Bighaf blong yumi bambae i neva fas aninit long graon olsem ol man ya we oli wok long maen blong digimaot jakol, mo bighaf blong yumi bambae i neva stap long wan bigfala trabol we klosap yumi ded from. Be yet, yumi evriwan i nidim man blong sevem yumi from we yumi no save ronwe long ol trabol olsem sik, olfala mo ded. Job, wan man we i holemstrong long God, i talem se: “Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol. Mifala i stap kam bigfala kwiktaem nomo, olsem we flaoa i gru, be mifala i stap ded kwiktaem tu, olsem flaoa. Laef blong mifala i olsem sado, we i stap lus kwiktaem nomo.” (Job 14:1, 2) Nating se Job i talem toktok ya samwe 3,500 yia bifo, hem i tru yet tede from we i no gat wan long yumi we i save ronwe long fiuja blong yumi, hemia ded. Nomata yumi laef long wanem ples mo nomata yumi traehad blong lukaot long helt blong yumi, yumi nidim blong kam fri long fasin safa, ol trabol blong olfala, mo ded.

Maet yu tu yu gat sem filing olsem Job long saed blong laef mo ded no maet yu gat wan narafala filing bakegen. Nating se i olsem, i sua se taem ol yia oli pas, yu tu bambae yu ‘lus kwiktaem olsem sado,’ bambae yu go longwe long ol fren, famle, haos blong yu mo olgeta samting we yu mekem long laef blong yu, bambae yu yu ded. Waes King Solomon blong Isrel bifo i raetem se: “Yes, i tru, ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis.”—Prija 9:5.