Men mesej blong Baebol hemia Kingdom blong God. Jehova bambae i yusum Kingdom ya blong mekem stamba tingting blong hem i kamtru long wol. ?Kingdom hem i wanem? ?Olsem wanem yumi save se hem i stat rul finis? ?Wanem samting we hem i mekem finis? ?Mo bambae hem i mekem wanem long fiuja? Bambae yumi faenem ol ansa long lesen ya wetem tufala nekis lesen.

1. ?Wanem ya Kingdom blong God, mo hu i King long hem?

Kingdom hem i wan gavman we Jehova God i stanemap. Kingdom ya i stap long heven, mo Jisas Kraes nao i King long hem. (Matiu 4:17; Jon 18:36) Baebol i talem se, “bambae hem i rul . . . blong olwe.” (Luk 1:32, 33) King Jisas bambae i rulum evri man long wol.

2. ?Hu i rul wetem Jisas?

Jisas i no rul hem wan. Ol man blong “olgeta traeb, mo long olgeta lanwis, mo long olgeta grup blong man, mo long olgeta nesen . . . bambae oli king, oli rul long olgeta man long wol.” (Revelesen 5:9, 10) ?Hamas man bambae oli rul wetem Kraes? Taem Jisas i stap long wol kam kasem naoia, plante milian Kristin oli kam man blong hem. Be 144,000 man nomo oli go long heven blong rul wetem Jisas. (Ridim Revelesen 14:1-4.) Ol narafala Kristin we oli stap long wol oli kam sitisen blong Kingdom ya.—Ol Sam 37:29.

3. ?Olsem wanem Kingdom blong God i gud moa i bitim gavman blong man?

Nating se ol man we oli rul oli wantem mekem ol gudfala samting, be oli no naf blong mekem evri samting. Mo sam narafala maet oli no intres mo kea long nid blong ol sitisen blong olgeta. Be King blong Kingdom, hemia Jisas, bambae hem i rul blong olwe. God “i stanemap wan kingdom we bambae i neva foldaon.” (Daniel 2:44) Jisas bambae i rulum fulwol, mo bambae hem i lavem evri man i no sam man nomo. Hem i gat lav, i kaen, mo i mekem i stret long ol man, mo bambae hem i tijim ol man blong oli gat sem fasin.—Ridim Aesea 11:9.

4. Wan gavman we i gat paoa bambae i rulum fulwol

Jisas Kraes i gat moa paoa i bitim eni narafala rula. Ridim Matiu 28:18, mo tokbaot kwestin ya:

• ?From wanem rul blong Jisas i hae moa i bitim rul blong ol man?

Rul blong ol man i stap jenis oltaem, mo i neva gat wan we i rulum fulwol. ?Be olsem wanem long Kingdom blong God? Ridim Daniel 7:14, mo tokbaot ol kwestin ya:

• ?From wanem i wan gudfala samting we Kingdom blong God “i neva foldaon”?

• ?From wanem i wan gudfala samting we Kingdom bambae i rulum fulwol?

5. Rul blong ol man i mas finis

?From wanem Kingdom blong God i mas finisim ol gavman blong man? Plei VIDEO, mo tokbaot ol kwestin ya.

VIDEO: ?Wanem Ya Kingdom Blong God?—Wan Smol Haf (1:41)

• ?Wanem i stap hapen aninit long rul blong man?

Ridim Prija 8:9, mo tokbaot ol kwestin ya:

• ?I stret we Kingdom blong God i finisim rul blong ol man? ?From wanem?

6. Ol rula blong Kingdom oli savegud yumi

From we King blong yumi Jisas i bin laef long wol, hem i “savegud we yumi no gat paoa, nao hem i gat sore long yumi.” (Hibru 4:15) Mo ol 144,000 man mo woman we Jehova i jusumaot olgeta blong oli rul wetem Jisas, oli “kamaot long olgeta traeb, mo long olgeta lanwis, mo long olgeta grup blong man, mo long olgeta nesen.”—Revelesen 5:9.

• ?Yu yu glad we Jisas wetem ol 144,000 man, oli savegud laef blong yumi? ?From wanem?

7. Loa blong Kingdom i gud moa i bitim blong ol man

Ol gavman oli putumap ol loa blong i givhan mo protektem ol sitisen blong olgeta. Kingdom blong God tu i gat ol loa we ol sitisen blong hem oli mas folem. Ridim 1 Korin 6:9-11, mo tokbaot ol kwestin ya:

• ?Yu ting se wol bambae i olsem wanem sipos evriwan i folem ol rul blong Kingdom?a

• ?Yu ting se i stret we Jehova i ekspektem ol sitisen blong hem, blong oli respektem ol rul blong Kingdom? ?From wanem?

• ?Wanem i soemaot se ol man we oli no obei long loa ya, oli save jenis?—Luk vas 11.

SAMARI

Kingdom blong God i wan trufala gavman long heven we bambae i rulum fulwol.

Tingtingbak

• ?Hu olgeta we bambae oli rul long Kingdom blong God?

• ?Olsem wanem Kingdom ya i gud moa i bitim rul blong ol man?

• ?Jehova i ekspektem ol sitisen blong Kingdom, blong oli mekem wanem?

FAENEMAOT

Jisas i tokbaot Kingdom se i stap wea.

“?Kingdom Blong God i Stap Insaed Long Hat Blong Yu?” (Web atikol)

?From wanem ol Witnes blong Jehova oli jusum blong obei long Kingdom blong God, i bitim rul blong man?

Sapotem Fulwan Kingdom Blong God (1:43)

Faenemaot samting we Baebol i talem long saed blong ol 144,000 we Jehova i jusumaot olgeta blong rul wetem Jisas.

“?Hu i Go Long Heven?” (Web atikol)

?Wanem i givhan long wan man we i stap traehad blong winim ol sosol problem, blong i luksave se Kingdom blong God nomo i save winim ol problem ya?

“How I Found the Answer to Injustice” (Wekap!, Novemba 2011)

Kingdom blong God i rul finis mo i no longtaem bambae hem i mekem ol bigfala jenis long wol ya. Bambae yumi tokbaot sam long ol gudfala samting we yu save kasem taem Kingdom i rul.

1. ?Olsem wanem Kingdom bambae i putumbak pis mo jastis long wol ya?

Jisas we i King long Kingdom blong God, bambae i distroem ol rabis man mo ol gavman long faet blong Amagedon. (Revelesen 16:14, 16) Long taem ya, promes ya se: “I no longtaem, ol man nogud bambae oli lus,” bambae i kamtru. (Ol Sam 37:10) Jisas bambae i yusum Kingdom blong mekem pis mo jastis i stap long fulwol.—Ridim Aesea 11:4.

2. ?Taem wil blong God i kamtru, laef bambae i olsem wanem?

Aninit long rul blong Kingdom, “ol stret man bambae oli tekem wol ya i blong olgeta, mo bambae oli stap long hem blong olwe.” (Ol Sam 37:29) Tingbaot se yu laef long wan wol we evriwan i stret gud, oli lavem Jehova, mo oli lavlavem olgeta. I nogat wan we i sik, mo evriwan bambae oli laef olwe.

3. ?Kingdom bambae i mekem wanem afta we ol rabis man oli lus?

Afta we ol rabis man oli lus, Jisas bambae i rul olsem King blong 1,000 yia. Long taem ya, hem wetem 144,000 man we oli rul wetem hem, bambae oli halpem ol man long wol blong oli no moa gat sin mo kam stretgud olgeta. Long en blong 1,000 yia ya, wol ya bambae i kam wan naesfala paradaes, mo ol man we oli laef long taem ya oli haremgud tumas from we oli obei long ol loa blong Jehova. Nao Jisas bambae i givimbak rul i go long Papa blong hem Jehova. Mo Jehova bambae i “mekem we nem blong [hem] i tabu” fulwan. (Matiu 6:9, 10) Samting ya bambae i pruvum se Jehova i wan gudfala rula we i kea long ol man we hem i rulum olgeta. Nao bambae Jehova i distroem Setan, ol dimon, mo ol man we oli jusum blong rebel agensem rul blong hem. (Revelesen 20:7-10) Ol gudfala samting we Kingdom blong God bambae i mekem, bambae oli stap blong olwe.

DIGIM MOA

4. Kingdom bambae i finisim ol gavman blong man

“Sam man oli bos mo ol narafala man we oli stap aninit long olgeta, oli stap harem nogud.” (Prija 8:9) Jehova bambae i yusum Kingdom blong stretem ol problem mo putumbak jastis.

Ridim Daniel 2:44 mo 2 Tesalonaeka 1:6-8, mo tokbaot ol kwestin ya:

• ?Bambae Jehova mo Jisas i mekem wanem long ol rula blong wol wetem ol sapota blong olgeta?

• Folem samting we yu lanem long saed blong Jehova mo Jisas, ?wanem i pruvum long yu se bambae tufala i mekem i stret long ol man?

5. Jisas i beswan King

Olsem King long Kingdom blong God, Jisas bambae i mekem plante samting blong halpem ol man blong hem long wol. Plei VIDEO blong luk olsem wanem Jisas i soemaot finis se hem i wantem mo i gat paoa blong halpem ol man.

VIDEO: Jisas i Soem Samting We Kingdom Bambae i Mekem (1:13)

Taem Jisas i stap long wol hem i soemaot samting we Kingdom bambae i mekem. Long lis we i stap, ?weswan blesing we yu yu wantem tumas blong luk? Ridim ol vas we oli stap long lis ya.

6. Kingdom blong God bambae i givim wan nambawan fiuja

VIDEO: Luk Nambawan Fiuja Ya (4:38)

Ridim Ol Sam 145:16, mo tokbaot kwestin ya:

• ?Yu yu harem olsem wanem taem yu save se Jehova bambae i “givim samting we olgeta laef samting oli wantem tumas”?

SAMARI

Kingdom blong God bambae i mekem evri samting we hem i plan blong mekem. Bambae i mekem fulwol i kam paradaes, we i fulap long ol gudfala man we bambae oli wosipim Jehova gogo i no save finis.

Tingtingbak

• ?Olsem wanem Kingdom blong God bambae i mekem nem blong Jehova i tabu fulwan?

• ?From wanem yumi sua se Kingdom bambae i mekem ol promes blong Baebol oli kamtru?

• ?Wanem blesing blong Kingdom we yu wantem tumas blong luk?

FAENEMAOT

Faenemaot mining blong Amagedon.

“?Wanem Ya Faet Blong Amagedon?” (Web atikol)

Faenemaot samting we bambae i hapen long taem ya we Jisas i tokbaot se taem blong “bigfala trabol.”—Matiu 24:21.

“?Wanem Ya Taem Blong Bigfala Trabol?” (Web atikol)

Luk olsem wanem ol famle oli save pijarem olgeta long taem we Kingdom i rul.

Pijarem Yu Wan Long Paradaes (1:50)

Insaed long haf ya “I Was Troubled by Many Questions,” lanem olsem wanem wan man blong politik i faenem ansa we hem i stap lukaotem.

“The Bible Changes Lives” (Wajtaoa, 1 Jenuware 2012)