• “Bigfala Wok We Man i Mas Mekem”
    Wajtaoa—1997 | 15 Februari

    • 13. (a) ?Olsem wanem Eklesiastis 9:​4, 5 i halpem yumi blong gat stret tingting long fasin blong ronem haenem mo paoa? (b) Sipos i gat laef ya nomo we yumi stap long hem naoia, ?wanem sam trutok we yumi mas fesem? (Lukluk futnot.)

      13 ?Long en blong bisnes ya, haenem mo paoa olsem i karem wanem samting i kam long man ya? Taem wan laen blong man i stap lus mo wan narafala laen blong man i stap kam, ol man we oli impoten mo oli gat paoa, olgeta tu oli lus mo ol man oli fogetem olgeta. Samting ya i tru long saed blong ol man blong bildim haos, ol man blong plei myusek mo blong mekem ol narafala wok olsemia, ol man we oli wok blong traem mekem laef blong ol man i kamgud moa, mo plante lida blong politik mo ami. ?Yu yu save hamas man we oli bin mekem olkaen wok olsem, we oli bin stap laef long ol yia 1700 mo 1800? Solomon i tru nomo taem hem i talem se: “Wan dog we i laef i gud moa i bitim wan laeon we i ded. Ol man we oli laef oli save se bambae oli mas ded. Be ol dedman oli no save wan samting nating, . . . ol man oli fogetem olgeta finis.” (Eklesiastis 9:​4, 5) Mo sipos i gat laef ya nomo we yumi stap long hem naoia, ale, fasin ya blong traem kasem haenem mo paoa i rili blong nating nomo.a

  • “Bigfala Wok We Man i Mas Mekem”
    Wajtaoa—1997 | 15 Februari

    • a Wan taem bifo, Wajtaoa i bin talem waes tok ya, se: “Yumi no mas westem laef blong yumi blong mekem ol samting we oli blong nating nomo . . . Sipos i gat laef ya nomo, ale i minim se i no gat wan samting we i impoten. Laef ya i olsem wan bol we yumi sakem i go antap, nao i foldaon kwiktaem long graon bakegen. Laef i olsem wan sado we i ronwe kwiktaem, wan flaoa we i stap kam drae, mo wan smol gras we man i brekem nao i ded. . . . Taem yumi tingbaot sot laef blong yumi long medel blong olgeta yia bifo mo long fyuja, laef ya i olsem wan smosmol pis doti we kolosap yumi no save luk. Taem yumi skelem laef blong yumi wetem olgeta yia we oli pas mo we oli stap kam, hem i smol moa i bitim wan drop wora long wan bigfala reva. Yes, tok blong [Solomon] i tru nomo, taem hem i luklukgud long ol wari mo wok long laef blong man, nao i talemaot se oli blong nating nomo. Laef blong yumi i sot tumas, i olsem se i moagud we yumi no bon. Yumi jes wan nomo long olgeta bilyan man we oli bon mo oli lus bakegen, mo i gat smol man nomo we oli save se yumi bin stap. Tingting ya i no minim se yumi gat nogud tingting long saed blong laef, mo i no blong mekem tingting blong yumi i hevi tumas, i foldaon, mo i harem nogud. No gat. Hemia wan trutok nomo, wan trufala samting we yumi mas fesem, wan tingting we i laenap wetem laef blong yumi, sipos i gat laef ya nomo.”​—Ogis 1, 1957, pej 472.