• Yumi Mas Stap Olsem Man We i Gat Bilif
    Wajtaoa—1999 | 15 Disemba

    • 8. ?Olsem wanem eksampel blong Habakuk i save halpem ol Kristin long faswan handred yia mo tede?

      8 Habakuk i no save se taem ya blong spolem Jerusalem i klosap olsem wanem. Long sem fasin, ol Kristin long faswan handred yia oli no save wetaem fasin blong laef blong ol man Jiu bambae i kasem en blong hem. Mo yumi tede tu, yumi no save stret ‘dei mo taem’ we ol jajmen blong Jeova bambae oli kam agensem rabis wol ya. (Matiu 24:36) Taswe, i gud blong makem se ansa we Jeova i givim long Habakuk i gat tu haf blong hem. Fastaem, hem i mekem i klia long profet ya se bambae hem i no save let. God i talem se, hem “i mas kamtru long stret taem blong hem,” nating se long tingting blong man, i luk olsem se hem i let tumas. (Habakuk 2:3) Seken samting, Jeova i talem bakegen long Habakuk se: “Olgeta ya nomo we fasin blong olgeta i stret, bambae oli save laef, from we tingting blong olgeta i stap strong long mi nomo.” (Habakuk 2:4) !Ol tok ya oli klia gud mo oli naes tumas! Wanem i moa impoten hem i no se, en bambae i kam wetaem, no gat. Impoten samting hemia se, ?bambae yumi gohed olwe blong laef wetem bilif no nogat?

      9. ?Olsem wanem ol man blong Jeova we oli stap obei long hem, oli stap laef from bilif blong olgeta (a) long 607 B.K.T.? (b) afta 66 K.T.? (c)?From wanem i impoten we yumi mekem bilif blong yumi i strong moa?

      9 Taem Jerusalem i foldaon long 607 B.K.T., Jeremaea, sekretari blong hem Baruk, Ebedmelek, mo ol man Rekab we oli stap tru long God, oli luk trutok blong promes ya we Jeova i bin mekem long Habakuk. Oli stap “laef” mo ronwe long bigfala trabol we i spolemgud Jerusalem. ?From wanem? Jeova i blesem fasin blong olgeta blong holem strong long bilif. (Jeremaea 35:​1-​19; 39:​15-​18; 43:​4-7; 45:​1-5) Long sem fasin, ol Hibru Kristin blong faswan handred yia oli bin obei long ol advaes blong Pol. Taem ol ami blong Rom oli kam agensem Jerusalem long 66 K.T., nao wantaem nomo oli aot bakegen, ol Kristin ya oli folem woning blong Jisas se oli mas ronwe. (Luk 21:​20, 21) Olgeta ya oli stap laef from we oli holem strong long bilif blong olgeta. Hemia i sem mak long yumi. Bambae yumi save stap laef taem en i kam, sipos God i luk we yumi holem strong long bilif. !Hemia wan gudfala risen blong yumi mekem bilif blong yumi i strong moa, naoia!

  • Yumi Mas Stap Olsem Man We i Gat Bilif
    Wajtaoa—1999 | 15 Disemba

    • a Pol i yusum tok blong Habakuk 2:4 olsem we i stap long hanraet ya we oli kolem Septuagint. Long hanraet ya oli putum tok ya “sipos wan man i tanemraon blong gobak, mi mi no save harem gud long hem.” Yumi no save faenem tok ya long eni hanraet long lanwis Hibru. Taswe, samfala oli talem se Septuagint i bin kamaot long sam olfala Hibru hanraet blong fastaem, we naoia oli no moa stap. Nomata se i olsem wanem, be Pol i raetem tok ya from paoa blong tabu spirit blong God. Taswe, hem i wan tok we i kamaot long God.