LONG plante handred yia, skul blong ol man Jyu i tijim se nem blong God, Jeova, i tabu tumas blong man i talem.a (Ol Sam 83:18, NW) Plante man we oli stadi dip long saed blong ol skul, oli ting se fasin ya blong talem nem blong Man Ya We i Wokem olgeta samting, i no soem respek long hem. Mo tu, oli talem se fasin ya i go agensem namba tri blong ol Ten Komanmen, we i se: ‘Yu no mas yusum nem blong Masta long fasin we i olbaot.’ (Eksodas 20:7, King James Version) Samtaem afta long yia 200, buk ya Misna i talem se “man ya we i talem Nem blong God olsem we oli raetem i stap” bambae hem “i no gat ples blong hem long niufala wol we i kam.”—Sanhedrin 10:1.

Namba Tri Komanmen

?Be olsem wanem long saed blong oda ya we i stap long namba tri Komanmen? Eksodas 20:7 (NW) i talem klia se: “Bambae yufala i no mas yusum nem blong Jeova, God blong yufala, long fasin we i no stret, from we Jeova bambae i panisim man we i yusum nem blong hem long fasin we i no stret.”

?Be tok ya “fasin we i no stret” i minim wanem? Wan buk (The JPS Torah Commentary, we Jewish Publication Society i prentem) i eksplenem se tok ya “fasin we i no stret” i kamaot long wan Hibru tok (lash·shaw’ʹ) we i save minim “fasin we i giaman” no “mekem olsem nating nomo, we i no gat mining.” Buk ya i talem tu se: “[Hibru tok ya] i no karem wan tingting nomo, taswe hem i save minim fasin blong go agensem [putum tabu long] ol giaman tok we man i talem long kot, mo fasin blong agensem man we i yusum Nem blong God olbaot nomo.”

Buk ya blong ol man Jiu, i soemaot klia se ‘yusum nem blong God long fasin we i no stret’ i minim se man i yusum nem ya long wan rod we i nogud. ?Be olsem wanem taem yumi tijim ol man long saed blong God, no taem yumi prea long Papa blong yumi long heven? ?I stret blong yusum nem blong God? Long Ol Sam 91:14 (NW) Jeova i talem klia wanem tingting blong hem long saed ya, hem i se: “From we hem i lavem mi, bambae mi mi sevem hem. Bambae mi protektem hem from we hem i save nem blong mi.”