Ahasia i wantem givimbak samting we Elaejah i mekem long hem, nao hem i sanem wan kapten wetem fifti soldia blong oli go tekem Elaejah i kam. Taem oli faenem Elaejah, hem i stap “sidaon long top blong bigfala hil”a nao kapten blong ol soldia i askem blong i “kamdaon” long nem blong king. !Traem tingbaot! Nating se ol soldia ya oli save se Elaejah i wan “Man blong tru God,” be oli ting se i stret nomo blong mekem hem i fraet mo putum laef blong hem long denja. !Oli rong olgeta! Elaejah i talem long kapten ya, se: “Oraet, sipos mi mi wan man blong God, i gud faea i aot long heven i kamdaon, mo i bonem yu wetem ol 50 man blong yu.” !Nao, God i sanem faea i kam! “Nao faea i aot long heven i kamdaon, mo i bonem lida ya wetem ol 50 man blong hem” (2 King 1:9, 10) En blong laef blong ol soldia ya, i mekem yumi tingbaot se Jehova i no ting nating long ol man we oli spolem o no soemaot respek long ol man blong hem.—1 Kronikel 16:21, 22.

Long taem ya, ?Olsem wanem Elaejah i stanap strong long medel blong ol rabis man ya? ?Yu ting se kwestin ya i stret long taem blong yumi tede? ?Maet samtaem yu yu kros long wan man we yu kea long hem, be hem i no wantem lesin long yu, mo i gohed blong mekem samting we i no stret? ?Olsem wanem yumi save stanap strong long taem olsem? Yumi save lanem samting taem yumi tingbaot ples we ol soldia oli faenem Elaejah long hem, hemia “long top blong bigfala hil.” Yumi no save talem stret from wanem Elaejah i stap go long ples ya, be yumi save gud se hem i wan man blong prea. Hem i luksave se ples ya i wan kwaet ples we i save givhan long hem blong i kam klosap moa long God blong hem we i lavem tumas. (Jemes 5:16-18) I Semak long yumi. Yumi mas faenem taem blong kam klosap long God. Yumi mas prea long nem blong hem mo talemaot ol trabol mo ol wari blong yumi. Taem yumi mekem olsem, bambae yumi naf blong stanap strong taem ol man we oli stap raonabaot long yumi, oli mekem i strong long yumi blong spolem yumi.