17. (a) Olsem Jeremaea i soemaot, ?wanem jajmen bambae i kam long Jerusalem we i fulap long rabis fasin? (b) ?Bambae wanem samting i hapen long Kri­sendom i no longtaem?

¹⁷ ?Jeova, bigfala Jaj, bambae i mekem wanem jajmen long ol gyaman tija blong Krisendom? Vas 19, 20, 39, mo 40 i givim ansa se: “!Harem! Tru ya, bigfala win blong Jeova, bigfala fasin kros hem wan, bambae i kamaot, yes wan bigfala win we i tanraon. Bambae hem i tanraon antap long hed blong ol rabis man. Bambae kros blong Jeova i no finis, gogo kasem we bambae hem i mekem ol tingting blong hat blong hem oli kamtru fastaem, oli kamtru olgeta. . . . Bambae mi sakemaot yufala ol man, we mi no save tekem yufala bakegen, mo bambae mi lego yufala mo taon ya we mi bin givim long yufala mo long ol bubu blong yufala​—long fored blong mi. Mo bambae mi putum trabol antap long yufala gogo i no save finis mo bambae mi mekem yufala i sem gogo i no save finis, we bambae man i no save fogetem.” !Olgeta samting ya oli hapen long Jerusalem we i fulap long rabis fasin mo haos prea blong hem, mo i no longtaem wan trabol olsem bambae i kasem Kris­endom we i fulap long rabis fasin!

21. (a) ?From wanem oli spolem Jerusalem long yia 607 B.K.T.? (b) Afta we oli spolem Jerusalem, ?wanem i hapen long ol gyaman profet mo long trufala profet blong Jeova, mo samting ya i mekem yumi sua long wanem samting tede?

²¹ Long taem blong Jeremaea, Jeova i mekem jajmen blong hem i kamtru taem ol man Babilon oli spolem Jerusalem long yia 607 B.K.T. Olsem profet tok i talem, hemia wan ‘trabol mo sem’ blong ol stronghed man Isrel ya we oli no stap tru long God. (Jeremaea 23:​39, 40) Samting ya i soem long olgeta se Jeova, we plante taem oli bin mekem nogud long hem, naoia i lego olgeta blong oli kasem ol frut blong rabis fasin blong olgeta. Long taem ya ol profet blong olgeta we oli flas oli no moa save talem wan samting. Be, Jeremaea i stap gohed blong talemaot profet tok. Jeova i no lego hem. Folem eksampel ya, bambae Jeova i no save lego grup ya we i olsem Jeremaea taem hevi disisen blong hem i smasem laef blong ol lida blong Krisendom mo olgeta we oli bilif long ol gyaman tok blong olgeta.