• ?Olsem Wanem Yumi Save Stap Klin Long Fored Blong God?
    !Enjoem Laef Olwe!​—Baebol Kos

    • Tingbaot wan mama we i stap rerem smol boe blong hem blong go long skul. Hem i meksua se pikinini blong hem i swim mo ol klos blong hem oli klin. Hemia i mekem se pikinini i helti mo i soem long ol narafala se ol perens blong hem oli lukaotgud long hem. Long sem fasin, Papa blong yumi Jehova i wantem se yumi klin long saed blong bodi, mo long ol fasin blong yumi. Taem yumi klin, hemia i mekem i gud long yumi mo i givim ona long Papa blong yumi.

      1. ?Olsem wanem yumi save stap klin long bodi?

      Jehova i talem long yumi se: “Yufala i mas tabu.” (1 Pita 1:16) Blong stap tabu, yumi mas klin long saed blong bodi mo ol fasin. Blong stap klin long saed blong bodi, yumi mas swim oltaem, klos i mas klin, haos i no olbaot mo trak tu i klin. Yumi save givhan tu blong klinim Haos Kingdom blong yumi. Taem yumi stap klin long bodi, yumi givim ona i go long Jehova.—2 Korin 6:3, 4.

      2. ?Olsem wanem yumi save stap klin long ol fasin blong yumi?

      Baebol i talem long yumi blong “wasemaot ol samting we oli mekem bodi mo tingting blong yumi i kam doti.” (2 Korin 7:1) Hemia i min se yumi mas lukaot blong no mekem ol samting we i save spolem bodi mo tingting blong yumi. Ol tingting blong yumi i sud mekem Jehova i glad, taswe yumi traem bes blong blokem ol tingting we oli no stret. (Ol Sam 104:34) Yumi traehad tu blong no talem ol toktok we oli doti.—Ridim Kolosi 3:8.

      ?Wanem samting i save mekem yumi doti long bodi mo long fasin? Sam samting we yumi tekem i save mekem bodi blong yumi i doti. Taswe yumi no smok tabak, kakae bitel nat o lif blong koka mo tekem ol drag. Taem yumi no mekem ol samting ya, bodi blong yumi i helti moa mo yumi soem respek long laef. Man i traehad blong stap klin taem i blokem ol doti fasin olsem fasin blong man i pleplei wetem seks blong hem, mo fasin blong lukluk ponografi. (Ol Sam 119:37; Efesas 5:5) I had blong winim ol fasin ya, be Jehova i save givhan long yumi blong winim.—Ridim Aesea 41:13.

      DIGIM MOA

      Makem olsem wanem fasin blong stap klin i givim ona long Jehova, mo faenemaot olsem wanem blong winim ol fasin we oli no klin.

      3. Fasin blong stap klin long bodi i givim ona long Jehova

      Yumi save luksave tingting blong God long saed blong fasin klin, taem yumi ridim ol oda we hem i givim long ol man Isrel. Ridim Eksodas 19:10 mo 30:17-19, mo tokbaot ol kwestin ya:

      • Folem ol vas ya, ?wanem tingting blong Jehova long saed blong fasin klin long bodi?

      • ?Wanem samting we yu save mekem oltaem blong stap klin long bodi?

      Yumi nidim plante taem mo paoa blong stap klin long bodi. Nating se i olsem yumi naf blong mekem, nomata se yumi rij o pua, mo nomata weples yumi stap long hem. Plei VIDEO, mo tokbaot kwestin ya.

      VIDEO: God i Laekem Ol Man We Oli Klin (4:10)

      • ?From wanem ol man we yumi prij long olgeta bambae oli respektem Jehova moa, taem oli luk se olting blong yumi oli klin?

      4. Winim ol rabis fasin

      Wan man i sakem ol sigaret long tin doti.

      Jehova i save halpem yumi blong winim ol doti fasin blong yumi

      Sipos yu stap smok o tekem drag olsem wan pleplei, ating yu save finis se i had blong lego fasin ya. ?Be wanem i save givhan? Makem olsem wanem fasin ya i save afektem yu. Ridim Matiu 22:37-39, mo tokbaot olsem wanem tabak mo fasin blong tekem drag i save afektem . . .

      • frensip blong yu wetem Jehova.

      • famle blong yu mo ol narafala raonabaot long yu.

      Mekem wan plan blong winim wan rabis fasin.a Plei VIDEO.

      VIDEO: Bos Long Yu Wan (2:47)

      Ridim Filipae 4:13, mo tokbaot kwestin ya:

      • ?Olsem wanem fasin blong prea, stadi, mo go long ol miting oltaem, oli save givhan long wan man blong winim wan rabis fasin?

      5. Winim ol tingting mo ol fasin we oli no klin

      Ridim Kolosi 3:5, mo tokbaot ol kwestin ya:

      • ?Olsem wanem yumi save se fasin ya we man i pleplei wetem seks blong hem, lukluk ponografi mo seksting oli no klin long ae blong Jehova?

      • ?Yu ting se yumi save gat wan klin tingting olsem we Jehova i ekspektem? ?From wanem?

      Faenemaot olsem wanem yumi save winim ol tingting we oli no klin. Plei VIDEO.

      VIDEO: Tekem Aksen Blong Stap Klin (1:51)

      Jisas i yusum wan pijatok blong soemaot se i impoten we yumi tekem strong aksen blong mekem tingting blong yumi i klin. Ridim Matiu 5:29, 30, mo tokbaot kwestin ya:

      • Jisas i no minim se yumi mas spolem bodi blong yumi, be hem i minim se yumi mas tekem aksen. ?Wanem aksen we wan man i mas tekem blong blokem ol tingting we oli no klin?b

      Sipos yu stap traehad blong winim ol tingting we oli no klin, Jehova i luksave ol traehad blong yu. Ridim Ol Sam 103:13, 14, mo tokbaot kwestin ya:

      • Sipos yu stap traehad blong winim wan fasin we i no klin, ?olsem wanem vas ya i save leftemap tingting blong yu blong no givap?

      Foldaon bakegen, i no min se fasin ya i winim yu

      I isi blong gat tingting ya se: ‘Mi foldaon bakegen, i gud mi givap nomo.’ Be tingbaot se: Taem wan man blong resis i foldaon, hemia i no min se hem i lusum resis o bambae i gobak long stat. Long sem fasin, taem yu mestem o yu foldaon, hemia i no min se fasin ya i winim yu, o se ol traehad we yu bin mekem finis i blong nating nomo. I no rong blong foldaon o mestem, from we hemia i save givhan long yu blong kamgud moa. !So yu no givap! Wetem help blong Jehova, yu save winim rabis fasin ya.

      Wan man blong resis i girap afta we i foldaon.

      SAM MAN OLI SE: “Mi laef wetem fasin ya, so i had blong mi lego.”

      • ?Wanem vas we yu save soem blong pruvum se Jehova i save halpem hem blong lego fasin ya?

      SAMARI

      Taem yumi gohed blong mekem tingting, aksen mo bodi blong yumi i klin, yumi mekem Jehova i glad.

      Tingtingbak

      • ?From wanem i impoten blong stap klin?

      • ?Olsem wanem blong stap klin long saed blong bodi?

      • ?Olsem wanem ol tingting mo ol aksen blong yu oli save stap klin?

      Nekis Step

      FAENEMAOT

      ?Wanem sam isi samting we yu save mekem blong stap klin long bodi, nating se yu nogat plante samting?

      Stap Klin Mo Helti—Wasem Han (3:01)

      Faenemaot sam rod we yu save folem blong stop blong smok.

      “?Olsem Wanem Blong Lego Smok?” (Wekap!, Julae 2010)

      Faenemaot nogud samting we i save kamaot from ponografi.

      “Ol Rabis Pija—?Oli Save Spolem Yu No Nogat?” (Wajtaoa, 1 Oktoba 2013)

      Faenemaot olsem wanem wan man i winim fasin ya blong lukluk ponografi.

      “Bifo We Mi Win, Mi Foldaon Plante Taem” (Wajtaoa N. 4 2016)

      a “?Olsem Wanem Blong Lego Smok?” we i stap long haf ya “Faenemaot,” i eksplenem ol rod blong winim fasin ya blong wantem smok oltaem.

      b Blong man i winim fasin ya blong pleplei wetem seks blong hem, ridim haf ya “How Can I Conquer the Habit of Masturbation?” insaed long buk ya Questions Young People Ask—Answers That Work, Volium 1, japta 25.