Japta Totin
Wan Bigfala Kampani i Stanap Fored Long Jea Blong Jeova
1. (a) ?Ol man blong God we oli ded bifo Kraes, mo ol 144,000 man tu oli mas pastru long wanem samting bifo we oli save kasem praes blong olgeta? (b) ?“Bigfala kampani” we i laef tede, i gat janis blong kasem wanem?
OL MAN blong bilif, stat long Ebel i kam kasem Jon Baptaes, oli putum wok blong God fasples long laef blong olgeta. Olgeta ya oli ded finis mo oli stap wet blong kasem laef bakegen long niufala wol blong God. Ol 144,000 man we bambae oli rul wetem Kraes long Kingdom Blong God long heven, olgeta tu oli mas ded bifo we oli kasem praes ya. Be, Revelesen 7:9 i soem se long ol las dei ya, bambae i gat wan “bigfala hip blong ol man [“wan bigfala kampani,” NW ]” blong olgeta kantri, we ded bambae i neva kasem olgeta from we bambae oli laef olwe long wol ya. ?Yu yu wan long olgeta ya?
?Hu Ya Bigfala Kampani Ya?
2. ?Wanem ol save we yumi kasem sloslo long saed blong bigfala kampani we Revelesen 7:9 i tokbaot?
2 Long 1923, ol man blong Jeova oli luksave se “ol sipsip” long parabol blong Jisas long Matiu 25:31-46, wetem ol “narafala sipsip” we Jon 10:16 i tokbaot, oli minim ol man we bambae oli laef olwe long wol ya. Long 1931 i kam klia se ol man ya we Esikel 9:1-11 i talem se oli kasem mak long fored blong olgeta, oli minim tu olgeta we bambae oli laef long wol ya. Ale, long 1935, oli luksave se bigfala kampani i sem mak long ol narafala sipsip we Jisas i tokbaot. Tede, i gat plante milian man we oli mekemap bigfala kampani ya we God i glad long olgeta.
3. ?From wanem tok ya “stanap long fran blong bigfala jea” i no min se bigfala kampani ya bambae oli go long heven?
3 Long Revelesen 7:9, bigfala kampani ya i no stap long heven. Nating se vas ya i talem se oli stap “stanap long fran blong bigfala jea” blong God, hemia i no min se oli stap long heven stret. Hem i jes minim se God i stap wajem olgeta. (Ol Sam 11:4) Bigfala kampani ya, we “i no gat man i save kaontem olgeta,” oli no joen long grup ya we bambae oli go long heven. Samting ya i klia taem yumi skelem Revelesen 7:4-8 mo Revelesen 14:1-4, we oli talem stret namba blong ol man we bambae oli go long heven, hemia 144,000. Be yumi luk se i no gat wan stret namba blong talem hamas man we oli blong bigfala kampani ya.
4. (a) ?Wanem ya “bigfala trabol” we bigfala kampani i pastru long hem? (b) ?Olsem Revelesen 7:11, 12 i talem, hu i stap lukluk bigfala kampani ya mo joen wetem olgeta long wosip?
4 Revelesen 7:14 i tokbaot bigfala kampani ya i se: “Hemia ol man ya we oli kasem [“pastru long,” NW ] bigfala trabol.” Yes, olgeta ya bambae oli stap sef long wan trabol we i nogud moa i winim olgeta trabol we i bin kasem wol ya finis. (Matiu 24:21) Taem oli talem tangkiu long God mo long Kraes from we tufala nao i mekem rod blong sevem olgeta, ol narafala spirit man long heven bambae oli joen wetem olgeta blong talem se: “Yes i tru ya. God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkiu long hem, oli mas ona long hem, oli mas talemaot hae nem blong hem, mo oli mas talemaot paoa blong hem, gogo i no save finis. Amen.”—Revelesen 7:11, 12.
Oli Pruvum Se Oli Naf
5. ?Olsem wanem blong save ol mak we bigfala kampani ya i nidim blong kasem laef?
5 Be sipos bigfala kampani ya oli wantem sef long taem blong bigfala trabol, oli mas kasem ol mak we Jeova i putumap long saed blong stret fasin. Baebol i talemaot klia wanem samting we i makemaot se wan man i stret blong kasem laef. Taswe, olgeta man we oli laekem stret fasin oli gat janis naoia blong pruvum se oli naf blong God i sevem olgeta. ?Wanem samting we oli mas mekem?
6. ?From wanem i stret blong talem se bigfala kampani ya oli olsem sipsip?
6 Ol sipsip oli ol anamol we oli kwaet mo oli folem gud masta blong olgeta. Taswe, taem Jisas i talem se hem i gat ol narafala sipsip we oli no joen wetem grup ya we bambae i go long heven, hem i tokbaot ol man we oli wantem laef olwe long wol ya mo we oli wantem folem ol tijing blong hem. Hem i se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi.” ( Jon 10:16, 27) Ol man ya oli rili lesin mo obei long wanem we Jisas i talem, hemia i min se oli kam ol disaepol blong Jisas.
7. ?Wanem ol fasin we ol man blong Jisas oli nidim blong wokem?
7 ?Wanem sam narafala fasin we ol man blong Jisas wanwan oli mas wokem long laef blong olgeta? Tok Blong God i ansa long kwestin ya i se: “Yufala i mas finis long olfala laef ya blong yufala bifo, we yufala i stap folem ol fasin blong yufala nomo . . . nao bambae yufala i kam niufala man, we God i mekem yufala i kam olsem hem. Nao bambae ol man oli save luksave se laef blong yufala i folem trutok blong hem, mo i stret gud, i tabu, i blong hem nomo.” (Efesas 4:22-24) Ol man we oli biaenem Jisas, oli wokem ol fasin we oli save leftemap fasin joengud blong ol man blong God—olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.”—Galesia 5:22, 23, NW.
8. ?Taem bigfala kampani ya oli givhan long ol tabu brata, bambae oli kasem wanem?
8 Bigfala kampani i givhan long smol grup we bambae oli go laef long heven, we oli stap lidim wok blong prij. (Matiu 24:14; 25:40) Ol narafala sipsip ya oli givhan long smol grup ya nating se oli save we ol man bambae oli agensem olgeta. Long stat blong ol las dei ya, Jisas Kraes mo ol enjel blong hem oli bin sakemaot Setan mo ol enjel blong hem long heven. Tru ya, ‘sore tumas long graon, from we Setan i kamdaon finis, mo hem i kros tumas, from we hem i save se i gat smol taem nomo blong hem i stap yet.’ (Revelesen 12:7-12) Taswe, moa we en i kam klosap, moa we Setan bambae i strong blong agensem ol man blong God.
9. ?Ol man blong God oli karem gudfala frut long wok blong talemaot gud nius? ?From wanem?
9 Nating se ol man oli faet strong agensem olgeta ya, wok blong prij i gohed. Namba blong ol man blong talemaot Kingdom we i sam taosen man nomo afta long Wol Wo Wan, tede i bitim plante milian finis. Yes, Jeova i bin promes se: “Eni tul blong faet we bambae ol man oli stanemap agensem [ yufala] bambae oli no save win.” (Aesea 54:17, NW ) Wan memba blong hae kot blong ol man Jiu i bin luksave samting ya, se man i no save blokem wan wok we God i biaenem. Man ya i tokbaot ol disaepol taem hem i talem long ol Farisi blong faswan handred yia se: “Yumi mas livim ol man ya i stap. Yumi mas letem olgeta oli go fri, from we sipos samting ya i tingting mo wok blong man nomo, bambae i no save gotru. Be sipos samting ya i blong God, bambae yumi no save blokem olgeta. Maet bambae yumi faenemaot we yumi stap faet agens long God ya.”—Ol Wok 5:38, 39.
10. (a) ?“Mak” ya we bigfala kampani ya oli gat, hem i minim wanem? (b) ?Ol man blong God oli mekem wanem blong obei long ‘toktok ya we i kamaot long heven’?
10 Baebol i tokbaot bigfala kampani ya se oli kasem wan mak we i min se bambae oli sef. (Esikel 9:4-6) “Mak” ya i olsem wan pruf se oli givim laef blong olgeta long Jeova, oli tekem baptaes blong kam disaepol blong Jisas, mo oli traehad blong wokem ol fasin olsem Kraes. Olgeta ya oli obei long ‘toktok ya we i kamaot long heven,’ we i tokbaot olgeta giaman skul blong wol ya blong Setan se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong kasem panis wetem hem.”—Revelesen 18:1-5, NW.
11. ?Long wanem impoten fasin, bigfala kampani i soemaot se oli man blong Jeova?
11 Jisas i talem long ol man blong hem se: “From we yufala i stap lavlavem yufala, bambae olgeta man oli luksave se yufala i man blong mi.” ( Jon 13:35) Be ol man long ol skul blong wol ya oli no mekem olsem. Oli joen long ol faet blong kilim i ded ol narafala man we oli blong defren kantri, nating se ol man ya oli blong sem skul nomo olsem olgeta. Tok Blong God i talem se: “Fasin blong man i stap soemaot i klia, se hu i pikinini blong God, mo hu i pikinini blong Setan. Man we i no stap mekem ol fasin we i stret, no we i no lavem Kristin brata no sista blong hem, hem i no pikinini blong God, hem i pikinini blong Setan. . . . Yumi mas lavlavem yumi. I nogud yumi kam olsem man ya Ken bifo. Hem i wan man blong Setan, nao hem i kilim brata blong hem i ded.”—1 Jon 3:10-12.
12. ?Long taem blong bigfala trabol, Jeova bambae i mekem wanem long ol skul we oli olsem “tri” we i no karem gudfala frut?
12 Jisas i talemaot se: “Gudfala tri, hem i save karem gudfala frut nomo, mo rabis tri, hem i save karem rabis frut nomo. Be gudfala tri i no save karem rabis frut, mo rabis tri i no save karem gudfala frut. Tri we i no karem gudfala frut, bambae man i katemaot, i sakem i go long faea. From samting ya, bambae yufala i save makem ol man ya long frut blong laef blong olgeta.” (Matiu 7:17-20) Frut we ol skul blong wol oli karem i soemaot klia se oli ol rabis “tri,” mo i no longtaem, Jeova bambae i spolem olgeta long taem blong bigfala trabol.—Revelesen 17:16.
13. ?Olsem wanem bigfala kampani i soemaot se hem i wan kampani we i joengud “long fran blong bigfala jea” blong Jeova?
13 Revelesen 7:9-15 i soemaot sam samting we oli mekem se bigfala kampani ya i sef. Vison ya blong Jon i soem se oli joen tugeta blong “stanap long fran blong bigfala jea” blong Jeova, oli stap leftemap hae rul blong hem. Olgeta ya oli “wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.” Hemia i min se oli bilif we sakrefaes blong Jisas i naf blong karemaot sin blong olgeta. ( Jon 1:29) Oli givim laef blong olgeta i go long God finis, mo oli soemaot samting ya taem oli tekem baptaes long wota. From samting ya, oli save stanap long fes blong God olsem ol man we oli klin, hemia nao mining blong waet klos blong olgeta. Ale, “long dei mo long naet, oli stap mekem wosip long hem.” ?I gat sam samting yet we yu yu mas jenisim long laef blong yu, blong i stret moa wetem wanem we yumi jes tokbaot?
Ol Blesing Naoia
14. ?Wanem spesel blesing we ol man blong Jeova oli save kasem naoia?
14 Ating yu yu luksave finis sam long ol spesel blesing ya we, stat naoia finis, ol man blong Jeova oli stap kasem. Eksampol, taem yu lanem ol stamba tingting blong Jeova, yu kasem save se ol man oli save gat wan gudfala laef long fiuja. Taswe, naoia yu save wanem blong mekem wetem laef blong yu—bambae yu mekem wok blong trufala God mo harem gud long hop ya blong laef olwe long wan paradaes long wol. Yes, King Jisas Kraes “bambae i lidim [ bigfala kampani ya] oli go dring long ol springwota ya we i save givim laef.”—Revelesen 7:17.
15. ?Olsem wanem ol Witnes Blong Jeova oli kasem blesing taem oli folem ol rul blong Baebol long saed blong politik mo ol gudfala fasin?
15 Wan nambawan blesing we bigfala kampani ya i harem gud long hem naoia, hemia lav, fasin joengud, mo fasin blong wokgud wanples, we i stap long medel blong ol man blong Jeova long ful wol. Yumi evriwan i kakae semfala kakae long saed blong spirit, taswe yumi evriwan i obei long semfala loa mo rul we i kamaot long Tok Blong God. Hemia i mekem we yumi no stap seraot from ol defdefren tingting blong politik no kalja. Mo tu, yumi holemtaet ol gudfala fasin we God i wantem se ol man blong hem oli mekem. (1 Korin 6:9-11) Yes, ol man blong Jeova oli no stap faet, seraot, mo folem ol doti fasin we oli kam antap bigwan long wol tede, be oli harem gud long wan paradaes long saed blong spirit. Aesea 65:13, 14 i eksplenem se paradaes ya i olsem wanem.
16. ?Nating se i gat plante trabol long laef, bigfala kampani ya i gat wanem gudfala fiuja?
16 Ol man blong Jeova oli no stret gud olgeta. Mo oli stap kasem ol problem we oli stap long wol ya, olsem hadtaem long saed blong mane mo trabol from ol faet bitwin ol nesen. Mo oli kasem ol sik, oli safa, mo sam oli ded. Be oli bilif fulwan se long niufala wol, God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:4.
17. ?Wanem nambawan fiuja i stap fored long olgeta man we oli wosipim trufala God, nomata wanem samting i hapen long olgeta naoia?
17 Nating se yumi lusum laef blong yumi naoia from we yumi olfala, yumi sik, yumi gat wan akseden, no ol man oli kilim yumi, be bambae Jeova i mekem yumi laef bakegen long Paradaes. (Ol Wok 24:15) Ale, bambae yumi gohed blong harem gud long kakae long saed blong spirit long taem blong Taosen Yia Rul Blong Kraes. Bambae yumi lavem God moa taem yumi luk we ol stamba tingting blong hem oli kamtru fulwan. Mo ol blesing long saed blong bodi we Jeova i givim long taem ya bambae oli mekem lav we yumi gat long hem i kam bigwan moa bakegen. (Aesea 25:6-9) !Tru ya, wan nambawan fiuja i stap fored long ol man blong God!
Tingtingbak
• ?Baebol i talem se bigfala kampani i stap taem wanem bigfala samting i kamaot?
• ?Sipos yumi wantem stap wetem bigfala kampani ya we God i glad long olgeta, yumi mas mekem wanem naoia?
• ?Ol blesing we bigfala kampani i stap kasem naoia mo we bambae oli kasem long niufala wol blong God, oli impoten long yu olsem wanem?
[Tok blong pija long pej 123]
Plante milian man long bigfala kampani ya oli joen tugeta blong wosipim trufala God