• Kongregesen Bambae i Kam Strong Moa
    Wajtaoa—2007 | 1 Mei

    • 10. ?Folem Matiu 18:15-17, olsem wanem oli mas stretem ol bigfala problem insaed long kongregesen?

      10 Jisas i soemaot se bambae i gat oda insaed long kongregesen. Tingbaot tok blong hem long Matiu 18:15-17, we i tokbaot problem we i save kamaot bitwin tu man blong God, we maet wan i mekem i no stret long narawan. Jisas i talem se hemia we i harem nogud i mas go luk narawan we i mekem rong long hem, nao taem tufala nomo i stap, hem i mas “talemaot long hem, samting nogud ya we hem i mekem.” Sipos samting ya i no stretem problem ya, hem i save askem wan no tu narafala we oli savegud long bisnes ya blong oli givhan. ?Olsem wanem sipos hemia i no stretem problem ya yet? Jisas i talem se: “Sipos hem i no save lesin long yu yet, yu mas talemaot trabol ya long [“kongregesen,” NW]. Mo sipos hem i no save lesin long [kongregesen], yu mas mekem long hem olsem we hem i wan hiten man, no wan man blong tekem mane blong takis.” Taem Jisas i talem tok ya, ol man Isrel oli stap yet olsem “kongregesen blong God,” ale ol tok ya i go long olgeta fastaem.a Be taem Kristin kongregesen i stanap, tok ya blong Jisas i stret long kongregesen ya tu. Hemia i soemaot bakegen se i gat wan plan insaed long ol kongregesen blong ol man blong God, blong mekem ol wanwan Kristin oli strong moa, mo blong soemaot stret rod long olgeta.

      11. ?Wanem wok blong ol elda taem i gat problem blong stretem?

      11 I stret nomo we ol elda no ol man blong lukaot long ol wanwan kongregesen, oli wok long nem blong kongregesen blong harem mo stretem ol problem mo blong lukluk long ol bigfala sin we oli kamaot. Hemia i laenap wetem ol wok we ol elda oli mas naf blong mekem we Taetas 1:9 i tokbaot. Tru ya, ol elda oli no stret olgeta. Taetas tu i no stret olgeta, be Pol i sanem hem i go long ol kongregesen blong i “stretem ol problem.” (Taetas 1:4, 5) Tede, man we oli skelem hem blong luk sipos hem i naf blong kam wan elda, i mas soemaot longtaem finis se hem i gat bilif mo i lavem God. Olsem nao, ol narafala long kongregesen oli save trastem hem se bambae i soemaot stret rod long olgeta mo givim gudfala advaes.

  • Kongregesen Bambae i Kam Strong Moa
    Wajtaoa—2007 | 1 Mei

    • a Albert Barnes we i skul from Baebol, i talem se advaes blong Jisas blong “talemaot trabol ya long kongregesen” i save minim talemaot long “olgeta we oli gat raet blong lukluk long ol bisnes olsem—hemia ol man we oli wok long nem blong jos, no samfala we ol man ya oli putumap. Long haos prea blong ol man Jiu bifo, i gat ol elda we oli wok olsem ol jaj, mo olgeta ya nao oli harem olkaen trabol olsem.”