Mekem Wosip Long Jeova Wetem Han We i Klin

LONG paoa blong tabu speret, Deved, man blong raetem Ol Sam, i singsing se: “Hae God, mi wasem han blong mi blong soemaot we laef blong mi i klin long fes blong yu, nao mi stap wokbaot raon long olta blong yu, mi stap mekem wosip long yu.”​—Ol Sam 26:6.

Taem Deved i wokem singsing ya, maet hem i stap tingbaot kastom we ol Livaet pris blong Isrel oli mekem blong wokbaot i go antap long olta, blong putum sakrifaes blong olgeta long faea. Be bifo we ol pris oli mekem wosip ya, oli mas wasem han mo leg blong olgeta. Hemia i no wan smol samting. !Sipos wan pris i no mekem samting ya fastaem, hem i save lusum laef blong hem from!​—Eksodas 30:​18-21.

Fasin ya we man i wasem bodi blong hem, i olsem wan pijatok blong soem se hem i kam klin long saed blong speret mo fasin blong hem. (Aesea 1:16; Efesas 5:26) Tede, Jeova i wantem se yumi ‘wokbaot raon long olta blong hem,’ olsem we yumi mekem wok blong hem. Be hem i askem yumi blong mekem olsem wetem han we i klin​—olsem Deved i talem, han we yumi wasem blong mekem ‘i klin long fes blong God.’ Rul ya i impoten tumas, from we man we i stap mekem ol fasin we oli no klin, hem i no save go insaed long Kingdom blong God. (Galesia 5:​19-21) Taem wan man i yusum ful laef blong hem long wok blong God, samting ya i no givim raet long hem blong joen long rabis fasin. Taswe, aposol Pol i raetem se: “I olsem we mi stap faetem bodi blong mi blong mekem bodi blong mi i stap kwaet, blong bambae i save mekem olsem we mi mi wantem. Mi mi singaot plante narafala man finis blong oli kam joen long resis ya. Be mi no wantem brekem rul blong resis, nao bambae oli sakemaot mi mi lus.”​—1 Korin 9:27.

Olgeta we oli wantem se God i glad long olgeta mo oli wantem trufala glad, oli mas mekem wok blong Jeova wetem han we i klin. Olsem Deved, oli wokbaot “wetem hat we i strong long God mo wetem stret fasin.”​—1 King 9:4.