?Hu i Stap Talemaot Gud Nius Ya?

“Bambae oli talemaot long olgeta ples long wol . . . ”—MATIU 24:14.

OL WITNES blong Jehova oli stap talemaot gud nius ya long olgeta ples long wol. Oli mekem wok ya long plante defdefren rod. Wan rod hemia . . .

Toktok Blong Olgeta. Ol Witnes blong Jehova oli mekem olsem Jisas mo ol disaepol blong hem, oli go luk ol man blong talemaot gud nius long olgeta. (Luk 8:1; 10:1) Oli no wet long ol man blong oli kam luk olgeta. Bitim seven milian Witnes evriwan oli joen long wok ya blong talemaot Kingdom blong God. Oli prij long ol man long ol haos wanwan, long rod, long telefon mo oli yusum sam narafala fasin tu blong prij long man. Las yia, ol Witnes oli spenem moa long wan bilian faef handred milian aoa long wok ya.

Oli tijim ol man long saed blong Kingdom blong God, mo tu, long saed blong ‘olgeta tok we Jisas i givim finis.’ (Matiu 28:20) Evri manis oli mekem bitim eit milian Baebol stadi long ol man fri nomo.

Ol Witnes oli mekem wok blong prij long olgeta ples long wol, oli kasem 236 kantri. Oli prij long enikaen man. Oli prij long bus, long taon, long ol dakbus blong Amason mo Saebiria, long ol draeples blong Afrika, mo long ol bigfala Hil blong Himalaya. Oli no kasem mane long wok ya, be defren olgeta oli yusum mane mo taem blong olgeta blong mekem wok ya. Oli mekem olsem from we oli lavem God mo oli lavem ol narafala man. Wan narafala rod we oli yusum blong talemaot gud nius long ol man hemia . . .

Ol Buk We Oli Printim. Nem blong magasin ya we yu stap ridim hemia Wajtaoa i Talemaot Kingdom Blong Jehova. Ol Witnes oli printim magasin ya long 185 lanwis mo evri manis oli printim bitim 42 milian kopi blong hem. Narafala magasin we nem blong hem Wekap! i talemaot Kingdom tu. Oli printim Wekap! long 83 lanwis mo evri manis oli printim samwe long 40 milian kopi blong hem.

Ol Witnes oli wokem ol buk, ol buklet, ol traket, ol CD/MP3, mo ol DVD we oli eksplenem ol tijing blong Baebol long samwe 540 lanwis. Long ol 10 yia we oli pas, ol Witnes oli wokem mo oli seremaot bitim 20 bilian blong ol samting ya. !Hemia i min se evri man long wol i kasem tri no fo long ol samting ya we ol Witnes oli wokem!

Antap long ol samting ya, ol Witnes blong Jehova oli printim, no oli pem sam kampani blong oli printim, sam defren translesen blong Baebol. Ol Witnes oli tanem, printim, mo seremaot Baebol ya New World Translation of the Holy Scriptures. Naoia sam haf blong Baebol ya no ful Baebol ya i stap long 96 lanwis. Oli seremaot bitim 166 milian kopi blong Baebol ya. Wan narafala rod we ol Witnes oli yusum blong talemaot gud nius long ol man hemia . . .

Ol Kristin Miting. Ol Witnes oli mekem ol miting evri wik long ol Haos Kingdom long ples blong olgeta. Ol miting ya oli no ol jos seves nomo, be oli blong tijim ol man tu. Long ol miting ya, i gat ol tok long saed blong Baebol, mo oli yusum magasin ya Wajtaoa mo sam narafala buk bakegen, blong givhan long olgeta blong stadi long Baebol. Mo oli kasem tijing we i givhan long olgeta blong kam gud moa long wok blong talemaot gud nius.

Long ful wol, i gat bitim 107,000 kongregesen blong ol Witnes. Mo nomata wanem kongregesen ol Witnes oli stap long hem, oli kasem sem tijing, we i mekem se oli joen gud. Ol miting ya oli no blong ol Witnes nomo. Eni man we i wantem, i save kam lesin. I no gat kleksin. I tru se ol samting ya oli blong nating nomo sipos ol Witnes oli no mekem samting we oli lanem i wok long laef blong olgeta. Taswe, oli traehad blong pulum ol man blong lesin long gud nius taem oli . . .

Soemaot Gudfala Fasin. Oli traehad blong gat ol Kristin fasin, nao oli traem tingbaot oltaem blong mekem i gud long ol narafala man, olsem we oli wantem se ol narafala man oli mekem long olgeta. (Matiu 7:12) Nating se oli sinman mo samtaem oli mestem, oli wantem tumas blong mekem fasin we i soemaot se oli lavem olgeta man. Oli mekem samting ya taem oli talemaot gud nius long narafala, mo tu, taem oli givhan long ol man long sam narafala rod bakegen.

Wok blong prij we ol Witnes blong Jehova oli mekem i no blong jenisim bilif blong olgeta man long wol. Nogat. Wok ya bambae i kasem mak we Jehova i luk se i stret, biaen en bambae i kam olsem we Jisas i talem. ?Long taem ya, wanem bambae i hapen long wol mo ol man we oli stap long wol?

[Tok blong pija long pej 7]

Naoia ol Witnes blong Jehova oli stap talemaot gud nius long ol man long olgeta ples long wol

?“En” Blong Wanem?

“. . . nao biaen bambae en i save kam.”—MATIU 24:14, NW.

OL MAN oli toktok plante long saed blong en blong wol. Oli wokem ol buk, muvi, mo ol magasin, long saed blong ol defdefren samting we oli save hapen long en blong wol ya. Sam long olgeta i blong mekem man i laf nomo, be sam oli tokbaot ol save blong ol saentis. Oli tokbaot sam samting we i save spolem laef long wol ya. Sam long ol samting ya hemia, wan bigfala faet we ol man oli yusum ol bom blong posen gas, wan bigbigfala ston long skae i kilim wol, wan nogud sik i kilim olgeta man i ded, wol i kam hot tumas, no ol laef samting blong ol narafala planet oli kam rulum wol.

Ol jos tu oli gat defdefren tingting long saed ya. Plante oli talem se “en” i min se bambae i no moa gat wan samting i laef long wol. Wan man we i stadi long ol tijing blong Baebol mo jos, i talem long saed blong Matiu 24:14 se: “Vas ya i wan long ol vas we i impoten tumas long Tok blong God . . . Yumi tede, yumi no wantem tingbaot bigfala trabol we i stap long fored blong yumi from se i tru tumas we plante plante man oli save ded.”

Ol man we oli gat tingting olsem, oli no tingbaot wan impoten samting. Hemia se Jehova God i mekem wol ya “i strong, blong i save stap longtaem.” Hem i “no mekem blong i ples nating nomo, hem i mekem blong man i save stap long hem.” (Aesea 45:18) Taswe taem Jisas i tokbaot “en,” hem i no stap tokbaot wol se bambae i lus, mo hem i no stap tokbaot se ol man evriwan bambae oli lus. Nogat. Hem i stap tokbaot ol man nogud we bambae oli lus, hemia olgeta we oli no wantem folem ol tok blong Jehova long laef blong olgeta.

Yu traem tingbaot sipos yu gat wan haos we i naes we i naes. Ale yu letem sam man oli stap long hem we oli no pem. Sam long olgeta ya oli stap gud tugeta, oli gat pis, mo oli lukaot gud long haos blong yu. Be sam narafala oli mekem se i gat plante trabol, oli faet oltaem, mo oli tok nogud long ol narafala we fasin blong olgeta i gud. Oli no lukaot gud long haos blong yu, mo nating se yu givim woning long olgeta, be oli no wantem save.

?Bambae yu yu mekem wanem blong stretem bisnes ya? ?Bambae yu spolem haos blong yu? Nogat. Ating bambae yu ronemaot ol man nogud ya mo yu riperem haos blong yu bakegen.

Jehova bambae i mekem sem samting long saed blong wol ya. Hem i pulum wan man blong raetem Ol Sam blong talem se: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta. Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:9-11.

Aposol Pita i tokbaot samting ya tu. God i pulum hem blong raetem se: “God i tok, nao skae mo graon tufala i kamaot. Hem i mekem graon ya i kamaot long medel blong ol wota, mo hem i yusum wota ya blong wokem olgeta ples long wol. Mo long sem fasin, hem i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan.” (2 Pita 3:5, 6) Long vas ya, aposol Pita i tokbaot Bigfala Wota we i ron long taem blong Noa. Long taem ya, ol man nogud oli lus, be wol no graon we yumi stap long hem i no lus. Bigfala wota ya we i ron mo i kavremap olgeta ples long wol, i “soemaot fasin we [God] bambae i save mekem long ol man we oli kam biaen, we oli no obei long hem.”—2 Pita 2:6.

Ale Pita i talem se: “Skae mo graon we i stap naoia, . . . tufala i stap wet blong bambae faea i kasem tufala.” Sipos yumi stop long ples ya, ating yumi save gat rong tingting long vas ya. Taswe i gud yumi luk narafala haf blong vas ya, i se: “God i promes finis blong putum niufala skae [Kingdom blong God we Mesaea i rulum] mo niufala wol [ol man we fasin blong olgeta i stret], we stret fasin nomo bambae i stap long hem. Mo yumi stap wet long ol samting ya blong oli kamtru.”—2 Pita 3:7, 13.

Ol profet tok long Baebol oli soemaot se “en” i klosap. Plis yu ridim Matiu 24:3-14 mo 2 Timoti 3:1-5 blong luk ol samting we oli soemaot se i tru we “en” i klosap.a

Ol tok blong Matiu 24:14 i no fasfas, ol pikinini tu oli naf blong kasem save long hem. Be sipos i olsem, ?from wanem i gat ol defdefren tingting long saed blong vas ya? Hemia from we Setan i stap satem tingting blong ol man, blong oli no luksave ol nambawan trutok blong Tok blong God. (2 Korin 4:4) Mo tu, God i haedem ol plan blong hem long ol man we oli flas, be hem i soemaot ol plan blong hem long ol man we tingting blong olgeta i stap daon. Jisas i tokbaot samting ya, i se: “Papa. Yu yu Hae God, yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli save gud.” (Matiu 11:25) !Yes, ol man we oli gat tingting daon, oli gat nambawan janis blong kasem save long Kingdom blong God, mo oli save putum tingting blong olgeta i stap strong long ol blesing we Kingdom ya bambae i karem long ol man we oli stap aninit long rul blong hem!