6. ?Wanem bambae i hapen afta we bigfala hip blong ol man oli pastru long bigfala trabol? Yu eksplenem. (Yu luk haf ya “Kwestin” long magasin ya, we i tokbaot laef bakegen long wol.)

⁶ Ridim Daniel 12:2. ?Wanem bambae i hapen afta we bigfala hip blong ol man oli pastru long bigfala trabol? Profet tok ya i no wan pijatok blong tokbaot laef bakegen o se God i makemaot ol tabu Kristin long ol las dei, olsem we yumi stap talem bifo.c Be, hem i tokbaot laef bakegen long niufala wol we i stap kam. ?From wanem yumi talem olsem? Long Job 17:16 oli yusum tok ya “das” blong minim “Gref.” Hemia i soemaot se Daniel 12:2 i stap tokbaot laef bakegen blong ol man, afta we las dei i finis mo afta long Amagedon.

7. (1) ?Olsem wanem samfala bambae oli laef bakegen blong “kasem laef we i no save finis”? (2) ?From wanem “laef bakegen ya i gud moa”?

⁷ ?Wanem mining blong Daniel 12:2 taem i talem se samfala bambae oli laef bakegen blong “kasem laef we i no save finis”? Hemia i min se olgeta we oli laef bakegen mo oli kasemsave, o oli gohed blong kasemsave, mo oli obei long Jehova mo Jisas long 1,000 yia, bambae oli kasem laef we i no save finis. (Jon 17:3) “Laef bakegen ya i gud moa” i bitim laef bakegen blong samfala long taem bifo. (Hib. 11:35) ?From wanem? From we olgeta ya bifo oli ded bakegen.

8. ?Olsem wanem samfala oli laef bakegen “blong kasem ol strong tok mo blong sakemaot olgeta olwe”?

⁸ Be samfala we oli laef bakegen, bambae oli no akseptem ol tijing blong Jehova. Daniel i talem se samfala bambae oli laef bakegen “blong kasem ol strong tok mo blong sakemaot olgeta olwe.” From we oli rebel, nem blong olgeta bambae i no stap long buk blong laef, mo bambae oli no kasem laef olwe. Be bambae oli “sakemaot olgeta olwe,” o oli lus olgeta. Taswe, Daniel 12:2 i stap tokbaot samting we bambae i hapen long olgeta we oli laef bakegen, folem samting we oli mekem afta long taem ya.d (Rev. 20:12) Samfala bambae oli kasem laef blong olwe, mo samfala bambae oli no kasem.