Elisa i gat tingting daon mo i lego evri samting long han blong Jehova. Mo sipos Jehova i letem Elisa i luk taem ya we bae hem i tekem Elaejah i go antap, i min se Jehova i agri long samting we Elisa i askem long hem. !Mo afta samtaem we tufala fren ya “i stap wokbaot i go mo tufala i stap toktok,” wan gudfala samting i hapen!—2 King 2:10, 11.

Wan laet we i narakaen i kamaot long skae, nao wan bigfala noes we i olsem noes blong tanda mo waelwin i kamaot long laet ya. Wantaem nomo, wan samting we i saen gud i stap kam from tufala we i mekem tufala i seraot. Tufala man ya i luk wan samting olsem wan trak o wan kat we oli wokem long faea. Elaejah i save se taem blong hem i kam finis. ?Hem i go insaed long kat ya? Baebol i no talem. !Be hem i filim save se strong win ya i stap tekem hem i go antap long ea!

?Elaejah i stap go wea? Sam skul oli talem se hem i go antap long heven blong go stap wetem God. Be i no samting we i hapen. Sam handred yia biaen, Jisas i talem se i nogat man i go antap long heven. (Jon 3:13) Taswe, taem yumi ridim long Baebol se “Elaejah i go antap long heven long wan strong win,” yumi save askem se, ?Heven ya hem i wea? (2 King 2:11) Taem Baebol i tokbaot “heven,” hem i no stap minim nomo ples we Jehova i stap long hem be i save minim tu antap long skae, ples we ol klaod i stap long hem, mo ol pijin oli stap flae long hem. (Ol Sam 147:8) Long heven ya nao, Elaejah i go long hem. ?Mo wanem i hapen biaen?

Jehova i tekem profet Elaejah i go long kingdom blong Juda blong i statem wan niufala wok. Baebol i talem se seven yia afta, hem i stap gohed blong wok long kingdom ya. Long taem ya, rabis king ya, Jehoram i stap rul long Juda. Hem i mared long gel blong Ehab mo Jesebel mo from samting ya, ol man oli gohed blong luksave ol rabis wok blong tufala. Jehova i askem long Elaejah blong i raetem wan leta we i tokbaot jajmen we bae hem i mekem long Jehoram. Baebol i talem se ded blong Jehoram i nogud we i nogud, i se: “I no gat man i rigret taem hem i ded”—2 Kronikel 21:12-20.