Olsem Ol Sotleg We Oli Stap Flae i Go Long Haos Blong Olgeta

OL SOTLEG oli wan long olgeta faswan pijin we man i fidim long haos. Plante taosen yia bifo, ol man Ijip​—oli wantem se bambae oli gat kakae long ful yia​—oli stanemap ol haos blong ol sotleg kolosap long haos blong olgeta. Ol man oli laekem mit blong ol pijin ya tumas, mo oli yusum sitsit blong olgeta blong wokem garen. Be long ol yia we oli ron bitwin 400 K.T. mo 1300 K.T, ol man oli wantem ol sotleg tumas mekem se long sam kantri ol rijman no ol man blong skul nomo oli gat raet blong bildim haos blong ol sotleg ya mo blong fidim olgeta.

Nating se naoia plante man i laekem moa mit blong faol i bitim mit blong ol pijin, be yumi save faenem sam olfala haos blong ol sotleg yet. Pija ya i soemaot ol haos blong ol sotleg long Ijip.

Long aftenun, bigfala hif blong ol pijin olsem klaod oli kamdaon long haos blong olgeta. Man Isrel ya, profet Aesea i tokbaot samting ya taem hem i askem se: “Hu ya olgeta we oli stap flae i kam olsem wan klaod, mo olsem ol sotleg we oli stap gobak long haos blong olgeta?” Wan narafala translesen i tanem tok ya olsem: “?Hu ya olgeta we oli stap flae i kam long klaod, oli flae olsem ol sotleg we oli stap flae i go long haos blong olgeta?”​—Aesea 60:​8; The New English Bible.

Ansa blong kwestin ya yumi save faenem tede taem yumi luk plante handred taosen man we oli stap fraetgud long God oli stap kam long ogenaesesen blong Jeova. Oli lanem blong gat hop long God taem oli stap kam long ol Haos Kingdom blong ol Wetnes blong Jeova. (Aesea 60:9) Long medel blong ol man blong God, oli faenem ol gudgudfala samting long saed blong speret, wan strong bilif, mo oli joen wetem ol gudfala man we oli mekem olgeta oli harem se oli gat pis mo oli stap sef olsem ol sotleg we oli harem sef long haos blong olgeta.

[Foto Credit Line Blong Pija Long Pej 32]

Pictorial Archive (Near Eastern History) Est.