⁶ Blong givhan long ol aposol blong oli kasem save from wanem oli no mas fraet, Jisas i talem tu pijatok long olgeta. Hem i se: “Ol smosmol pijin ya we man i stap salem [“faef,” NW] vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.” (Matiu 10:​29-31) Makemgud olsem wanem Jisas i joenem fasin no fraet wetem strong tingting se Jeova i save lukaotgud long yumi wanwan. I klia se aposol Pol i gat strong tingting ya tu. Hem i raetem se: “God i stap wetem yumi, mo i no gat man nating we i strong moa, we bambae i save agens long yumi. God i no holemtaet stret Pikinini blong hem, i letem hem i ded blong sevem yumi evriwan. . . . Bambae hem i no moa save holemtaet ol narafala samting blong hem, bambae i givim olgeta oli kam nomo long yumi.” (Rom 8:​31, 32) Nomata wanem trabol yu yu kasem, yu save bilif strong se Jeova bambae i lukaotgud long yu sipos yu stap tru long hem. Yumi luksave samting ya i klia moa, taem yumi skelem moa ol advaes ya we Jisas i givim long ol aposol blong hem.

Praes Blong Wan Smol Pijin

7, 8. (a) ?Wanem tingting blong ol man long taem bifo, long saed blong kaen pijin ya we Jisas i tokbaot? (b) ?From wanem Matiu 10:29 i yusum Grik tok ya we i minim “ol smosmol pijin”?

⁷ Pijatok blong Jisas i soemaot gud olsem wanem Jeova i kea long ol wanwan man blong hem tede. Tingbaot smol pijin ya we Jisas i tokbaot. Long taem blong Jisas, ol man oli kakae ol pijin ya. Be from we ol smosmol pijin ya oli stap spolem kakae long garen, klosap evri man i tingbaot olgeta olsem wan nogud samting. Ol pijin ya oli plante we plante mo oli no sas nating. Ol man oli save pem tu blong faef vatu nomo. !Sipos man i holem ten vatu, hem i save pem faef pijin, i no fo​—oli givim namba faef pijin olsem we i nating nomo!​—Luk 12:​6, NW.

⁸ Tingbaot tu, se pijin ya i smol we i smol. Kaen pijin ya we Jisas i tokbaot, nating se hem i mama no papa finis, be hem i smol yet. Grik tok we Jisas i yusum long Matiu 10:​29, i no minim enikaen“pijin” nomo, be i minim ol smosmol pijin. I klia se Jisas i wantem ol aposol blong hem blong tingbaot wan pijin we i smol we i smol, mo i no impoten nating. Wan buk i talem se: “!Jisas i tokbaot kaen pijin we i smol finis, be antap long hemia, hem i ademap tok ya ‘smosmol’ bakegen!”

9. ?Wanem bigfala poen we Jisas i soemaot long pijatok blong ol smosmol pijin ya?

⁹ Pijatok ya blong Jisas long saed blong ol smosmol pijin, i makem wan bigfala poen: Samting we ol man oli ting se i no impoten, be Jeova God i save ting se i impoten tumas. Jisas i talem wan narafala samting tu blong soemaot poen ya. Hem i talem se, taem wan long ol smosmol pijin ya i “foldaon long graon,”c Jeova i makem. Ale, bigfala poen long pijatok ya i klia. !Sipos Jeova God i kea long ol smosmol pijin we oli no impoten nating, bambae hem i mas kea bigwan long laef blong ol wanwan man we oli jusum blong mekem wok blong hem!