-
Yu Save Kam Fren Blong Jehova!Enjoem Laef Olwe!—Baebol Kos
-
-
5. Samting we Jehova i askem long ol fren blong hem
Plante taem yumi ekspektem sam samting long ol fren blong yumi.
?Wanem sam samting we yu wantem se ol fren blong yu oli mekem blong yu?
Ridim 1 Jon 5:3, mo tokbaot kwestin ya:
?Jehova i ekspektem se ol fren blong hem oli mekem wanem?
Blong obei long Jehova, maet i nidim blong jenisim ol fasin mo tingting blong yumi. Ridim Aesea 48:17, 18, mo tokbaot kwestin ya:
?From wanem Jehova i askem se ol fren blong hem oli jenisim sam samting long laef blong olgeta?
Wan gudfala fren bambae i rimaenem yumi long ol samting we i save protektem mo givhan long yumi. Jehova i mekem sem mak long ol fren blong hem
-
-
Soem Se Yumi Lavem Jehova!Enjoem Laef Olwe!—Baebol Kos
-
-
LESEN 34
Soem Se Yumi Lavem Jehova
Naoia we yu stap stadi Baebol, ?yu harem save se lav blong yu long God i kam bigwan moa? ?Yu yu wantem gohed blong frengud moa wetem hem? Sipos yes, tingbaot se taem Jehova i luk se yu lavem hem moa, bambae hem i kea mo i lavem yu moa. ?Olsem wanem blong soem se yu lavem hem?
1. ?Olsem wanem yumi soem long Jehova se yumi lavem hem?
Yumi soem se yumi lavem Jehova, taem yumi obei long hem. (Ridim 1 Jon 5:3.) Hem i no fosem man blong obei long hem. Be hem i givim janis long evriwan blong jusum sipos oli wantem obei long hem, o nogat. Jehova i wantem se yumi ‘obei long [hem] long fulhat blong yumi.’ (Rom 6:17) Hemia i minim se, hem i wantem se yu obei long hem i no from we yu mas mekem, be from we yu lavem hem. Seksen 3 mo 4 blong buk ya bambae i halpem yu blong lavem Jehova, taem yu jusum blong mekem ol samting we hem i laekem mo no mekem samting we hem i no laekem.
2. ?From wanem i no isi blong soem lav blong yumi long Jehova?
Hemia from we “plante hadtaem i stap kasem stret man.” (Ol Sam 34:19) Yumi evriwan i stap strakel from we yumi no stretgud olgeta. Mo tu, yumi fesem hadtaem long saed blong mane, ol man oli mekem i no stret long yumi, mo ol narafala hadtaem. Taem yumi fesem ol hadtaem, maet yumi faenem i had blong obei long Jehova. Hemia from we maet i isi moa blong no obei long Jehova. Be taem yu gohed blong obei long Jehova, yu stap soemaot se yu lavem hem moa i bitim eni narafala samting. Mo samting ya i pruvum se yu yu holemstrong long hem, nao hem tu bambae i holemstrong long yu. Yes, bambae hem i neva lego yu.—Ridim Ol Sam 4:3.
DIGIM MOA
Faenemaot from wanem i impoten blong obei long Jehova, mo luk samting we i save halpem yu blong stap tru long hem.
3. Wan storian we i involvem yu
Folem buk blong Job long Baebol, yumi save ridim se Setan i no tok agensem Job nomo, be i agensem olgeta man we oli wantem wosipim Jehova. Ridim Job 1:1, 6–2:10, mo tokbaot ol kwestin ya:
Folem ol tok blong Setan, ?Job i obei long Jehova from wanem?—Luk Job 1:9-11.
?Setan i talem wanem long saed blong yu mo olgeta man?—Luk Job 2:4.
Ridim Job 27:5b, mo tokbaot kwestin ya:
?Job i pruvum olsem wanem se hem i rili lavem Jehova?
Job i soemaot se hem i lavem Jehova, taem i stap holemstrong long Hem
Yumi soemaot se yumi lavem Jehova, taem yumi stap holemstrong long hem
4. Mekem hat blong Jehova i glad
Ridim Ol Proveb 27:11, mo tokbaot ol kwestin ya:
?Jehova i harem olsem wanem taem yu mekem samting we i waes mo yu obei long hem? ?From wanem?
5. Yu save holemstrong long Jehova
Taem yumi lavem Jehova, hemia i pulum yumi blong tokbaot hem long narafala. Mo taem yumi wantem holemstrong long hem, bambae yumi tokbaot hem nating se i no isi. Plei VIDEO, mo tokbaot ol kwestin ya.
?Samtaem yu yu harem se i had blong tokbaot Jehova long ol narafala?
Long video ya, ?wanem i givhan long Grayson blong i no moa fraet?
I isi blong holemstrong long Jehova taem yumi laekem wanem we hem i laekem, mo taem yumi agensem wanem we hem i agensem. Ridim Ol Sam 97:10, mo tokbaot ol kwestin ya:
Folem ol samting we yu lanem finis, ?wanem sam samting we Jehova i laekem mo we i no laekem?
?Wanem i save givhan long yu blong laekem samting we i gud mo agensem samting we i nogud?
6. Yumi kasem blesing taem yumi obei long Jehova
Beswan desisen hemia blong obei long Jehova oltaem. Ridim Aesea 48:17, 18, mo tokbaot ol kwestin ya:
?Yu yu trastem se, oltaem Jehova i save samting we i gud long yumi? ?From wanem?
Kam kasem naoia, ?olsem wanem stadi long saed blong Baebol mo Jehova i givhan long yu?
SAM MAN OLI SE: “God i no rili intres long ol samting we mi stap mekem.”
?Yu save yusum wanem vas blong soemaot se ol aksen blong yumi oli save afektem Jehova?
SAMARI
Yumi soem se yumi lavem Jehova taem yumi obei long hem mo holemstrong long hem nating se i no isi.
Tingtingbak
?Yu lanem wanem long eksampol blong Job?
?Olsem wanem blong soem long Jehova se yu lavem hem?
?Wanem i save givhan long yu blong yu gohed blong holemstrong long Jehova?
FAENEMAOT
Faenemaot olsem wanem yu save holemstrong long Jehova mo long kongregesen.
“Man We i Holemstrong Long Yu, Yu Tu Yu Holemstrong Long Hem” (16:49)
Kasemsave moa long ol tok we Setan i talem agensem olgeta man.
“Job Keeps His Integrity” (The Bible—What Is Its Message? section 6)
Luk olsem wanem ol yangfala tu oli save soem se oli lavem Jehova.
?Olsem wanem wan yangfala we ol fren oli traem pulum hem, i soem se i lavem Jehova?
-
-
Mekem Ol Gudfala Desisen!Enjoem Laef Olwe!—Baebol Kos
-
-
LESEN 35
Mekem Ol Gudfala Desisen
Yumi evriwan i gat ol desisen blong mekem. Plante long ol desisen ya oli save afektem laef blong yumi mo frensip blong yumi wetem Jehova. Eksampol, maet yumi mas mekem desisen long saed blong ples we bambae yumi stap long hem, wok we bambae yumi mekem, o bambae yumi mared o nogat. Taem yumi mekem ol gudfala desisen, bambae yumi gat wan hapi laef mo yumi mekem Jehova i glad.
1. ?Olsem wanem yu save yusum Baebol blong mekem wan gudfala desisen?
Bifo we yu mekem wan desisen, prea long Jehova blong i halpem yu, mo ridim Baebol blong faenemaot tingting blong hem. (Ridim Ol Proveb 2:3-6.) Samtaem Jehova i givim klia loa long samting we yumi wantem mekem. Sipos i olsem, beswan desisen i blong obei long loa ya.
?Be olsem wanem sipos i nogat wan klia loa? Jehova bambae i lidim yu “long rod we [yu] sud folem.” (Aesea 48:17) ?Olsem wanem hem i mekem? Maet i gat ol rul we oli save lidim yu. Ol rul we i stap long Baebol oli ol stamba trutok we i soemaot ol tingting mo filing blong God. Mo plante taem wan stori long Baebol tu i save givhan long yumi blong save tingting blong God. Taem yumi save ol filing blong Jehova, bambae yumi mekem ol desisen we i mekem hem i glad.
2. ?Bifo we yu mekem wan desisen, yu mas tingbaot wanem?
Baebol i talem se: “Man we i tingting gud, hem i skelem gud wanwan step blong hem.” (Ol Proveb 14:15) Hemia i min se yumi mas tekem taem blong tingting gud bifo we yumi mekem wan desisen. Taem yu stap tingbaot weswan desisen blong mekem, i gud yu askem yu wan se: ‘?Wanem rul blong Baebol i stret long samting ya? ?Weswan bambae i mekem se mi gat pis long tingting? ?Olsem wanem desisen ya bambae i afektem ol narafala? Mo samting we i moa impoten se, ?Jehova bambae i glad long desisen ya?’—Dutronome 32:29.
Jehova i gat raet blong talem wanem i gud mo wanem i nogud. Taem yumi savegud ol loa mo ol rul blong hem, mo yumi gat strong tingting blong folem olgeta, yumi stap trenem gud tingting we i jajem yumi. Tingting ya bambae i givhan long yumi blong save samting we i stret mo samting we i no stret. (Rom 2:14, 15) Nao bambae i givhan long yumi blong mekem ol gudfala desisen.
DIGIM MOA
Lanem olsem wanem ol rul blong Baebol mo tingting we i jajem yumi i save halpem yumi taem yumi mekem ol desisen.
3. Letem Baebol i lidim yu
?Olsem wanem ol rul blong Baebol oli save givhan long yumi blong mekem ol gudfala desisen? Plei VIDEO, mo tokbaot ol kwestin ya.
?Wanem nambawan presen we Jehova i givim long yumi?
?From wanem Jehova i letem yumi fri blong jus?
?Hem i givim wanem long yumi blong halpem yumi blong mekem ol gudfala desisen?
Blong luk wan rul blong Baebol, ridim Efesas 5:15, 16. Biaen tokbaot olsem wanem yu save “yusum gud taem” blong . . .
ridim Baebol evri dei.
kam wan gudfala hasban o waef, papa, mama, o pikinini.
go long ol kongregesen miting.
4. Trenem tingting we i jajem yu, blong mekem ol gudfala desisen
Taem i gat wan klia loa long samting we yu wantem mekem, maet i isi blong mekem wan desisen. ?Be olsem wanem sipos i nogat wan klia loa? Plei VIDEO, mo tokbaot kwestin ya.
Long video ya, ?sista ya i mekem wanem blong trenem tingting we i jajem hem mo blong mekem wan desisen we i mekem Jehova i glad?
?From wanem i no stret blong askem narafala blong i mekem desisen blong yumi? Ridim Hibru 5:14, mo tokbaot ol kwestin ya:
Maet yumi harem se i isi moa blong askem narafala blong i mekem desisen blong yumi, ?be yumi mas kam naf blong mekem wanem?
?Wanem i save halpem yu blong trenem tingting we i jajem yu mo mekem ol gudfala desisen?
Tingting we i jajem yumi i olsem wan map, i save halpem yumi blong mekem ol desisen long laef
5. Respektem tingting blong ol narafala
Desisen blong wanwan man bambae i defren. ?Olsem wanem yumi save soemaot se yumi respektem tingting blong narafala? Bae yumi luk tu situesen:
Situesen 1: Wan sista we i laekem blong flasem hem, i muv i go long wan kongregesen we ol sista oli harem i narakaen taem wan i flasem hem tumas.
Ridim Rom 15:1 mo 1 Korin 10:23, 24, mo tokbaot ol kwestin ya:
Folem ol vas ya, ?sista ya save i mekem wanem? ?Bambae yu yu mekem wanem sipos yu stap wetem wan we tingting blong hem i defren long tingting blong yu?
Situesen 2: Wan brata i save we Baebol i no blokem fasin ya blong dring alkol, be hem i jusum blong no dring alkol. Oli invaetem hem blong joen wetem ol narafala mo hem i luk we sam brata oli stap dring alkol.
Ridim Prija 7:16 mo Rom 14:1, 10, mo tokbaot ol kwestin ya:
Folem ol vas ya, ?brata ya save i mekem wanem? ?Bambae yu mekem wanem sipos yu stap wetem wan we tingting blong hem i defren long tingting blong yu?
?Wanem i save lidim yu blong mekem ol gudfala desisen?
1. Askem Jehova blong i halpem yu blong mekem wan desisen.—Jemes 1:5.
2. Mekem risej long Baebol mo ol buk we oli stanap long Baebol, blong faenem ol rul we yu save folem. Yu save storian tu wetem ol Kristin we oli gat moa ekspiriens.
3. Tingbaot olsem wanem desisen blong yu bambae i afektem tingting blong yu mo tingting blong ol narafala.
SAM MAN OLI SE: “Yu gat raet blong mekem wanem we yu wantem. I no nid blong wari long tingting blong ol narafala.”
?From wanem i impoten blong tingbaot filing blong God mo filing blong ol narafala?
SAMARI
Yumi mekem ol gudfala desisen taem yumi faenemaot sipos ol desisen blong yumi i mekem Jehova i glad mo i halpem narafala.
Tingtingbak
?Olsem wanem blong mekem ol desisen we i mekem Jehova i glad?
?Olsem wanem blong trenem tingting we i jajem yu?
?Olsem wanem yu save soemaot se yu respektem tingting blong ol narafala?
FAENEMAOT
?Olsem wanem yu save mekem ol desisen we i halpem yu blong frengud moa wetem God?
“Yumi Mas Mekem Ol Desisen We Oli Givim Ona Long God” (Wajtaoa, 1 Eprel 2011)
Lanem moa olsem wanem Jehova i stap givim advaes long yumi.
Luk samting we i givhan long wan man blong i mekem wan desisen we i had.
Lanem olsem wanem yumi save mekem Jehova i glad, taem hem i no talem klia samting blong mekem.
“?Yu Yu Nidim We Baebol i Talem Wan Loa Long Evri Samting?” (Wajtaoa, 1 Disemba 2003)
-