Jehova i Beswan Man Blong Fogif

JEHOVA I RERE BLONG FOGIF

4. ?From wanem yumi sua se Jehova i rere blong fogif?

⁴ Baebol i talem long yumi se Jehova i rere blong fogif. Taem Jehova i tokbaot hem wan long Moses long Hil Ya Sinae, hem i sanem wan enjel blong talem se: “Jehova, Jehova, wan God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru. Oltaem hem i soemaot se hem i lavem plante taosen man, hem i fogivim man we i mekem rong, no i brekem loa, no i mekem sin.” (Eks. 34:6, 7) Jehova i wan God we i kaen mo i gat sore, mo oltaem hem i rere blong fogivim man we i tanem tingting from sin blong hem.—Neh. 9:17; Sam 86:15.

5. Folem Ol Sam 103:13, 14, ?Jehova i mekem wanem nating se hem i save gud se yumi wanem kaen man?

⁵ Jehova we i Krieta blong yumi i save gud evri samting long saed blong yumi. !Traem tingbaot! Hem i save gud evri ditel long saed blong evri man long wol. (Sam 139:15-17) Taswe, hem i save luk evri nogud fasin we yumi kasem long ol perens blong yumi. Antap moa, hem i save samting we i hapen long laef blong yumi we i mekem se yumi kam wanem kaen man. From we Jehova i save gud yumi, ?hemia i pulum hem blong mekem wanem? Hem i wantem tumas blong sore long yumi.—Sam 78:39; ridim Ol Sam 103:13, 14.

6. ?Wanem i pruvum se Jehova i wantem tumas blong fogif?

⁶ Jehova i pruvum se hem i wantem tumas blong fogif. Hem i kasemsave se from aksen blong faswan man ya Adam, yumi evriwan i sinman mo bambae yumi ded. (Rom 5:12) I no gat rod blong mekem se yumi wan mo ol narafala i kam fri long panis ya. (Sam 49:7-9) Be from we God i lavem yumi, hem i gat sore mo i mekem samting blong yumi save kam fri. ?Hem i mekem wanem? Jon 3:16 i talem se, Jehova i sanem stret Pikinini blong hem, wan nomo we hem i gat, blong ded long bihaf blong yumi. (Mat. 20:28; Rom 5:19) Jisas i safa mo i ded long bihaf blong yumi, blong mekem se eni man we i soemaot se i bilif long hem, i save kam fri. (Hib. 2:9) !I sua se Jehova i mas harem nogud tumas taem i luk Boe blong hem we hem i lavem tumas, i ded long wan fasin we i nogud olgeta mo i blong sem nomo! Traem tingbaot, Jehova i no save letem Boe blong hem i ded olsem, sipos hem i no wantem fogivim yumi.

7. ?Wanem sam eksampol long Baebol we i soemaot se Jehova i rere blong fogif?

⁷ Baebol i tokbaot eksampol blong plante man we Jehova i rere blong fogivim olgeta. (Efes. 4:32) ?I gat wan we yu yu tingbaot? Maet yu tingbaot King Manase. Rabis man ya i mekem plante nogud samting agensem Jehova. Hem i lidim ol man blong wosipim ol giaman god. Hem i kilim ol pikinini blong hem mo sakrefaesem olgeta i go long ol giaman god, mo antap moa hem i putum pija blong wan giaman god insaed long tabu tempol blong Jehova. Baebol i tokbaot hem se: “Hem i mekem ol samting we oli nogud long ae blong Jehova we i bitim mak olgeta, blong mekem hem i kros.” (2 Kron. 33:2-7) Be taem Manase i soemaot se hem i rili tanem tingting blong hem, Jehova i rere blong fogivim hem. Antap long hemia, Jehova i letem hem i kam king bakegen. (2 Kron. 33:12, 13) Maet yu tingbaot King Deved tu we i mekem bigfala sin agensem Jehova, hemia taem i mekem adaltri mo i kilim narafala i ded. Be taem Deved i talemaot sin blong hem mo i soemaot se hem i rili tanem tingting blong hem, Jehova i fogivim hem tu. (2 Saml. 12:9, 10, 13, 14) Yes, yumi save sua se Jehova i wantem tumas blong fogif. Mo olsem we bambae yumi luk, fasin blong Jehova blong fogif, i defren long fasin blong man blong fogif.