² Taem yumi tingbaot samting ya, yumi kasem save se wanem we Aesea i tokbaot i impoten tumas. Hem i talem se: “!Yu luk! Tudak hem wan bambae i kavremap wol, mo olgeta nesen oli stap long bigfala blak klaod.” (Aesea 60:​2, NW) I tru se vas ya i no stap tokbaot prapa tudak. Aesea i no minim se wan dei, bambae san, mun mo ol sta, oli no moa saen, nogat. (Ol Sam 89:​36, 37; 136:​7-9) Be hem i stap tokbaot tudak long saed blong spirit. Tudak ya i save givim ded long man. Yes, yumi no save laef sipos i no gat laet blong san. Long sem fasin, yumi no save kasem laef sipos i no gat laet long saed blong spirit.​—Luk 1:​79.

3. ?Folem tok blong Aesea, ol Kristin oli mas mekem wanem?

³ Nating se ol tok blong Aesea oli kamtru finis long ol man Juda bifo, i impoten tumas blong luksave se ol tok ya oli stap kamtru tede long wan fasin we i bigwan moa. Ol man oli stap long bigfala denja, taswe oli rili nidim laet long saed blong spirit. Hemia nao from wanem ol Kristin oli mas obei long tok ya blong Jisas se: “Yufala i mas letem laet ya i saenaot i kasem ol man.” (Matiu 5:​16) Ol Kristin we oli gat strong bilif oli save mekem laet i saenaot i go long ol man we oli gat tingting daon, nao bambae ol man ya oli gat janis blong kasem laef.​—Jon 8:​12.

4. ?Wetaem ol profet tok blong Aesea oli kamtru fastaem, be stat long taem blong hem finis, laef blong ol man i olsem wanem?

⁴ Faswan taem we tok blong Aesea long saed blong tudak i kamtru, hemia taem ol man Babilon oli spolem Juda mo oli tekem ol man Juda oli go kalabus. Be long taem blong Aesea, taem ol man Babilon oli no spolem Juda yet, bighaf blong nesen ya i stap finis long tudak long saed blong spirit. Taswe Aesea i talem long ol manples blong hem se: “Yumi ol laen blong Jekob, mo yumi mas wokbaot long delaet ya we Hae God i stap givim long yumi.”​—Aesea 2:5; 5:​20.