Jehova i stap stretem olgeta we hem i lavem olgeta. (Hibrus 12:5, 6) Hem i lavem Meriam, taswe hem i stretem hem taem hem i kam flas. Meriam i harem nogud, be samting ya i sevem laef blong hem. Hem i mekem tingting blong hem i stap daon, i letem Jehova i stretem hem, mo biaen Jehova i glad long hem bakegen. Hem i laef gogo klosap ol man Isrel oli aot long draeples. Maet hem i gat 130 yia taem hem ded long Kades long draeples blong Jin.b (Namba 20:1) Plante handred yia biaen, Jehova i toktok gud long saed blong Meriam, from we hem i holemstrong long hem. Hem i yusum profet Maeka blong talem long ol man blong hem se: “From mi nao mi tekemaot yufala long kantri ya Ijip, mi pemaot yufala long haos blong ol slef. Mi sanem Moses, Eron mo Meriam i kam long yufala.”—Maeka 6:4.