• ?Bambae Yu Yu Stambol From Jisas?
    Wajtaoa (Stadi)—2021 | Mei

    • (3) JISAS I NO FOLEM OL KASTOM BLONG OL MAN JIU

      Plante oli stambol from Jisas i no wantem folem kastom blong olgeta. ?Olsem wanem ol semfala samting ya oli mekem ol man oli stambol tede? (Haf 13)d

      13. ?From wanem plante man oli no laekem Jisas?

      13 Long taem blong Jisas, ol disaepol blong Jon Baptaes oli sapraes from we ol disaepol blong Jisas oli no mekem fasting. Jisas i eksplenem se taem hem i laef yet, i no nid blong oli mekem fasting. (Mat. 9:14-17) Be ol Farisi mo ol man we oli agensem Jisas, oli no laekem hem nating from we hem i no folem ol kastom blong olgeta. Oli kros taem Jisas i hilim ol sikman long Sabat. (Mak 3:1-6; Jon 9:16) Oli praod se oli stap obei long loa blong Sabat, be oli girap oli gohed blong mekem bisnes insaed long tempol. Mo taem Jisas i tok strong long olgeta from samting we oli stap mekem, oli kros tumas long hem. (Mat. 21:12, 13, 15) Mo olgeta we Jisas i prij long olgeta insaed long sinagog long Nasaret oli kros we oli kros, taem Jisas i talem se oli olsem ol man Isrel bifo we oli tingbaot olgeta nomo mo oli no gat bilif. (Luk 4:16, 25-30) From we fasin blong Jisas i defren long wanem we ol man oli ekspektem, plante man oli stambol.—Mat. 11:16-19.

      14. ?From wanem Jisas i no folem ol kastom we oli no laenap wetem Baebol?

      14 ?Baebol i talem wanem? Tru long profet Aesea, Jehova i talem se: “Ol man ya oli kam klosap long mi long maot nomo mo oli stap ona long mi long lips blong olgeta nomo, be hat blong olgeta i stap longwe tumas long mi. Mo fasin blong olgeta blong fraet long mi i stanap long ol loa blong man nomo, hemia ol loa we ol man oli bin tijim ol man long hem.” (Aes. 29:13) Jisas i mekem i stret nomo taem hem i no wantem folem kastom blong ol man we i no stanap long Baebol. Olgeta we oli ting se rul mo kastom blong man i moa impoten i bitim Baebol, oli soemaot se oli no bilif long Jehova mo long hemia we hem i sanem hem i kam olsem Mesaea.

  • ?Bambae Yu Yu Stambol From Jisas?
    Wajtaoa (Stadi)—2021 | Mei

    • (4) JISAS I NO JOEN LONG POLITIK

      Plante oli stambol from Jisas i no joen long politik. ?Olsem wanem ol semfala samting ya oli mekem ol man oli stambol tede? (Haf 17)e

      17. ?Wanem rong tingting we i mekem plante man oli stambol?

      17 Sam man long taem blong Jisas oli wantem se gavman i jenis. Oli ting se Mesaea nao bambae i mekem oli kam fri long strong rul blong ol man Rom. Be taem oli traem putumap Jisas blong i kam king, Jisas i no wantem. (Jon 6:14, 15) Sam narafala, inkludum ol pris oli fraet se bambae Jisas i traem jenisim gavman, we hemia i save mekem se gavman blong Rom i save kam kros mo i tekemaot olgeta long posisen blong olgeta. From we sam man Jiu oli wari long saed blong politik, hemia i mekem oli stambol.

      18. ?Wanem profet tok long saed blong Mesaea we plante oli no wantem save long hem?

      18 ?Baebol i talem wanem? Nating se plante profet tok oli tokbaot se Mesaea bambae i wan Nambawan Man we i win long faet, be sam narafala profet tok oli talem se hem i mas ded fastaem from ol sin blong yumi. (Aes. 53:9, 12) Taswe, ?from wanem ol man ya oli gat rong tingting long saed blong Mesaea? Plante man long taem blong Jisas oli no wantem save long ol profet tok we oli no givhan blong stretem ol problem blong olgeta kwiktaem.—Jon 6:26, 27.