Jenesis i soemaot se God i mekemap tingting blong hem blong finisim ol rabis fasin long wol ya. Bambae hem i mekem ren i foldaon gogo wota i kavremap wol. Hem i talem long Noa blong wokem wan sip blong sevem laef blong hem, famle blong hem, mo ol defren kaen anamol. Longfala blong sip ya bambae i 134 meta, bigfala blong hem bambae i 22 meta, mo hae blong hem bambae i 13 meta. (Jenesis 6:15) Spes we i stap insaed long hem, hem i 40,000 kiubik meta.

Sip Ya i Gud Long Solwota

Longfala blong sip blong Noa i sikis taem moa long bigfala blong hem mo i ten taem moa long hae blong hem. Hemia i sem mak long plante sip tede, be long saed blong longfala mo bigfala blong ol sip tede, oli jenjenisim blong mekem i laenap wetem paoa we sip i nidim blong ron long solwota. Sip blong Noa i no ron, hem i flot nomo. ?Olsem wanem? ?Hem i flot gud?

Ol man oli save sipos wan sip i gud long solwota taem oli luk sip ya long win mo bigsi. Hemia tu i dipen long longfala mo bigfala blong hem. Baebol i talem se wota i ron bigwan long taem blong Noa, mo i talem tu se God i mekem wan win i blu. (Jenesis 7:​11, 12, 17-20; 8:1) Baebol i no talem se ol wef oli bigwan olsem wanem mo win i strong olsem wanem. Be ating win ya mo ol wef ya oli bigwan mo oli olbaot, olsem tede. Sipos win i blu strong blong longtaem, ol wef oli hae moa mo wan wef i longwe moa long narafala wef. Mo tu, sipos graon i bin seksek long taem blong Noa, ol wef oli mas gat moa paoa.

Bigfala mo hae blong sip blong Noa i stret long longfala blong hem. Hemia i mekem se win mo ol wef oli no save kapsaetem sip ya. Plan blong sip ya i stretgud, mekem se hem i save stap kwaet long bigsi we i stap saksakem fored mo as blong ol sip. Sipos fored blong sip ya i klaem long ol wef mo i foldaon bakegen wantaem nomo, ol man mo ol anamol insaed oli mas kasem kil mo harem nogud. Mo tu, sip we i no strong, ol wef olsem oli save brekem. Sipos sip i no strong, wef i save leftemap tufala en blong hem wantaem, ale sip bambae i ben long medel. Sipos wef i leftemap medel blong sip nomo, maet fored mo as blong hem i ben. God i talem long Noa blong mekem longfala blong sip i 10 taem moa long hae blong hem. Biaen, ol man blong wokem ol sip oli faenemaot se sip we longfala blong hem i 10 taem moa long hae blong hem, i no save brok long ol wef olsem.