Lukaot Sas Samting Ya We i Haed

LONG 1848 oli faenem gol long ples blong Katem Plang we i blong man ya Sutter long Kalifonia, Amerika. Long 1849 plante taosen man oli hivap long ples ya wetem hop blong kam rijman, mo hemia wan taem long histri blong Amerika we ol man oli hareap blong lukaot gol. Wan yia i pas, ale taon we i stap kolosap moa long solwora, San Fransisko, i no moa wan smol taon be i kam wan bigfala taon blong 25,000 man. Tingting blong kasem ol sas samting i stap olsem wan paoa blong pulum ol man.

King Solomon blong Isrel bifo i savegud olsem wanem ol man oli hadwok blong digim ol sas samting we oli stap haed long graon, mo hem i tokbaot samting ya taem hem i raetem se: “Mo tu, yu mas gohed blong singaot long dip save, mo yu mas singaot strong long fasin luksave, blong oli kam long yu. Yu mas stap lukaot samting ya olsem selva, yu mas traem lukaot olgeta oltaem we yu no spel, olsem ol sas samting we oli haed. Sipos yu mekem olsem, bambae yu kasem save long fasin fraet gud long Jeova, mo bambae yu faenem save blong God.”​—Proveb 2:​3-5.

Yu save mekem plante samting wetem selva mo gol, be yu save mekem moa samting wetem dip save mo fasin luksave. Tufala samting ya bambae i givhan long yu blong mekem ol stret disisen, winim ol problem, gudfala mared, mo blong faenem fasin glad. (Proveb 2:​11, 12) Mo tu, trufala save mo waes fasin bambae i givhan long yu blong save Man ya we i Wokem yu, kasem save long ol plan blong hem, mo blong obei mo mekem hem i glad. Gol i no save givim wan long ol samting ya.

Ol tok ya blong Baebol oli tru se: “Waes i save lukaotgud long yumi olsem we mane i save lukaotgud long yumi, be hemia samting we i save kamaot from dip save: se waes i sevem laef blong man ya we i kasem waes.” (Eklesiastis 7:​12, New International Version) Plante man oli wantem blong kam rijman kwiktaem, be i waes moa blong openem Baebol mo lukaot fasin luksave, dip save, save mo waes fasin we oli ol trufala sas samting.