6. ?Tufala woman we bambae yumi tokbaot long stadi ya tufala i pijarem wanem?

⁶ Naoia bambae yumi luk Ol Proveb japta 9, we i tokbaot tu woman. Wan i pijarem waes mo narawan i pijarem krangke fasin. (Skelem wetem Rom 5:14; Galesia 4:24.) Taem yumi stap gotru long japta ya, tingbaot se wol blong Setan i fulap long enikaen doti fasin blong seks mo ponografi. (Efes. 4:19) Taswe i impoten we yumi gohed blong wokem fasin ya blong fraet long God, mo tanem baksaed long ol doti fasin ya. (Prov. 16:6) Ol save we i stap insaed long japta ya oli save givhan long yumi evriwan, nating se yumi man o woman. Tufala woman we japta ya i tokbaot, tufala i stap invaetem ol man we oli no gat ekspiriens, hemia olgeta we oli “no gat gudfala tingting.” Tufala wanwan i stap talem se: ‘Yu kam long haos blong mi mo yu kakae.’ (Prov. 9:1, 5, 6, 13, 16, 17) Be samting we bambae i hapen long ol man we oli akseptem invetesen blong tufala, i no sem mak.

7. Folem Ol Proveb 9:13-18, ?wanem bambae i hapen long ol man we oli akseptem invetesen blong woman we i stupid? (Yu luk pija tu.)

⁷ Traem luk samting we “woman we i stupid” i talem. (Ridim Ol Proveb 9:13-18.) Hem i stap singaot bigwan i go long ol man we oli no gat gudfala tingting blong oli “kam long ples ya” mo oli mekem lafet. ?Wanem bambae i hapen long ol man ya? Oli no save se “ol man we oli ded finis we oli no moa save mekem wan samting, oli stap long ples ya.” Maet yu tingbaot sam faswan japta blong Ol Proveb we oli tokbaot sem pijatok olsem. Hem i wonem yumi long saed blong “woman nogud” mo “woman we fasin blong hem i nogud.” Mo i talem se: “Haos blong hem i stap draon i godaon long ded.” (Prov. 2:11-19) Ol Proveb 5:3-10 i wonem yumi long saed blong wan narafala “woman nogud” we “leg blong hem i stap godaon long ded.”

8. ?Wanem desisen we yumi wanwan i mas mekem?

⁸ Olgeta we “woman we i stupid” i stap singaotem olgeta, oli gat wan desisen blong mekem. ?Bambae oli akseptem invetesen blong hem o oli sakemaot? Maet yumi tu yumi mas mekem wan desisen olsem. ?Bambae yumi mekem wanem sipos wan man i traem pulum yumi blong mekem enikaen doti fasin blong seks, o wantaem nomo yumi sek long wan pija blong ponografi?