Pulum ‘Wora i Kamaot Long Dip Ples’

WAN proveb blong Baebol i talem se: “Advaes we i stap long hat blong man i olsem dip wora, be man we i gat fasin luksave, hem nao i save pulum wora ya i kam antap.” (Proveb 20:5) Long taem blong Baebol, i had blong kasem wora. Long plante kantri tede i moa isi. Jisas i bin storeyan wetem wan woman Sameria taem woman ya i stap pulum wora long wel blong Jekob. !Wel ya i godaon kasem 23 mita!​—Jon 4:​5-​15.

Olsem Proveb 20:5 i soem, yumi nidim fasin luksave blong pulum wan man blong talemaot ol dip tingting mo filing long hat blong hem. Samting ya i olsem hadwok we yumi mas mekem blong pulum wora long wan wel. Hemia i tru long saed blong plante samting long laef. Eksampel, ating yu save sam man we oli bin kasem fulap save long laef blong olgeta mo oli gat gudhan blong mekem plante samting. Nao sipos oli no wantem givim advaes, maet yu nao yu mas pulum olgeta blong givim advaes. Sipos yu soem intres long olgeta, askem ol kwestin, mo yusum kaengud fasin blong traem faenemaot plante samting, i olsem we yu stap putum baket blong yu i godaon long wan wel we i dip mo i fulap long waes.

Advaes ya blong Proveb 20:5 i tru insaed long famle tu. Plante waef oli talem se: “!Hasban blong mi i neva talemaot filing blong hem long mi!” Maet hasban i talem se: “!Sam samtaem, waef blong mi i jes satem maot blong hem, i no moa toktok!” Long ol taem olsemia, ol man mo woman oli nidim fasin luksave blong pulum hasban no waef blong olgeta blong talemaot ol tingting we oli stap dip insaed long hat blong olgeta. Oli save askem ol kwestin long kaengud fasin (olsem, ?I bin gat sam problem i kamaot tede? ?Wanem samting i bin hapen? ?Olsem wanem mi save givhan long yu?). Plante taem, samting ya i save statem wan storeyan we i lidim tufala blong talemaot ol samting we i stap long hat blong tufala. Fasin luksave olsem bambae i mekem mared blong tufala i stanap strong, mo bambae i mekem tufala evriwan i haremgud.