Ol Sam 23:4—“Nating Se Mi Wokbaot Tru Long Vali Blong Sado Blong Ded”

“Nating se mi wokbaot long vali we i tudak olgeta, mi no fraet se wan samting i save spolem mi, From yu yu stap wetem mi. Wud mo stik blong yu i mekem se mi no wari nating.”—Ol Sam 23:4, Niu Wol Translesen.

“Nating se mi wokbaot tru long vali blong sado blong ded, bambae mi no fraet long wan samting nogud: from pija blong yu i stap wetem mi, mo wud mo stik blong yu i stap leftemap tingting blong mi.”—Ol Sam 23:4, King James Version.

Mining Blong Ol Sam 23:4a

Olgeta we oli wosipim God, oli harem gud from hem i kea mo i protektem olgeta—iven taem oli stap fesem wan had situesen long laef. Vas ya i skelem fasin blong Jehova blong kea long ol man we oli wosipim hem, se i olsem fasin blong wan man blong lukaot long sipsip we i kea long ol sipsip blong hem.b Taem wan trabol i kasem olgeta stret, we i olsem se oli stap long vali we i tudak olgeta o long vali blong sado blong ded, be oli no save harem se oli stap olgeta wan. Oli harem se oli sef, from oli harem olsem we God i stap klosap nomo long olgeta.

Long taem bifo, wan man blong lukaot long sipsip i stap yusum rop o nalnal blong protektem ol sipsip blong hem, blong ol man o animol i no kilim olgeta. Mo tu, hem i yusum stik blong hem, hemia wan longfala stik we en blong hem i olsem huk, blong lidim ol sipsip o blong pulumaot olgeta long ol denja. Long sem fasin, Jehova God we i gat lav, hem i olsem Man Blong Lukaot Long Sipsip we i protektem mo lidim olgeta we oli wosipim hem. Nating se long laef blong olgeta, oli stap fesem ol trabol we i olsem ol dei we i tudak we i tudak, be Jehova i kea long olgeta long plante defren rod.

• Hem i yusum Tok blong hem Baebol blong tijim mo kamfotem olgeta.—Rom 15:4.

• Hem i stap lesin long ol prea blong olgeta, mo i mekem we oli gat pis long tingting mo hat blong olgeta.—Filipae 4:6, 7.

• Hem i yusum ol narafala Kristin blong enkarejem olgeta.—Hibru 10:24, 25.

• Hem i givim wan gudfala hop long olgeta, hemia taem hem i mekem promes se long fiuja bambae hem i finis olgeta trabol we oli stap gotru long hem tede.—Ol Sam 37:29; Revelesen 21:3-5.

Ol Vas Raonabaot Long Ol Sam 23:4

Deved nao i raetem Ol Sam 23. Hem i wan man blong lukaot long sipsip taem i yangfala mo biaen hem i kam king blong nesen blong Isrel. (1 Samuel 17:34, 35; 2 Samuel 7:8) Long stat, man blong raetem sam ya i diskraebem Jehova olsem Man Blong Lukaot Long Sipsip we i stap lidim, fidim, mo mekem ol man we oli wosipim hem oli harem gud, mo hemia nao prapa wok we wan man blong lukaot long sipsip i stap mekem long ol sipsip blong hem.—Ol Sam 23:1-3.

Long Ol Sam 23:4, taem Deved i stap tokbaot fasin blong God blong protektem ol man, hem i jenisim wei blong hem blong toktok, hem i no yusum tok ya (hem) we i olsem se i stap tokbaot God long wan narafala, be hem i yusum tok ya (yu) olsem we i stap toktok stret wetem God. Hemia i soemaot se Deved i rili frengud wetem Jehova. Deved i save se God i kea long hem mo se Hem i save gud ol trabol we hem i stap gotru long hem. From samting ya, Deved i no fraet.

Long Ol Sam 23, vas 5 mo 6, Deved i no moa tokbaot man blong lukaot long sipsip wetem ol sipsip blong hem, be i tokbaot wan man wetem gest blong hem. Jehova i olsem man ya we i glad nomo blong givim evri samting long Deved blong ona long hem olsem gest blong hem. Ol enemi blong Deved oli no save blokem God blong i no kea long hem. Long en blong sam ya, Deved i talemaot se hem i sua gud se God bambae i soem gudfala fasin long hem mo i lavem hem oltaem long laef blong hem.

Ol wod long Ol Sam 23 oli diskraebem gud olsem wanem God ya we i gat lav i stap gohed blong givim samting we ol man we oli wosipim hem oli nidim.—1 Pita 2:25.