Fasin blong stadi Baebol i save givhan long yu, be samtaem i no isi blong stadi. Maet yu no sua sipos yu save gohed blong stadi. ?From wanem i impoten blong traehad blong stadi? ?Wanem i save halpem yu blong gohed nating se i gat sam jalens?

1. ?From wanem i impoten blong stadi Baebol?

“Tok blong God i laef i stap mo paoa blong hem i stap wok.” (Hibru 4:12) Baebol i impoten tumas from we i soemaot ol tingting mo filing we God i gat long yu. Hem i halpem yu blong kasem trufala waes, hop, mo save. Antap moa, Baebol i halpem yu blong kam fren blong Jehova. Taem yu stadi long Baebol, yu letem paoa blong hem i mekem laef blong yu i kam gud moa.

2. ?From wanem i impoten blong save ol nambawan trutok blong Baebol?

Ol trutok blong Baebol oli olsem ol sas samting. Taswe, Baebol i enkarejem yumi blong ‘pemaot trutok mo yumi no mas salemaot.’ (Ol Proveb 23:23) Sipos yumi tinghae long trutok blong Baebol, bambae yumi traehad blong stadi, nating se yumi fesem sam jalens.—Ridim Ol Proveb 2:4, 5.

3. ?Olsem wanem Jehova i save halpem yu blong gohed long stadi?

Jehova i Krieta mo i Fren blong yu, taswe hem i wantem se yu save hem. Hem i save halpem yu blong, wantem mo gat paoa “blong mekem olgeta samting we hem i laekem.” (Ridim Filipae 2:13.) Taswe, sipos yu nidim strong tingting blong stadi mo folem samting we yu lanem, hem i save halpem yu. Sipos yu nidim paoa blong winim ol jalens o fasin agens, hem i save givim long yu. I gud yu prea oltaem long Jehova blong i halpem yu blong gohed long stadi.—1 Tesalonaeka 5:17.

DIGIM MOA

4. Tinghae long Baebol stadi blong yu

Samtaem laef i bisi, mekem se yumi harem se yumi nogat taem blong stadi. ?Wanem i save givhan? Ridim Filipae 1:10, mo tokbaot ol kwestin ya:

• ?Yu ting se wanem ya “ol samting we oli moa impoten” long laef blong yu?

• ?Wanem i soem se yu tinghae long Baebol stadi blong yu?

1. Sipos yu fulumap sanbij long wan baket, afta yu putum sam ston i go, bambae evri ston i no save go

2. Sipos yu putum ol ston fastaem, bambae yu gat plante spes blong fulumap sanbij. Sem mak sipos yu putum “ol samting we oli moa impoten” fastaem long laef blong yu, bambae yu finisim ol impoten samting ya mo yu gat taem blong mekem ol narafala samting

Baebol stadi i fulumap nid blong yumi long saed blong spirit, hemia nid ya blong save God mo wosipim hem. Ridim Matiu 5:3, mo tokbaot kwestin ya:

• ?Bambae yu kasem wanem sipos yu tinghae long Baebol stadi?

5. Gohed blong stadi nating se narafala i agensem yu

VIDEO: Gudfala Samting We i Kamaot From Hem i Gohed (5:22)

• Long video ya, ?ol fren mo famle blong Francesco oli mekem wanem taem oli save se hem i stadi?

• ?Wanem gudfala samting i kamaot taem hem i gohed long stadi?

Ridim 2 Timoti 2:24, 25, mo tokbaot ol kwestin ya:

• ?Wanem tingting blong ol famle mo ol fren blong yu taem yu stadi Baebol?

• Folem ol vas ya, ?bambae yu mekem wanem taem narafala i no glad se yu stadi Baebol? ?From wanem bambae yu mekem olsem?

6. Dipen long Jehova blong i halpem yu

VIDEO: Jehova i Halpem Yumi Blong Jenisim Laef (3:56)

• Long video ya, ?Jim i jenisim wanem long laef blong hem blong mekem Jehova i glad?

• ?Yu yu laekem wanem long eksampol blong hem?

Ridim Hibru 11:6, mo tokbaot ol kwestin ya:

• ?Jehova bambae i mekem wanem long olgeta we “oli stap traehad blong faenem hem” o mekem hem i glad?

• Folem vas ya, ?wanem filing blong Jehova taem hem i luk we yu stap traehad blong stadi?

SAMARI

Nating se i no isi oltaem blong stadi Baebol, be hemia i save halpem yu blong enjoem laef olwe. Gohed blong dipen long Jehova, nao bambae hem i givim pei long yu.

Tingtingbak

• ?From wanem ol trutok blong Baebol oli impoten long yu?

• ?Olsem wanem blong mekem “ol samting we oli moa impoten”?

• ?From wanem yu mas askem Jehova blong i halpem yu, blong yu gohed blong stadi?

FAENEMAOT

Luk fo rod we i givhan long plante man blong yusum gud taem blong olgeta.

“How to Invest Your Time Wisely” (Wekap!, Februari 2014)

Luk olsem wanem Jehova i halpem wan woman we hasban blong hem i no kasem save ol traehad we hem i stap mekem.

Jehova i Givim Paoa Blong Winim Ol Traem (5:05)

Luk olsem wanem wan man i kasem gudfala samting from waef blong hem i gohed blong stadi.

Mi Jekem Trutok (6:30)

Samtaem ol man oli talem se ol Witnes blong Jehova oli stap seraotem ol famle. ?Be hemia i tru?

“?Ol Witnes Blong Jehova Oli Mekem Famle i Seraot No i Joengud?” (Web atikol)

Yumi evriwan i gat ol desisen blong mekem. Plante long ol desisen ya oli save afektem laef blong yumi mo frensip blong yumi wetem Jehova. Eksampol, maet yumi mas mekem desisen long saed blong ples we bambae yumi stap long hem, wok we bambae yumi mekem, o bambae yumi mared o nogat. Taem yumi mekem ol gudfala desisen, bambae yumi gat wan hapi laef mo yumi mekem Jehova i glad.

1. ?Olsem wanem yu save yusum Baebol blong mekem wan gudfala desisen?

Bifo we yu mekem wan desisen, prea long Jehova blong i halpem yu, mo ridim Baebol blong faenemaot tingting blong hem. (Ridim Ol Proveb 2:3-6.) Samtaem Jehova i givim klia loa long samting we yumi wantem mekem. Sipos i olsem, beswan desisen i blong obei long loa ya.

?Be olsem wanem sipos i nogat wan klia loa? Jehova bambae i lidim yu “long rod we [yu] sud folem.” (Aesea 48:17) ?Olsem wanem hem i mekem? Maet i gat ol rul we oli save lidim yu. Ol rul we i stap long Baebol oli ol stamba trutok we i soemaot ol tingting mo filing blong God. Mo plante taem wan stori long Baebol tu i save givhan long yumi blong save tingting blong God. Taem yumi save ol filing blong Jehova, bambae yumi mekem ol desisen we i mekem hem i glad.

2. ?Bifo we yu mekem wan desisen, yu mas tingbaot wanem?

Baebol i talem se: “Man we i tingting gud, hem i skelem gud wanwan step blong hem.” (Ol Proveb 14:15) Hemia i min se yumi mas tekem taem blong tingting gud bifo we yumi mekem wan desisen. Taem yu stap tingbaot weswan desisen blong mekem, i gud yu askem yu wan se: ‘?Wanem rul blong Baebol i stret long samting ya? ?Weswan bambae i mekem se mi gat pis long tingting? ?Olsem wanem desisen ya bambae i afektem ol narafala? Mo samting we i moa impoten se, ?Jehova bambae i glad long desisen ya?’—Dutronome 32:29.

Jehova i gat raet blong talem wanem i gud mo wanem i nogud. Taem yumi savegud ol loa mo ol rul blong hem, mo yumi gat strong tingting blong folem olgeta, yumi stap trenem gud tingting we i jajem yumi. Tingting ya bambae i givhan long yumi blong save samting we i stret mo samting we i no stret. (Rom 2:14, 15) Nao bambae i givhan long yumi blong mekem ol gudfala desisen.

DIGIM MOA

3. Letem Baebol i lidim yu

VIDEO: Letem Ol Rul Long Baebol Oli Lidim Yu (5:54)

• ?Wanem nambawan presen we Jehova i givim long yumi?

• ?From wanem Jehova i letem yumi fri blong jus?

• ?Hem i givim wanem long yumi blong halpem yumi blong mekem ol gudfala desisen?

Blong luk wan rul blong Baebol, ridim Efesas 5:15, 16. Biaen tokbaot olsem wanem yu save “yusum gud taem” blong . . .

• ridim Baebol evri dei.

• kam wan gudfala hasban o waef, papa, mama, o pikinini.

• go long ol kongregesen miting.

4. Trenem tingting we i jajem yu, blong mekem ol gudfala desisen

VIDEO: “Holemtaet Tingting We i Klin” (5:13)

• Long video ya, ?sista ya i mekem wanem blong trenem tingting we i jajem hem mo blong mekem wan desisen we i mekem Jehova i glad?

?From wanem i no stret blong askem narafala blong i mekem desisen blong yumi? Ridim Hibru 5:14, mo tokbaot ol kwestin ya:

• Maet yumi harem se i isi moa blong askem narafala blong i mekem desisen blong yumi, ?be yumi mas kam naf blong mekem wanem?

• ?Wanem i save halpem yu blong trenem tingting we i jajem yu mo mekem ol gudfala desisen?

5. Respektem tingting blong ol narafala

Desisen blong wanwan man bambae i defren. ?Olsem wanem yumi save soemaot se yumi respektem tingting blong narafala? Bae yumi luk tu situesen:

Situesen 1: Wan sista we i laekem blong flasem hem, i muv i go long wan kongregesen we ol sista oli harem i narakaen taem wan i flasem hem tumas.

Ridim Rom 15:1 mo 1 Korin 10:23, 24, mo tokbaot ol kwestin ya:

• Folem ol vas ya, ?sista ya save i mekem wanem? ?Bambae yu yu mekem wanem sipos yu stap wetem wan we tingting blong hem i defren long tingting blong yu?

Situesen 2: Wan brata i save we Baebol i no blokem fasin ya blong dring alkol, be hem i jusum blong no dring alkol. Oli invaetem hem blong joen wetem ol narafala mo hem i luk we sam brata oli stap dring alkol.

Ridim Prija 7:16 mo Rom 14:1, 10, mo tokbaot ol kwestin ya:

• Folem ol vas ya, ?brata ya save i mekem wanem? ?Bambae yu mekem wanem sipos yu stap wetem wan we tingting blong hem i defren long tingting blong yu?

?Wanem i save lidim yu blong mekem ol gudfala desisen?

1. Askem Jehova blong i halpem yu blong mekem wan desisen.—Jemes 1:5.

2. Mekem risej long Baebol mo ol buk we oli stanap long Baebol, blong faenem ol rul we yu save folem. Yu save storian tu wetem ol Kristin we oli gat moa ekspiriens.

3. Tingbaot olsem wanem desisen blong yu bambae i afektem tingting blong yu mo tingting blong ol narafala.

SAMARI

Yumi mekem ol gudfala desisen taem yumi faenemaot sipos ol desisen blong yumi i mekem Jehova i glad mo i halpem narafala.

Tingtingbak

• ?Olsem wanem blong mekem ol desisen we i mekem Jehova i glad?

• ?Olsem wanem blong trenem tingting we i jajem yu?

• ?Olsem wanem yu save soemaot se yu respektem tingting blong ol narafala?

FAENEMAOT

?Olsem wanem yu save mekem ol desisen we i halpem yu blong frengud moa wetem God?

“Yumi Mas Mekem Ol Desisen We Oli Givim Ona Long God” (Wajtaoa, 1 Eprel 2011)

Lanem moa olsem wanem Jehova i stap givim advaes long yumi.

Jehova i Lidim Ol Man Blong Hem (9:50)

Luk samting we i givhan long wan man blong i mekem wan desisen we i had.

Jehova i Promes Se Evri Samting Bae i Gud (5:46)

Lanem olsem wanem yumi save mekem Jehova i glad, taem hem i no talem klia samting blong mekem.

“?Yu Yu Nidim We Baebol i Talem Wan Loa Long Evri Samting?” (Wajtaoa, 1 Disemba 2003)