17. ?Folem wanem we Sefanaea 1:​14-​16 i talem, dei blong Jeova blong jajem ol man i klosap olsem wanem?

¹⁷ ?Dei blong Jeova blong jajem ol man i klosap olsem wanem? Long Sefanaea 1:​14-​16, God i givim promes ya se: “Bigfala Dei ya blong Hae God i kam klosap finis. I no longtaem, bambae i kamtru. Dei ya i nogud we i nogud. Nating we i gat ol soldia we oli save faet, be long dei ya, bambae oli krae, from we tingting blong olgeta bambae i foldaon olgeta. Dei ya, bambae i dei blong kros blong Hae God, mo i dei blong man i trabol, i harem nogud. Long dei ya, Hae God bambae i spolem olgeta samting. Long taem ya, bambae long dei nomo, be ples bambae i kam tudak olgeta, mo klaod we i blak we i blak bambae i kavremap olgeta ples. Long dei ya, bambae i gat noes blong ol pupu blong talemaot we faet i stap kam, mo noes blong ol soldia, we oli stap singsingaot blong kam faet agens long ol man blong ol bigfala taon we ol stonwol i goraon long olgeta, mo agens long ol man long ol wajhaos we oli hae we i hae.”

19, 20. (a) Talem sam samting we i hapen taem God i soemaot kros blong hem agensem Juda mo Jerusalem. (b) ?From we Jeova i no spolem evri man long wol, wanem sam kwestin we i gud blong tingbaot?

¹⁹ Taem ya we kros blong God i kamtru long Juda mo Jerusalem, i wan “dei blong man i trabol, i harem nogud.” Ol ami blong Babilon oli mekem ol man Juda oli safa bigwan, tingting blong olgeta i foldaon olgeta from we oli save se bambae oli ded mo oli lus. Long dei ya ‘ples i kam tudak olgeta, mo klaod we i blak we i blak i kavremap olgeta ples.’ Maet tok ya i wan pijatok nomo, be maet hem i bin kamtru stret olsem we profet tok ya i talem from we long taem ya, smok mo ol ded bodi oli stap long evri ples. Long dei ya, i gat “noes blong ol pupu blong talemaot we faet i stap kam,” be ol woning ya oli blong nating nomo.

²⁰ Ol wajman blong Jerusalem oli no save mekem wan samting nating taem ami blong Babilon i brekemdaon “ol wajhaos we oli hae we i hae.” Ol strong ples blong wol tede tu, bambae oli no strong inaf blong blokem ami blong ol enjel blong God long heven, we oli rere blong God i yusum olgeta blong spolem ol nogud man. ?Yu yu wantem sef long taem ya? !Ale, yu mas stanap strong long saed blong Jeova, we ‘oltaem hem i stap lukaot gud long olgeta we oli lavem hem, be i stap spolem olgeta we oli stap mekem ol fasin nogud!’​—Ol Sam 145:20.