• Tinghae Long Spesel Wok Blong Jisas Long Plan Blong God
    Wajtaoa—2008 | 1 Disemba

    • “Sid” We Profet Tok i Talemaot

      18. ?Wanem profet tok we Jeova i talem afta we Adam i mekem sin, mo biaen wanem save i kam klia long saed blong profet tok ya?

      18 Taem Adam mo Iv i mekem sin long garen blong Iden, i luk olsem we tufala i lusum evri samting, olsem fasin fren we tufala i gat wetem God, laef we i no save finis, fasin glad, mo Paradaes. Be Jeova God i talemaot wan Sevia. Man ya nao we hem i “sid” we profet tok i tokbaot. (Jen. 3:15, NW) Long ol yia biaen, plante profet tok blong Baebol oli tokbaot Sid ya, we i olsem wan tok haed. Sid ya i mas kamaot long laen blong Ebraham, Aesak, mo Jekob. Mo tu, hem i mas kamaot long laen blong King Deved.—Jen. 21:12; 22:16-18; 28:14; 2 Saml. 7:12-16.

      19, 20. (a) ?Hu ya Sid ya we God i promes blong sanem i kam? (b) ?From wanem yumi save talem se sid we God i promes blong sanem i no Jisas nomo, be i gat sam narafala tu?

      19 ?Hu ya Sid ya we God i promes blong sanem i kam? Ansa blong kwestin ya i stap long Galesia 3:16. (Ridim.) Be biaen, long semfala japta, aposol Pol i talem long ol tabu Kristin se: “Sipos yufala i blong Kraes, ale, yufala i olsem ol laen ya [“sid,” NW] blong Ebraham. Mo bambae yufala i save kasem ol samting ya we God i promes finis blong givim long ol laen ya [“sid,” NW] blong hem.” (Gal. 3:29) ?Sipos Jisas nao i Sid ya we God i promes blong sanem, olsem wanem i gat sam narafala tu oli mekemap sid ya?

      20 Plante milian man oli talem se oli kamaot long laen blong Ebraham, mo sam oli mekem olsem we oli ol profet. Sam skul oli tinghae long ol profet blong olgeta, from we oli ting se oli kamaot long laen blong Ebraham. ?Be olsem wanem? ?Olgeta ya oli Sid ya we God i promes blong sanem i kam? Nogat. Tabu spirit i pulum aposol Pol blong talemaot se i no evriwan long laen blong Ebraham we oli save talem se oli Sid ya. Sid ya we i blesem ol man long wol, i kamtru long Aesak nomo. God i no yusum ol narafala pikinini blong Ebraham blong blesem ol man long wol. (Hib. 11:18) Impoten man long sid ya we profet tok i talemaot, hemia wan man nomo, Jisas Kraes. Hem nao man we i kamaot long laen blong Ebraham olsem we ol man oli raetem long Baebol.c Ol narafala we biaen olgeta tu oli kam sid blong Ebraham, oli kasem blesing ya from we oli “blong Kraes.” Yes, wok blong Jisas blong mekem profet tok ya i kamtru, i rili spesel.