?Tok Blong Yu i Stikim Narafala No i Mekem Hem i Haremgud?

LONG taem blong yumi we i strong tumas, yumi no sapraes we “tingting blong plante man i kam nogud” no “i foldaon olgeta.” (Ol Sam 34:18) Taswe aposol Pol i talem se oltaem yumi mas ‘toktok long fasin we i leftemap tingting blong ol sol we tingting blong olgeta i foldaon,’ mo yumi mas ‘sapotem olgeta we oli no gat paoa.’ (1 Tesalonaeka 5:​14) ?Be olsem wanem sipos wan narafala man i spolem filing blong yumi no hem i mekem bigfala sin? Maet long taem ya yumi ting se yumi gat raet blong stretem man ya long strong fasin. Be lukaot. Nating se ol advaes we yumi givim oli tru, be oli save spolem narafala sipos oli strong tumas. Proveb 12:18 i talem se: “I gat man we i stap tok we i no tingtinggud fastaem. Tok blong hem i olsem naef blong faet we i stikim man.”

Taswe, taem yumi tok blong stretem no eksplenem wan mastik, i impoten blong rimemba las haf blong Proveb 12:18: “Wan waesman i yusum tang blong hem blong mekem man i haremgud bakegen.” Oltaem askem long yu wan: ‘?Sipos narafala i mas stretem mi, bambae mi mi wantem se hem i tok long mi long wanem fasin?’ Bighaf blong yumi oli rere moa blong lesin long tok we i leftemap tingting blong yumi i bitim ol strong tok blong agensem yumi. Taswe yu mas talem plante tok blong presem man we yu stretem. Plante taem, fasin ya bambae i pusum man we i mekem wan mastik blong jenisim fasin blong hem, mo ating bambae hem i gat moa tangkyu from help we hem i kasem.

!I impoten we yumi joenem ol tok blong yumi wetem kwaet fasin! Ol tok we oli mekem man i haremgud bakegen, bambae oli givim sem filing long hem we man ya blong raetem Ol Sam i gat taem i talem se: “Sipos wan stret man i kilim mi, fasin ya i kaengud long mi. Mo sipos hem i tok strong blong stretem mi, fasin ya i gud tumas olsem oel long hed, we bambae hed blong mi i no save blokem.”​—Ol Sam 141:​5, NW.