it-1 pej 11 haf 3

Eron

I gud blong makem se long trifala taem we Eron i go long rong rod, hemia i no from we hem i minim blong mekem rong aksen, be i luk olsem se hem i letem presa blong situesen we hem i stap long hem, i pulum hem i go long rong rod, o i letem ol narafala man oli pulum hem. Speseli long faswan taem we hem i mestem, hem i sud folem rul we i stap long oda ya: “Yufala i no mas folem bighaf blong ol man blong mekem ol samting we i nogud.” (Eks 23:2) Nating se i olsem, biaen long samting ya, Baebol i yusum nem blong hem long wan fasin we i givim ona long hem, mo taem Pikinini blong God i stap long wol, hem i soemaot se wok blong pris we Eron i mekem, i stret nomo.—Sam 115:10, 12; 118:3; 133:1, 2; 135:19; Mt 5:17-19; 8:4.

it-1 pej 343 haf 5

Blaen

Baebol i tokbaot se fasin ya blong jajem wan bisnes long kruked fasin, i mekem man i blaen. I gat plante samting long Loa we i go agensem fasin ya blong pem jaj o givim presen long hem blong i haedem wan rong, mo i agensem fasin ya blong mekem i gud moa long wan man i bitim narafala. Ol samting ya oli save blaenem wan jaj, nao hem i no save jajem gud wan bisnes long jastis. “Yufala i no mas letem narafala i pem yufala blong haedem rong blong hem, from we fasin ya i save mekem man we i save luklukgud i kam blaen.” (Du 16:19) Sipos wan man we i mas pas long kot, i givim wan presen long jaj, presen ya bambae i gat paoa long jaj ya, nomata se hem i gat fasin luksave mo i gat stret fasin. Loa blong God i tokbaot samting we mane o presen i save mekem long filing blong wan jaj tu, taem i talem se: “Yufala i no mas sore long wan puaman jes from we hem i pua, o yufala i no mas mekem i gud moa long man we i rij.” (Le 19:15) So, nomata wanem filing blong wan jaj o tingting blong bighaf blong ol man, be wan jaj i no mas mekem desisen agensem wan rijman jes from we hem i rij.—Eks 23:2, 3.