• Fogivim Evriwan Wetem Ful Hat Blong Yu
    Wajtaoa—1999 | 15 Oktoba

    • 15, 16. (a) ?Olsem wanem Maeka i tokbaot Jeova? (b) ?I minim wanem se God i “pas ova long ol sin”?

      15 Yumi mas lukluk oltaem i go long God olsem eksampel we yumi mas folem long saed blong fasin fogif. (Efesas 4:32–​5:1) God i soem gudfala fasin ya blong letem mastik i pas, profet Maeka i tokbaot eksampel ya taem hem i raetem se: “Hae God. I no gat wan narafala god we i olsem yu. Bambae yu save fogivim olgeta we oli stap kamaot biaen long mifala, yu save tekemaot ol sin blong olgeta [“pas ova long ol sin blong olgeta,” NW]. Taem yu yu kros, be kros blong yu i no save stap longtaem. Oltaem yu yu glad blong soemaot long mifala we yu stap lavem mifala tumas.”​—Maeka 7:​18.

      16 Taem Baebol i tokbaot Jeova olsem man we i “pas ova long ol sin,” hem i no stap talem se Jeova i no naf blong rimemba rong we man i mekem, olsem we bisnes ya i lus long tingting blong hem. No gat. Tingbaot stori blong Samson mo stori blong Deved, we tufala i bin mekem sam bigfala mastik. God i naf blong rimemba ol sin ya, nating se longtaem i pas. Yumi save sam long ol mastik blong olgeta ya from we Jeova i pulum sam man blong raetemdaon stori blong olgeta long Baebol. Nating se i olsem, God blong fogif i bin soem sore long tufala, mo i tokbaot tufala olsem eksampel blong strong bilif we yumi save folem.​—Hibrus 11:32; 12:1.

      17. (a) ?Wanem tingting i save halpem yumi blong pas ova long ol mastik, no rong, blong narafala? (b) ?Sipos yumi traehad blong mekem samting ya, olsem wanem yumi soemaot se yumi folem eksampel blong Jeova? (Lukluk futnot.)

      17 Yes, Jeova i naf blong ‘pas ova’a long ol mastik, olsem we Deved i askem hem blong mekem plante taem. (2 Samuel 12:13; 24:10) ?Yumi save folem fasin blong God long saed ya? ?Yumi rere blong pas ova long ol slak fasin mo rong we ol brata sista blong yumi, we oli sinman, oli mekem long yumi? Tingbaot yu wan olsem se yu stap long wan plen we i stap ron long efil mo i rere blong flae. Taem yu lukluk i goaot long plen, yu luk wan man we yu savegud hem, i lukluk i kam long plen mo hem i pulum tang blong hem. Yu save se hem i harem nogud from wan samting mo maet hem i stap tingbaot yu taem hem i mekem samting ya. No maet hem i no stap tingbaot yu nating, taem hem i mekem olsem. Nomata long samting ya, plen i flae, ale yu pas antap long man ya, we naoia yu luk hem i smol nomo. Wan aoa biaen, yu stap plante handred kilometa longwe long hem, mo rabis fasin blong hem i stap longwe biaen long yu finis. Long sem fasin, bambae i isi moa long yumi blong fogivim narafala, sipos yumi mekem olsem Jeova mo pas ova long mastik blong narafala. (Ol Proveb 19:11) Long ten yia we i kam, no long tu handred yia biaen, taem yumi stap long Wan Taosen Yia Rul blong Kraes, ating mastik ya bambae i wan samting we i smol nomo. Ale, ?from wanem yu no jes pas ova long hem?

  • Fogivim Evriwan Wetem Ful Hat Blong Yu
    Wajtaoa—1999 | 15 Oktoba

    • a Wan man blong stadi i talem se pija tok ya we i stap long Maeka 7:​18, long lanwis blong Hibru hem i “laenap wetem fasin blong wan man we i stap wokbaot folem wan rod mo i no stap teknotis long ol samting we tingting blong hem i no gat intres long ol samting ya. Tingting ya i no minim se God i no save luk sin blong man, mo i no minim tu se God i tingbaot sin blong man olsem samting we i nating nomo mo i no impoten. No gat. Be, tok ya i minim se God i no stap makemgud evri mastik blong panisim man wetem. God i no kwik blong panisim man, be hem i fogif.”​—Jajes 3:​26; 1 Samuel 16:8.