Japta 1

!Yu Save Haremgud Long Fyuja!

1, 2. ?Man we i Wokem yu, i wantem se yu gat wanem kaen laef?

WANwe yu laekem hem tumas, i putum han blong hem i goraon long yu wetem lav. Yu laf bigwan wetem ol gudfala fren blong yu, taem yufala i stap kakaegud wanples. Yu haremgud blong lukluk ol pikinini blong yu, taem oli stap pleplei long glad fasin. Ol samting olsemia, oli gudfala samting long laef. Be laef blong plante man i no olsem. Oli stap kasem plante bigfala problem oltaem. Sipos yu tu yu stap kasem plante problem, yu no mas letem tingting blong yu i foldaon.

² God i wantem we yu haremgud long laef blong olwe, long wan naesfala ples we i gat ol nambawan samting long hem. Hemia i no wan drim nomo, from we God i wantem soem long yu, rod blong kasem wan hapi fyuja. Rod ya, hemia save.

3. ?Wanem save ya we i olsem rod blong faenem hapi laef, mo from wanem yumi save sua se God i save givim save ya?

³ Yumi stap tokbaot wan spesel kaen save, we i hae moa long ol save blong man. Hemia ‘stret save blong God.’ (Proveb 2:5) Kolosap 2,000 yia bifo, wan man blong raetem Baebol i talem se: “Evri haos oli gat man blong wokem olgeta, be God i wokem olgeta samting we i stap.” (Hibrus 3:4) !Traem tingbaot bigfala save blong Man ya we i Wokem olgeta samting! Baebol i talem se God i stap kaontem mo putum nem long olgeta sta. !Yumi sapraes bigwan long samting ya, from we i gat plante handred bilyan sta long galaksia blong yumi nomo! !Mo ol man blong stadi long ol sta oli talem se i gat samwe wan handred bilyan narafala galaksi tu! (Ol Sam 147:4) God i save tu, olgeta samting long saed blong yumi. Taswe, ?hu bakegen i save givim ol ansa we oli moagud long ol impoten kwestin blong laef?—Matyu 10:30.

4. ?From wanem yumi save se God i mas givim advaes blong lidim yumi, mo wanem buk i givim advaes ya we yumi nidim?

⁴ Tingbaot tu man we tufala i stap fiksimap trak blong tufala. Wan man i kam kros, ale hem i sakem ol tul blong hem. Narafala man i stap kwaet, mo sloslou hem i fiksimap problem. Ale, hem i tanem ki, nao hem i glad taem enjin i stat mo i rongud. I no hadwok long yu blong save, weswan long tufala man ya i gat wan buk blong advaes, we kampani blong mekem trak i givim. Taswe, ?i stret blong ting se God tu bambae i givim advaes blong lidim laef blong yumi? Maet yu save finis we, Baebol i talem se hem nao, hem i buk we i givim advaes ya. Man we i Wokem yumi i givim buk ya Baebol, we i fulap long advaes blong lidim yumi. Hem i blong givimaot save blong God.—2 Timote 3:16.

5. ?Save blong Baebol i gud olsem wanem?

⁵ !Sipos i tru se Baebol i buk blong advaes we God i givim, tingbaot ol gudgudfala save we i mas stap insaed long buk ya! Proveb 2:1-5 i talem long yumi blong lukaot fasin waes, traehad blong faenem olsem we yumi digim graon blong faenem wan sas samting we i stap haed. Be yumi no mas traem faenem fasin waes long ol save blong man. Yumi faenem insaed long prapa Tok blong God. Sipos yumi lukaot fasin waes long Baebol, bambae yumi ‘faenem stret save blong God.’ God i save se yumi no naf blong kasem ol mak we oli hae tumas, mo hem i save ol nid blong yumi, taswe hem i givim advaes we i save givhan long yumi, blong gat wan hapi laef we pis i stap long hem. (Ol Sam 103:14; Aesea 48:17) Antap moa, save blong God i givim gud nyus we i mekem yumi glad.

!LAEF WE I NO SAVE FINIS!

6. ?Jisas Kraes i mekem wanem promes long saed blong save blong God?

⁶ Long ol tok we i klia nomo, Jisas Kraes, man ya we ol man oli savegud hem long histri, i eksplenem impoten poen ya long saed long save blong God. Hem i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) !Tingbaot—save we i lidim man blong kasem laef we i no save finis!

7. ?Olsem wanem yumi save se God i no wantem we yumi ded?

⁷ Yu no mas kwik blong sakem tingting ya long saed blong laef we i no save finis, olsem we hem i wan drim nomo. I moagud blong tingbaot ol fasin we God i wokem long bodi blong man. Hem i wokem bodi long nambawan fasin, blong man i save testem kakae, harem ol noes, lukluk, smelem mo filim ol samting. !I gat plante samting long wol ya we oli mekem yumi haremgud tumas—kakae we i tesgud, naesfala singsing blong ol pijin, gudfala smel blong ol flaoa, ol naesfala ples we yumi save lukluk, ol nambawan fren! Mo yumi sapraes long bren blong yumi we i bitim ol nambawan kompyuta, from we hem i mekem se yumi save long ol samting ya mo yumi haremgud long olgeta. ?Yu ting se Man we i wokem yumi i wantem se yumi ded ale yumi no moa save haremgud long ol samting ya? ?Yu no ting se i moa stret we hem i wantem blong yumi gat wan hapi laef mo yumi haremgud long laef blong olwe? Hemia nao samting we save blong God i save lidim yu blong kasem.

LAEF LONG PARADAES

8. ?Baebol i talem wanem long saed blong fyuja blong ol man?

⁸ Ol samting we Baebol i talem long saed blong fyuja blong wol mo ol man, yumi save talem long wan wod nomo: !Paradaes! Jisas Kraes i tokbaot samting ya wetem wan man we kolosap hem i ded, se: ‘Bambae yu yu stap wetem mi long Paradaes.’ (Luk 23:43) Tok ya Paradaes i mas mekem man ya i tingbaot hapi laef blong faswan papa mama blong yumi, Adam mo Iv. Taem God i wokem tufala, tufala i stretgud olgeta, mo tufala i stap long wan naesfala ples olsem wan garen. Man ya we i Wokem tufala, hem i wokem plan blong garen ya mo i planem kakae long hem. Nem blong ples ya se, garen blong Iden. Nem ya i stret nomo, from i minim fasin blong haremgud.

9. ?Laef i olsem wanem long faswan Paradaes?

⁹ !Garen ya i nambawan! Hem i wan trufala paradaes. Sam long ol naes tri blong hem oli karem frut we i tesgud. Taem Adam mo Iv tufala i stap faenemaot evri samting long saed blong ples blong tufala, mo tufala i stap dring long gudfala wora mo kakae ol frut blong ol tri long garen ya, i no gat wan samting nating we i save mekem tufala i wari mo fraet. Ol anamol tu oli no save mekem tufala i fraet, from we God i putum man ya wetem woman blong hem, blong tufala i lukaotgud long olgeta anamol long kaen fasin. Mo tu, bodi blong faswan man mo woman i strong. Sipos tufala i obei long God oltaem, wan hapi fyuja we i no save finis i stap fored long tufala. God i givim wok long tufala, we tufala i save haremgud long hem. Wok ya i blong lukaotgud long nambawan ples blong tufala, Paradaes ya. God i givim oda long Adam mo Iv blong ‘gat plante pikinini blong bambae oli save go stap long olgeta ples long wol, mo oli save mekem evri samting long wol ya, oli stap aninit long han blong olgeta.’ Adam mo Iv wetem ol pikinini blong tufala, oli mas mekem Paradaes ya i kam bigwan gogo ful wol i kam wan naesfala ples, we ol man oli save haremgud long hem.—Jenesis 1:28.

10. ?Taem Jisas i tokbaot Paradaes, hem i minim wanem?

¹⁰ Be, taem Jisas i tokbaot Paradaes, hem i no stap pulum wan man we kolosap hem i ded, blong tingbaot samting we i kamaot longtaem bifo nomo. No gat. !Jisas i stap tokbaot fyuja! Hem i save se ples blong yumi, ful wol, bambae i kam paradaes. Olsem nao, God bambae i mekem faswan tingting blong hem long saed blong ol man mo wol ya, i kamtru. (Aesea 55:10, 11) !Yes, Paradaes bambae i kamtru bakegen! ?Bambae Paradaes ya i olsem wanem? Tok blong God, Tabu Baebol, i givim ansa.

LAEF LONG PARADAES BAKEGEN

11. ?Taem Paradaes i kamtru bakegen, wanem bambae i hapen long sik, fasin blong kam olfala, mo ded?

¹¹ Bambae ol man oli no moa sik, no moa kam olfala, no moa ded. “Long taem ya, ae blong ol blaenman bambae i open, mo sora blong ol man we oli no save harem bambae i no moa fas. Long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad.” (Aesea 35:5, 6) “God bambae i kampani wetem [ol man]. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

12. ?From wanem yumi save sua se bambae i no moa gat fasin blong brekem loa, kilim man mo ol rabis fasin, long Paradaes we i kamtru long fyuja?

¹² Fasin blong brekem loa, kilim man, mo ol fasin nogud bambae oli finis blong olwe. “Ol man nogud, Hae God bambae i ronemaot olgeta. Bambae i no longtaem, ol man nogud oli lus . . . bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:9-11) ‘Ol man nogud, God bambae i kilimaot olgeta long wol. Mo ol man we oli no gat bilif, bambae Hem i sakemaot olgeta.’—Proveb 2:22.

13. ?Olsem wanem bambae God i putum pis?

¹³ Bambae i gat pis long olgeta ples long wol. “Hem [God] i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia.” (Ol Sam 46:9) ‘Bambae stret fasin i kam bigwan mo i gat pis oltaem, olsem we mun i stap oltaem.’—Ol Sam 72:7.

14, 15. ?Baebol i talem wanem long saed blong haos, wok mo kakae blong ol man, taem Paradaes i kamtru bakegen?

¹⁴ Bambae ol man oli gat prapa haos blong olgeta mo bambae oli haremgud long wok blong olgeta. ‘Bambae ol man oli wokem ol haos, mo bambae oli stap long ol haos ya . . . Bambae oli no wokem haos blong narafala man i stap long hem. Mo bambae oli no planem garen blong narafala man i kakae frut blong hem. From we laef blong olgeta bambae i olsem laef blong wan tri. Mo olgeta man ya we mi jusumaot, bambae oli yusumgud ol samting ya we han blong olgeta i wokem. Bambae oli no wok blong nating nomo, mo bambae oli no karem pikinini blong kasem trabol from.’—Aesea 65:21-23.

¹⁵ Bambae i gat fulap kakae we i gud long bodi. “Bambae i gat plante kakae long ples ya, we ol hil oli fulapgud long ol kakae.” (Ol Sam 72:16) “Graon ya blong yumi i givim plante kakae long yumi. God ya we i God blong yumi, hem i blesemgud yumi.”—Ol Sam 67:6.

16. ?From wanem laef long Paradaes bambae i gud tumas?

¹⁶ Bambae ol man oli haremgud tumas long laef we i no save finis long paradaes long wol ya. “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) ‘Draeples mo ples we i no gat wora bambae oli haremgud, mo drae flat ples bambae i glad, mo bambae i gat flaoa olsem gras ya safron.’—Aesea 35:1.

SAVE MO FYUJA BLONG YU

17. (a) ?Sipos yu wantem laef long Paradaes, yu mas mekem wanem? (b) ?Olsem wanem yumi save se bambae God i mekem ol bigfala jenis long wol ya?

¹⁷ Sipos yu wantem blong laef long Paradaes, yu no mas letem wan samting i blokem yu, blong yu no kasem save ya blong God. Hem i laekem ol man tumas, mo bambae hem i jenisim ol samting we hem i mas jenisim blong mekem wol ya i kam paradaes. Tingbaot, sipos yu yu gat naf paoa blong finisim ol hadtaem mo fasin we i no stret, we oli fulap long wol ya, ?bambae yu mekem olsem? Yes. ?Yumi save ting se bambae God i no wantem blong mekem olsemia tu? Long ol klia tok, Baebol i tokbaot taem ya we bambae God i finisim ol trabol mo rabis fasin blong wol ya. Mo bambae hem i putumap wan fasin blong rul we i stret mo i gud. (Daniel 2:44) Be Baebol i no jes talem ol samting ya nomo. Baebol i soem long yumi wanem we yumi mas mekem blong stap laef gogo nyufala wol ya we God i promes long yumi, i kamtru.—2 Pita 3:13; 1 Jon 2:17.

18. ?Olsem wanem save blong God i save givhan long yu naoia?

¹⁸ Naoia tu, save blong God i save givhan bigwan long yu. Ol ansa long ol dip kwestin long saed blong laef we oli mekem man i wari, oli stap long Baebol. Sipos yu letem Baebol i lidim yu, bambae hem i givhan long yu blong fren wetem God. !Wan nambawan jans ya! Mo samting ya bambae i mekem se yu save haremgud long pis ya we God nomo i save givim. (Rom 15:13, 33) Taem yu stat blong kasem impoten save ya, yu stat long wan wok we i moa impoten, mo i save mekem yu haremgud moa, bitim ol narafala wok long laef. Bambae yu no save sore we yu bin kasem save ya blong God, we bambae i lidim yu long laef blong olwe.

19. ?Bambae yumi tokbaot wanem kwestin long japta we i kam biaen?

¹⁹ Yumi tokbaot finis, se Baebol nao i buk ya we save blong God i stap long hem. Be, ?olsem wanem yumi save se Baebol i no wan buk we i kamaot long waes blong man nomo, be hem i hae moa? Bambae yumi tokbaot kwestin ya long japta we i kam biaen.

[Futnot]

JEKEM SAVE BLONG YU

?From wanem save blong God i save lidim yu blong kasem laef we i hapi olwe?

?Bambae laef i olsem wanem long Paradaes wol we i kolosap?

?Sipos yu kasem save long saed blong God naoia, olsem wanem samting ya bambae i givhan long yu?