?From Wanem Yu Mas “Go Luk Anis”?

WAES King Solomon long Isrel bifo i givim advaes ya se: “Go luk anis.” ?From wanem hem i talem samting ya? ?Wanem samting yumi save lanem long ol anis?

Solomon i gohed i se: “Yu luk fasin blong [anis] mo kam waes. Nating se hem i no gat kapten olsem kapten blong lukaot ol ami, no wan king, hem i stap mekemrere kakae blong hem long hot taem; hem i stap hivimap kakae blong hem long taem blong karem kakae.” (Proveb 6:​6-8) Ol tok ya blong bifo oli soem trutok we ol man blong stadi long ol anamol tede oli faenemaot.

Agur we i raetem proveb ya i soem se ol anis oli “bon wetem waes ya.” (Proveb 30:​24, 25) Yes, waes blong olgeta i no kamaot from we oli stap skelem ol samting be hem i waes we Man blong wokem olgeta samting i putum long olgeta. Eksampel, from waes ya ol anis oli save karem kakae blong olgeta long stret taem.

Ol anis oli wok long nambawan fasin we i no olbaot. Oli wokgud tugeta mo oli tingbaot ol narafala we oli wok wetem olgeta, oli tekem ol narafala we oli kasem sam trabol long bodi blong olgeta no oli hafded i gobak long ples blong slip blong olgeta. Oli stap rere long fyuja mo oli traehad blong finisim ol wok blong olgeta.

Fasin ya we ol anis oli stap folem i soem se ol man oli mas plan long fyuja mo oli mas man blong wok strong. Samting ya i stret long skul, long wok, mo ol wok long saed blong speret. Olsem we ol anis oli kasem blesing from ol hadwok blong olgeta, sem mak God i wantem ol man oli ‘harem gud long olgeta hadwok blong olgeta.’ (Eklesiastis 3:​13, 22; 5:18) Ol trufala Kristin oli bisi blong mekem wan gudfala wok long wan dei olsem ol anis. ‘Olgeta samting we han blong olgeta i save mekem, i gud blong oli mekem wetem paoa blong olgeta’ i no from we wan bos i stap lukluk olgeta, be from stret fasin mo tingting blong mekem gudfala wok, ol man ya oli wantem kasem pei from wok blong olgeta.​—Eklesiastis 9:10; lukluk Proveb 6:​9-11; mo lukluk Taetas 2:​9, 10.

Bambae yumi haremgud sipos yumi “go luk anis” mo mekem samting we yumi lanem long anis. Mo bambae yumi kasem bigfala glad sipos yumi traehad blong mekem wil blong Jeova God, olsem we hem i stap long Baebol.