingting long saed blong wan man blong resis we i taetem ol masel blong leg blong hem, blong fosem hem blong finisim resis.”
5 Taswe, blong soem lav ya, yumi no mekem ol samting long narafala we i isi nomo blong mekem, mo yumi no soem lav ya long samfala nomo. Blong soem Kristin lav ya, i olsem we yumi mas ‘mekem hat blong yumi i kam bigwan moa,’ i min se yumi soemaot lav taem we i hadwok blong mekem olsem. (2 Korin 6:11-13) I klia se kaen lav ya i wan samting we yumi mas wokhad blong kasem, olsem wan man blong resis i mas wokhad blong kamgud moa. Be i impoten tumas we yumi lavlavem yumi olsem. ?From wanem? From tri risen.
?From Wanem Yumi Mas Lavlavem Yumi?
6 Faswan risen, hemia “from we fasin ya blong lavem man, hem i kamaot long God.” (1 Jon 4:7) Jeova we i Stamba blong nambawan fasin ya, hem i lavem yumi fastaem. Aposol Jon i talem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi.” (1 Jon 4:9) God i “sanem” Pikinini blong hem Jisas i kamdaon long wol olsem wan man, hem i prij long olgeta man, mo i ded long wan pos. Hem i mekem olgeta samting ya “blong i mekem rod blong yumi, blong yumi kasem laef.” ?Nambawan fasin ya blong God blong soemaot lav long yumi, i mas pulum yumi blong mekem wanem? Jon i talem se: “From we God i lavem yumi olsem, yumi tu i mas lavlavem yumi.” (1 Jon 4:11) Makemgud tok blong Jon se “from we God i lavem yumi olsem.” Hem i no talem se God i lavem yu, be hem i lavem yumi. Taswe, i klia nomo se: Sipos God i lavem ol Kristin brata sista blong yumi, yumi tu yumi mas lavem olgeta.
7 Seken risen from wanem yumi mas lavlavem yumi moa naoia, hemia blong yumi save givhan long ol brata blong yumi we oli gat nid, from we “yumi kam klosap finis long taem we ol samting blong wol ya bambae i lus.” (1 Pita 4:7) Yumi stap laef long ‘taem ya we laef i strong tumas.’ (2 Timoti 3:1) Wol i nogud, i gat ol disasta oli stap kamkamaot, mo plante man oli agensem yumi. Ol samting ya i mekem se laef i had. From samting ya, yumi nidim blong kam klosap moa long ol Kristin brata sista blong yumi. Lav we i strong gud bambae i fasem yumi, mo bambae i pulum yumi wanwan blong “givhan long ol narafala.”—1 Korin 12:25, 26.
8 Namba tri risen from wanem yumi mas lavlavem yumi, hemia from we yumi no wantem “givim janis long Setan” blong spolem yumi. (Efesas 4:27) Setan i stap lukaot rod oltaem blong yusum sam slak fasin, mastik, no rong blong ol Kristin brata blong yumi blong mekem yumi foldaon. ?Olsem wanem? ?Sipos wan Kristin brata no sista i talem no i mekem wan samting long yumi we i no kaen, bambae yumi no moa joen long kongregesen? (Ol Proveb 12:18) !Sipos lav blong yumi i strong gud, yumi no save lego kongregesen! Lav ya bambae i givhan long yumi blong holem pis wetem ol narafala mo joengud blong mekem wok blong God olsem we “solda blong wan i joen long solda blong narawan.”—Sefanaea 3:9.
?Olsem Wanem Yu Save Soemaot Se Yu Lavem Ol Narafala?
9 Fastaem yu mas soemaot lav long famle blong yu. Jisas i talem se bambae ol man oli luksave ol trufala man blong hem from we oli lavlavem olgeta. (Jon 13:34, 35) Lav ya i mas kamaot klia long kongregesen, be i no long ples ya nomo. Insaed long famle tu, ol hasban mo waef oli mas lavlavem olgeta mo ol papa mama mo ol pikinini oli mas lavlavem olgeta. I no naf we yumi gat filing blong lav nomo long ol famle blong yumi. Yumi mas soemaot lav ya long ol toktok mo wok we i mekem i gud long olgeta.
10 ?Olsem wanem ol hasban mo waef oli save soemaot lav ya? Hasban we i rili lavem woman blong hem, hem i mekem se woman ya i save samting ya tru long ol toktok mo wok blong hem, long fored blong ol narafala mo taem tufala i stap tufala nomo. Hem i gat respek mo ona long woman blong hem, hem i lesin long ol tingting blong hem, i tingbaot samting we hem i laekem mo i no laekem, mo i tingbaot filing blong woman blong hem tu. (1 Pita 3:7) Hem i mekem i gud long woman blong hem fastaem, bifo we i mekem i gud long hem wan. Mo hem i mekem bes blong hem blong givim ol samting we woman blong hem i nidim long saed blong bodi, spirit, mo filing. (Efesas 5:25, 28) Woman we i rili lavem man blong hem, hem i gat “bigfala respek” long man blong hem, nating se samtaem man ya i save mekem samting we woman blong hem i no glad from. (Efesas 5:22, 23, NW) Woman i givhan gud long man blong hem mo i stap daon aninit long man blong hem. Woman ya i no save askem plante tumas samting long man blong hem, be bambae hem i sapotem man blong hem blong mekem ol samting long saed blong spirit i stap long fasples long laef blong tufala.—Jenesis 2:18; Matiu 6:33.
11 ?Ol papa mama, olsem wanem yufala i save soemaot lav long ol pikinini blong yufala? Yufala i mas wokhad blong givim ol samting we oli nidim long saed blong bodi. (1 Timoti 5:8) Be ol pikinini oli nidim moa i bitim we yumi givim kakae, klos, mo ples blong slip long olgeta. Sipos yumi wantem se oli gruap we oli lavem trufala God mo oli mekem wok blong hem, yumi mas trenem olgeta long saed blong spirit. (Ol Proveb 22:6) Hemia i min se yumi mas makemaot taem blong mekem famle stadi, joen olsem wan famle long wok blong prij, mo go long ol Kristin miting. (Dutronome 6:4-7) Blong mekem samting ya oltaem yumi mas rere blong lego sam samting we yumi nomo i wantem, speseli long taem ya we laef i strong tumas. Taem yu yu traehad blong tingbaot mo lukaotgud long pikinini blong yu long saed blong spirit, yu stap soemaot lav, from we hemia rod blong givhan long laef blong olgeta blong olwe.—Jon 17:3.
12 Blong soem lav, i impoten tu we ol papa mama oli mekem ol pikinini blong olgeta oli haremgud long filing blong olgeta. I isi nomo blong spolem filing blong ol pikinini, hat blong olgeta i sofsof mo oli nidim we yumi soem oltaem se yumi lavem olgeta. Talem long olgeta se yu lavem olgeta, holem olgeta mo kisim olgeta, hemia i soemaot long olgeta se oli sas mo oli gat ol fasin we i save pulum ol narafala blong lavem olgeta. Talem ol gudfala tok blong presem olgeta from gudfala wok we oli mekem. Olsem nao, bambae oli luk se yu luksave mo yu tinghae long traehad blong olgeta. Stretem olgeta long lav, from we hemia i soemaot long olgeta se yu yu wantem we oli gruap wetem ol gudfala fasin. (Efesas 6:4) Ol gudfala fasin ya blong soemaot lav, oli givhan long famle blong i hapi, i joengud, mo i reregud blong winim ol traem blong ol las dei ya.
13 Lav bambae i pulum yumi blong fogetem ol mastik blong ol narafala. Taem Pita i talem se yumi mas ‘lavlavem yumi wetem wan lav we i strong gud,’ hem i talem from wanem lav ya i impoten tumas, i se: “From we lav i save kavremap fulap sin.” (1 Pita 4:8, NW) “Kavremap” i no minim se yumi haedem ol bigfala sin, nogat. I stret nomo blong ripotem ol bigfala sin long ol brata we oli lukaot long kongregesen, blong oli save stretem. (Levitikas 5:1; Ol Proveb 29:24) Sipos yumi no ripotem ol bigfala sin we oli save spolem no trikim ol gudfala man, bambae yumi no gat lav nating, mo yumi no stap folem ol tok blong Baebol tu.—1 Korin 5:9-13.
14 Bighaf blong ol mastik mo slak fasin blong ol Kristin brata sista blong yumi oli smol nomo. Yumi evriwan i mestem samtaem long ol toktok mo aksen blong yumi, nao yumi mekem narafala i harem nogud no yumi spolem narafala. (Jemes 3:2) ?Olsem wanem? ?I stret we yumi talemaot olbaot ol slak fasin blong narafala? Sipos yumi mekem olsem, yumi stap mekem trabol mo rao insaed long kongregesen. (Efesas 4:1-3) Sipos lav i bos long yumi, bambae yumi no save “spolem nem” blong wan Kristin brata no sista blong yumi. (Ol Sam 50:20) Olsem we simen mo pen i save kavremap ol hol long wol blong haos, long sem fasin lav i save kavremap ol mastik blong ol narafala.—Ol Proveb 17:9.
15 Lav bambae i pulum yumi blong givhan long olgeta we oli gat nid. Taem ol samting i kam moa nogud long ol las dei ya, bambae i mas gat sam taem we ol Kristin brata sista blong yumi oli sik no oli sot long sam samting long saed blong bodi. (1 Jon 3:17, 18) Olsem nao, maet wan long kongregesen i kasem trabol long saed blong mane no i lusum wok blong hem. Ale, yumi save givim samting long hem, stret olsem yumi naf blong mekem. (Ol Proveb 3:27, 28; Jemes 2:14-17) Ating haos blong wan olfala wido i stap kam nogud. Ale, yumi save givhan blong mekem haos ya i gud bakegen.—Jemes 1:27.
16 Taem yumi lavlavem yumi, hemia i no min se yumi soem lav long olgeta we oli stap long ples blong yumi nomo. Sam samtaem, yumi harem wan ripot se sam man blong God long narafala kantri oli kasem trabol from hariken, graon i seksek, no faet long kantri blong olgeta. Maet oli nidim kakae, klos, mo sam narafala samting. Nating se oli blong narafala laen mo kala, yumi “laekem olgeta evriwan long kampani blong ol brata.” (1 Pita 2:17, NW) Taswe, yumi gat fasin olsem ol kongregesen long faswan handred yia. Yumi glad tumas blong sapotem ol plan blong ogenaesesen blong Jeova blong givhan long ol brata sista blong yumi we oli nidim sam samting. (Ol Wok 11:27-30; Rom 15:26) Taem yumi soem lav long ol rod olsem, yumi kam strong moa long ol fasin we oli joenemgud yumi long ol las dei ya.—Kolosi 3:14.
17 Lav i pulum yumi blong talemaot gud nius blong Kingdom blong God long ol narafala. Tingbaot eksampol blong Jisas. ?From wanem hem i prij mo i tijim ol narafala? Hem i “sore tumas long olgeta” from we oli trabol tumas long saed blong spirit. (Mak 6:34) Ol lida blong giaman skul we oli mas tijim ol man ya long trutok blong God mo leftemap tingting blong olgeta, oli no kea long olgeta nating mo oli lidim ol man ya oli gorong. Taswe bigfala lav mo sore we i stap long hat blong Jisas i pulum hem blong “talemaot gud nius” blong Kingdom blong God long olgeta, mo blong leftemap tingting blong olgeta.—Luk 4:16-21, 43.
18 Tede tu, plante man oli no gat wan man blong givhan long olgeta long saed blong spirit, ol narafala oli lidim olgeta oli gorong, mo oli no save putum tingting blong olgeta long wan gudfala fiuja. Sipos yumi olsem Jisas, bambae yumi kwik blong luksave nid blong ol man we oli no save trufala God yet, nao lav mo sore bambae i pulum yumi blong talemaot gud nius blong Kingdom blong God long olgeta. (Matiu 6:9, 10; 24:14) Naoia, i gat smol taem nomo i stap, taswe i moa impoten bitim olgeta taem bifo we yumi talemaot gud nius ya we i save sevem laef blong ol man.—1 Timoti 4:16.
“Yumi Kam Klosap Finis Long Taem We Ol Samting Blong Wol Ya Bambae i Lus”
19 Bifo we Pita i talem se yumi mas lavlavem yumi, hem i se: “Yumi kam klosap finis long taem we ol samting blong wol ya bambae i lus.” (1 Pita 4:7) I no longtaem ol rabis fasin blong wol ya bambae oli lus mo God bambae i putum wan niufala wol we stret fasin nomo i stap long hem. (2 Pita 3:13) From samting ya, naoia i no taem blong letem tingting blong yumi i kam slak. Jisas i givim woning se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap.”—Luk 21:34, 35.
20 Yes, yumi mas “lukaot gud” mo luksave impoten taem ya we yumi stap long hem. (Matiu 24:42) Yumi mas blokem ol samting we Setan i save yusum blong traem yumi mo pulum yumi. Yumi neva mas letem wol ya we i no gat lav mo sore i blokem yumi blong soemaot lav long ol narafala. Antap long olgeta samting, yumi mas kam klosap moa long trufala God, Jeova. I no longtaem, Kingdom blong Mesaea blong hem bambae i mekem nambawan plan blong hem i kamtru long wol ya.—Revelesen 21:4, 5.
[Futnot]
a Long 1 Pita 4:8, sam narafala Baebol oli talem se yumi mas lavlavem yumi “long fasin we i tru,” “wetem wan lav we i dip,” no “wetem fulhat blong yumi.”
OL KWESTIN BLONG STADI
• ?Wanem laswan advaes we Jisas i givim long ol disaepol blong hem? ?Wanem i soemaot se Pita i kasem mining blong advaes ya? (Haf 1-2)
• ?Wanem ya ‘lav ya we i strong gud’? (Haf 3-5)
• ?From wanem yumi mas lavlavem yumi? (Haf 6-8)
• ?Olsem wanem yu save soemaot lav long ol narafala? (Haf 9-18)
• ?From wanem i no taem naoia blong letem tingting blong yumi i kam slak? ?Yumi mas strong blong mekem wanem? (Haf 19-20)
[Tok blong pija long pej 29]
Sipos famle i joengud bambae i isi moa blong winim ol traem blong ol las dei ya
[Tok blong pija long pej 30]
Lav i pulum yumi blong givhan long olgeta we oli gat nid
[Tok blong pija long pej 31]
Taem yumi talemaot gud nius blong Kingdom blong God long ol narafala yumi soemaot lav