Baebol i Talem Wanem

!Yu Yu Sas Long Ae Blong God!

WAN KRISTIN WOMAN I RAETEM SE: “LONG BIGHAF BLONG LAEF BLONG MI, MI FILIM SE MI NO NAF NATING BLONG MEKEM WAN GUDFALA SAMTING. NATING SE MI LAVEM JEOVA TUMAS, MO MI TRAEHAD BLONG MEKEM WOK BLONG HEM, BE OLTAEM, MI FILIM SE MI NO STAP MEKEM INAF.”

?YU YU save wan man we i stap traehad blong faet agensem filing ya se hem i no naf mo se hem i nating nomo? ?No, samtaem yu yu gat ol filing ya? Plante man oli gat ol filing olsem. Ol trufala man blong God, olgeta tu oli gat ol filing ya. I no gat wan man i save ronwe long ol trabol we oli stap kamaot naoia ‘we laef long wol ya i kam strong tumas.’ Long ‘ol lasdei ya,’ i gat fulap man we oli no save bos long tingting blong olgeta, oli wael olgeta, mo oli no wantem ol fasin we i gud nomo. From samting ya, plante man oli harem nogud from we narafala i no kea long olgeta mo i mekem nogud long olgeta. (2 Timoti 3:1-5, NW) Ol trabol olsem, oli mekem man i harem nogud tumas, mo i mekem hem i gat filing ya se hem i nating nomo.

Sam narafala, oli gat filing ya se oli nating nomo from we narafala i askem olgeta blong mekem samting we oli no naf blong mekem. Ale, from samting ya, oli gat filing ya se neva oli save mekem wan gudfala samting. Nomata wanem trabol oli kasem, be ol man we oli gat filing se oli nating nomo, oli faenem se i had blong luk from wanem God—mo ol narafala man—i save lavem olgeta. Yes, maet oli save gat tingting ya se i no gat man i lavem olgeta.

!Be tingting ya i no laenap wetem tingting blong Jeova God! Long Tok blong hem, Jeova i givim woning se yumi mas blokem ol “giaman trik” blong Enemi ya blong hem, Devel Setan. (Efesas 6:11) Setan i stap yusum ol giaman trik blong hem blong traem stopem yumi blong no moa wosipim God blong yumi. Blong mekem olsem, Setan i pulum yumi blong tingting se yumi nating nomo, mo se Jeova bambae i neva lavem yumi from wan samting we yumi mekem. Be Setan i wan “man blong giaman”—yes, hem i “stamba blong ol giaman toktok.” (Jon 8:44) !Taswe, yumi no mas letem ol giaman trik blong hem oli winim yumi! Tru long Baebol, Jeova i mekem sua long yumi se yumi rili sas long ae blong hem.

Wan Stret Tingting Long Saed Blong Yumi Wan

Baebol i givim woning long yumi se yumi mas blokem ol nogud frut we oli save kamaot from tingting we i foldaon. Ol Proveb 24:10 (NW) i talem se: “?Yu yu letem tingting blong yu i foldaon taem yu kasem trabol? Paoa blong yu bambae i smol nomo.” Sipos yumi gohed longtaem blong holem ol nogud tingting ya we yumi gat long saed blong yumi wan, bambae yumi no moa gat paoa, nao yumi kam slak, mo i isi blong yumi foldaon. Setan i savegud samting ya. I hadwok long yumi finis, sipos hat blong yumi i fulap long filing ya se yumi nating nomo. Be, ol samting oli kam moa hevi sipos Setan i tekem jans ya blong spolem yumi.

Taswe, i impoten tumas we yumi gat wan gudfala tingting, we i skelgud, long saed blong yumi wan. Aposol Pol i talem se: “Mi mi talem long yufala evriwan, se yufala i no mas letem tingting blong yufala i go antap. Tingting blong yufala i mas stret gud.” (Rom 12:3) Wan narafala Baebol i tanem vas ya olsem se: “Mi mi talem long yufala evriwan se, yufala i no mas tinghae tumas long yufala, be yufala i mas gat stret tingting long saed blong yufala.” (Charles B. Williams) Yes, Baebol i talem se yumi mas gat stret tingting long saed blong yumi wan. Long wan saed, yumi no mas gat tingting se yumi hae moa long narafala; mo long narasaed, yumi no mas daonem yumi wan bitim mak. Pol i soemaot se, blong gat wan tingting we i stret gud, yumi mas gat gudfala tingting long saed blong yumi wan. Tru ya, tabu spirit i pusum Pol blong soemaot se wanwan long yumi i sas long ae blong Jeova.

Jisas tu i soemaot klia se yumi mas tinghae long yumi wan. Hem i talem se: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22:39) Tok ya “olsem we yu stap mekem i gud long yu ” i soemaot se yumi mas tinghae, mo gat respek long yumi wan. I tru se yumi gat ol slak fasin mo yumi mekem mastik tu. Be, sipos yumi stap traehad blong mekem God i glad, yumi sore from ol rong we yumi mekem, mo yumi askem God blong fogivim yumi, bambae yumi save tinghae lelebet long yumi wan. Maet hat blong yumi i pulum yumi blong ting nating long yumi, be rimemba se, ‘God i hae moa long hat blong yumi.’ (1 Jon 3:20) Hemia i minim se, tingting blong Jeova long saed blong yumi i defren olgeta long tingting we yumi gat long saed blong yumi wan.

Hat We i Trabol Mo Tingting We i Foldaon

Deved, man ya blong raetem Sam, i raetem se: “Jeova i stap klosap long ol man we hat blong olgeta i trabol, mo i stap sevem ol man we tingting blong olgeta i foldaon olgeta.” (Ol Sam 34:18, NW) Buk ya Matthew Henry’s Commentary on the Whole Bible i tokbaot vas ya i se: “Fasin blong ol stret man, . . . oltaem oli harem nogud long hat mo tingting blong olgeta, mo oli sem from sin we oli mekem. Oli ting nating long olgeta bakegen, oli putum olgeta oli stap daon, mo oli ting se oli no naf blong mekem wan gudfala samting.”

Ol man we “hat blong olgeta i trabol“ mo we “tingting blong olgeta i foldaon,” maet oli ting se Jeova i stap longwe long olgeta, mo se i no stret blong Jeova i kea long olgeta from we oli nating nomo. Be, tingting ya i no stret. Ol tok blong Deved oli soem klia se Jeova i no save lego olgeta we oli “ting nating long olgeta bakegen.“ God blong yumi i gat fasin sore. Hem i save se taem we yumi harem nogud, long taem ya nao yumi nidim hem moa i bitim ol narafala taem, mo hem i stap klosap long yumi.

Tingbaot wan eksampel. Sam yia bifo, wan mama i hareap i go long hospital wetem boe blong hem we i gat tu yia. Smol pikinini ya i kasem strong kof mo i no moa save pulum win. Afta we ol dokta oli jekemap smol boe ya, oli talem long mama blong hem se bambae boe blong hem i mas slip long hospital long naet ya. ?Mama ya i slip weples? Hem i sidaon delaet long wan jea klosap long boe blong hem long hospital. Smol boe blong hem i sik, taswe hem i wantem stap klosap long hem. !Papa blong yumi long heven i wokem yumi long pija blong hem, taswe yumi sua se hem i lavem yumi tumas, mo i save i mekem i gud long yumi i bitim wan mama we i kea long pikinini blong hem! (Jenesis 1:26; Aesea 49:15) Ol tok we oli stap Ol Sam 34:18 oli mekem yumi harem gud tumas. Vas ya i talem se taem “hat blong yumi i trabol,“ Jeova i “stap klosap“ long yumi, olsem wan papa we i lavem yumi tumas. Hem i stap wajem yumi, i stap lukluk yumi, mo i rere blong givhan long yumi.—Ol Sam 147:1, 3.

“Yufala i Gud Moa i Winim Plante Smolfala Pijin Ya”

Taem Jisas i stap mekem minista wok blong hem long wol ya, hem i soem plante samting long saed blong ol tingting mo filing blong Jeova. Antap long hemia, hem i soemaot filing we Jeova i gat long saed blong ol man we oli stap mekem wok blong Hem. Plante taem, Jisas i soem klia long ol disaepol blong hem se oli sas long ae blong Jeova.—Matiu 6:26; 12:12.

Eksampel, taem Jisas i stap eksplenem se ol wanwan disaepol blong hem oli impoten long ae blong God, hem i talem se: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.” (Matiu 10:29-31) Tok ya i mas gat bigfala mining long tingting blong ol man we oli stap lesin long Jisas long faswan handred yia.

Ol smosmol pijin ya, we oli kolem sparrow, praes blong olgeta i daon moa long ol narafala pijin we man i pem blong kakae. Plante taem, ol man oli kilim ol smosmol pijin ya, oli tekemaot feta blong olgeta, oli putum ol pijin ya long stik, mo oli rusum. I klia se Jisas i bin luk sam pua woman long maket we oli stap kaontem mane blong olgeta blong luk se oli save pem hamas smosmol pijin ya. Ol pijin ya, praes blong olgeta i daon we i daon. Man i save givim wan smol mane nomo blong pem tu smosmol pijin.

Samtaem biaen, Jisas i talem pijatok ya bakegen, be hem i jenisim lelebet. Long Luk 12:6, Jisas i talem se: “Ol smosmol pijin ya we man i stap salem olgeta, wan handred twanti vatu long faef.” Traem tingbaot samting ya. Wan man i save pem tu smol pijin long sikiste vatu. Be sipos hem i givim wan handred twanti vatu, hem i no tekem fo pijin, be hem i save tekem faef pijin wantaem. Hem i pem fo pijin, be wan i olsem se i no gat praes nating, oli givim fri nomo. “Be,“ Jisas i talem se: “I no gat wan long olgeta [hemia tu we i no gat praes] we God i fogetem.” Jisas i talem mining blong pijatok ya se: “Long fes blong [God], yufala i gud moa, i winim plante smosmol pijin ya.” (Luk 12:7) !I sua se ol tok ya oli rili leftemap tingting blong ol man we oli stap lesin long tok blong Jisas!

?Yu yu kasem bigfala poen blong naesfala pijatok ya blong Jisas? !Sipos Jeova i tinghae long ol smosmol pijin ya, hemia i minim se long tingting blong hem, ol man we oli stap mekem wok blong hem, oli sas tumas! I no gat wan long yumi we Jeova i save fogetem hem. Wanwan long yumi i impoten tumas long Jeova, mekem se hem i makem evri smosmol samting long saed blong yumi—hem i kaontem evri hea long hed blong yumi.

I tru se bambae Setan i gohed blong yusum “ol giaman trik” blong hem—olsem filing ya se yumi nating nomo—blong stopem yumi long wok blong Jeova. !Be yu no mas givim jans long Setan blong i winim yu! Tingbaot Kristin woman ya we yumi bin tokbaot hem long stat blong haf ya. Hem i kasem help taem hem i ridim wan haf insaed long Wajtaoa we i givim woning long saed blong ol traehad we Setan i stap mekem blong pulum yumi blong gat ol filing we oli no stret.a Woman ya i talem se: “Mi neva tingbaot se Setan i save yusum prapa filing blong mi blong mekem tingting blong mi i foldaon. Taem mi kasem save long samting ya, mi gat strong tingting blong faet agensem ol filing ya. Naoia mi save fesem ol traem ya blong Setan, wetem ful tras blong God.“

Jeova “i save evri samting.” (1 Jon 3:20) Yes, hem i save wanem traem we yumi stap fesem naoia. Mo tu, hem i save ol traem we yumi bin fesem bifo, we maet oli mekem se yumi no moa respektem yumi wan. !Rimemba se samting we i moa impoten, hemia tingting we Jeova i gat long saed blong yumi! Nomata sipos yumi ting se i no gat man i lavem yumi mo se yumi nating nomo, be Jeova i mekem sua long yumi se, olgeta man blong hem, oli sas long ae blong hem. Yumi save trastem fulwan tok blong Jeova, from we hem i no olsem Enemi blong hem. Tru ya, God “i no save giaman.”—Taetas 1:2.

[Futnot]

[Tok blong makem poen pija long pej 26]

Olsem wan papa we i gat lav, Jeova i stap klosap long olgeta we oli harem nogud long hat blong olgeta

[Tok blong pija long pej 27]

?Sipos Jeova i no save fogetem wan smol pijin, weswe hem i save fogetem yu?

[Credit Lines]

Lydekker

Illustrated Natural History