Olsem Ol Lokis Nomo

YU YU bin wokbaot finis long ol gras long drae taem mo yu luk ol lokis oli stap jyam aot long rod blong yu? I luk olsem oli stap long evri ples, nating se yu no tingbaot olgeta tumas. Mo, i luk olsem we oli no save spolem man mo oli nating nomo.

Be, from we ol lokis oli olsem nating nomo, samting ya i mekem se oli wan stret pija blong man. Nating se sam haeman oli save tingbaot olgeta se oli impoten tumas, Hemia we i Wokem yumi i no ting olsem. Profet blong hem Aesea i talem se: “I gat wan Man i stap antap long raon wol ya, mo hem i luk ol man we oli stap long hem olsem we oli lokis nomo.”​—Aesea 40:22.

Haenem, paoa, mo waes blong Jeova God i leftemap hem i go antap bitim ol man, olsem we man i hae moa long lokis long saed blong waes mo paoa. Be, nambawan fasin blong God hemia lav. Mo bigfala lav blong hem i pulum hem blong i luksave yumi, givhan long yumi, mo sevem yumi​—sipos yumi laekem hem mo yumi obei long hem. Jeova i stap mekem i gud long yumi, nating se yumi olsem nating nomo, yumi olsem ol lokis nomo. Man blong raetem Ol Sam i talem se: “I no gat man we i olsem Hae God ya we i God blong yumi. Hem i king, i stap sidaon long bigfala jea blong hem long ples blong hem antap. Be hem i glad blong lukluk i kam daon long skae mo graon. Hem i stap leftemap ol puaman, i stap tekemaot olgeta long ol trabol blong olgeta.”​—Ol Sam 113:​5-7.

Olsem Sam ya i eksplenem, Jeova i keagud blong givhan long ol man we oli no gat nem. Yes hem i givhan long olgeta ya we oli gat tingting daon mo oli stap ‘traem lukaotem hem blong oli save faenem hem.’ (Ol Wok 17:27) Olgeta ya we oli faenem God​—oli mekem wok blong hem​—oli kam ol sas samting long lukluk blong hem. (Lukluk Aesea 43:​4, 10.) Lokis we i daon moa i pulum yumi blong tingbaot we yumi nating nomo mo blong kasem lav blong Hemia we i gat olgeta paoa mo i wokem yumi, we hem i stap fren mo soem kaengud fasin long ol man we oli stap obei long hem. ?Yu yu stap soemaot fasin tangkyu from lav blong God?