Long taem blong givim advaes i impoten blong jusum stret tok. Waes man Solomon i talem se: ‘Sipos yu talemaot wan tingting blong yu, we yu mekem i klia gud long ol man, hemia i olsem we yu wokem apol long gol, mo yu putum olgeta long wan plet silva.’ (Proveb 25:11) Maet Solomon i stap tingbaot wan naesfala silva plet we pija blong sam apol we oli wokem wetem gol i stap long hem. !Samting ya i naes we i naes blong lukluk, mo ating yu yu glad blong kasem wan presen olsemia! Long sem fasin, sipos yu jusum ol tok we oli stret bambae yu save pulum man we yu traem givhan long hem, blong i lesin long yu.​—Prija 12:​9, 10.

Olsem Solomon i bin talem, wan advaes i mas “kamaot long stret taem blong hem.” Blong karem gudfala frut i impoten we advaes i kamaot long stret taem. Wan man we i no moa hanggri hem i no save haremgud long wan kakae. Maet hem i kakae bigwan finis, no maet hem i sik. I no stret mo i no waes tu, blong fosem wan man blong kakae sipos hem i no wantem kakae.