Sakem Ol Tingting Blong Wol, Lukaot Ol Trufala Samting Blong Kingdom

“Yufala i mas gohed blong lukaot kingdom mo stret fasin blong hem fastaem. Ale, biaen bambae hem i givim olgeta narafala samting ya tu long yufala.”​—MATYU 6:33, NW.

1. ?Tok blong God i givim wanem woning long saed blong hat, mo hem i save trikim yumi long wanem rod?

“SAMTING we yu mas lukaot moa long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stampa blong laef.” (Proveb 4:23) ?From wanem waes King Solomon i givim woning ya? From we “hat i fulap long gyaman, i bitim ol narafala samting, mo hem i no save kamgud bakegen.” (Jeremaea 17:9) Wan long olgeta rod we hat blong yumi i save trikim yumi long hem se hem i save pulum yumi fulwan long ol tingting blong wol ya. ?Wanem ol tingting ya? Hemia ol gyaman tingting, ol drim, tingting i olbaot. Taem ol drim ya oli kam olsem ol tingting blong wol, oli kakae taem blong man, mo tu oli save spolem man. Taswe, yumi mas lego ol tingting olsem. Sipos yumi no laekem nating fasin blong brekem loa olsem Jisas, bambae yumi lukaotgud se hat blong yumi i no pulum yumi long ol tingting blong wol.​—Hibrus 1:​8, 9.

2. ?Wanem ya ol tingting blong wol, mo from wanem yumi mas sakemaot olgeta?

² ?Wanem ya ol tingting blong wol? Hemia ol tingting blong wol ya we Setan i bos long hem. Aposol Jon i tokbaot samting ya, i se: “Ol fasin ya we i stap long wol oli olsemia. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.” (1 Jon 2:16; 5:19) ?From wanem ol Kristin oli mas sakem ol tingting blong wol? From we ol tingting olsem oli save pusum hat mo tingting blong man blong i wantem ol samting we hem i save haremgud long ol. Drim blong mekem samting we i rong i save kam olsem wan samting we man i stap tingrere blong mekem. Disaepol Jemes i givim woning ya long yumi, i se: “Ol samting blong traem man oli save kam strong long hem taem hem i wantem ol samting nogud, nao fasin ya blong wantem ol samting nogud i kasem hem, i pulum hem i foldaon. Be taem hem i wantem tumas ol samting nogud, fasin ya bambae i kam bigfala moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigfala moa long hem, nao bambae man ya i ded from.”​—Jemes 1:​14, 15.

Ol Eksampel Blong Givim Woning

3. ?Store blong hu i givim woning long yumi long saed blong ol tingting we man i stap tingbaot hem wan?

³ Yumi tingbaot sam eksampel we oli soemaot from wanem yumi mas sakem ol tingting blong wol. Fasin blong Devel Setan i soemaot nogud frut we i save kamaot taem man i stap tingbaot hem wan nomo. Setan i letem tingting ya se hem i gud moa long ol narafala i stap wok long hat blong hem ale i pusum hem blong traem tekemaot haenem blong Jeova we hem i Hae Rula long heven mo long wol mo hem i wantem ol man oli wosip long hem. (Luk 4:​5-8) ?Hemia i wan gyaman tingting? Yes. !Tingting ya i no tru! Blong pruvum se i no tru, bambae Setan i kalabus long wan taosen yia mo bambae oli sakem hem i go long “bigfala hol ya blong faea,” hemia namba tu ded.​—Revelesen 20:​1-3, 10.

4. ?Olsem wanem Setan i trikim Iv?

⁴ Yumi gat wan narafala eksampel olsem woning long yumi hemia long saed blong faswan woman, Iv. Taem Setan i stap traehad blong kasem samting we hem i wantem, hem i pulum Iv blong tingting se sipos Iv i kakae long tri ya we God i putum tabu long hem, bambae hem i no save ded be bambae hem i kam olsem God, bambae hem i save wanem i gud mo wanem i nogud. ?Hemia gyaman tingting, we i fasin blong tingbaot hem wan nomo? Yes hem i wan gyaman tingting, olsem we yumi save luk taem Jeova i jajem Iv mo hasban blong hem, Adam, blong tufala i mas kasem panis. From samting ya, tufala i lusum raet blong tufala mo ol pikinini blong tufala we oli no stretgud olgeta blong oli save laef long Paradaes.​—Jenesis 3:​1-19; Rom 5:12.

5. ?Wanem samting i mekem sam enjel pikinini blong God oli foldaon, mo wanem samting i kamaot long olgeta?

⁵ Yumi gat ol eksampel tu olsem ol woning long yumi hemia long saed blong fasin blong sam enjel pikinini blong God. (Jenesis 6:​1-4) Oli no glad long ol blesing we oli stap haremgud long hem long heven long ples ya we Jeova i stap long hem, olgeta oli stap tingbaot ol woman blong wol mo oli stap tingbaot olsem wanem oli save haremgud long fasin blong slip wetem ol woman ya. Ol enjel ya we oli no moa obei long God oli stap kalabus long tudak long saed blong speret long Tatarus mo oli stap wet blong bambae oli lus olgeta long en blong Wan Taosen Yia Rul blong Jisas Kraes, from we oli folem ol tingting ya.​—2 Pita 2:4; Jud 6; Revelesen 20:10.

Sakem Ol Tingting Blong Wol

6, 7. ?From wanem ol tingting blong wol long saed blong ol rij samting oli nogud mo oli save trikim man?

⁶ I gud yumi tingbaot wan long ol bigfala samting mo rabis tingting we Setan i stap yusum. Long olgeta kaen nyus, hem i traem pulum yumi long ol tingting blong wol. Oltaem ol samting ya oli pulum man blong i wantem ol rij samting. Hem i no rong blong gat ol rij samting. Ol man blong God olsem Ebraham, Jekob, mo King Deved oli rijman, be oli no stap wantem tumas blong kasem ol rij samting. Ol tingting blong wantem ol rij samting blong wol i pusum ol man blong wok had long plante yia blong oli kam rijman. Ol tingting olsem tu oli pusum ol man blong oli save foldaon long ol defren kaen fasin blong plelaki, olsem fasin blong pem tikit from ol hos we oli resis mo oli stap pem ol loteri tikit. I nogud yumi stap tingbaot ol gyaman tingting long saed blong ol rij samting. Sipos yumi stap tingting se ol rij samting bambae oli givim seftaem long yumi, i gud blong tingbaot trutok blong Proveb ya se: “Ol sas samting bambae oli no save givhan long man long dei blong kros blong God, be stret fasin nomo bambae i sevem ol man long ded.” (Proveb 11:4) Tru ya, ol rij samting bambae oli no save sevem man long taem blong “bigfala trabol.”​—Matyu 24:21; Revelesen 7:​9, 14.

⁷ Ol rij samting oli save trikim yumi i isi nomo. From samting ya Baebol i talem long yumi se: “Ol sas samting blong ol rijman i olsem strong taon blong hem, mo long tingting blong hem, ol sas samting ya oli olsem wan stonwol we i blokem hem long ol trabol.” (Proveb 18:11) Yes, “long tingting blong hem” nomo, be ol rij samting ya oli no save givhan bigwan long hem taem mane i lusum paoa blong hem, taem bisnes i foldaon, taem i gat trabol long politik, no taem blong sik. Jisas Kraes i agensem fasin blong trastem ol rij samting. (Luk 12:​13-21) Mo tu yumi gat ol woning blong aposol Pol, se: “Fasin blong laekem mane tumas, hem i stampa blong olgeta fasin nogud. Mo i gat sam man we oli strong blong folem fasin ya, we oli gowe finis long fasin blong bilif. Nao oli stap mekem ol samting we olgeta tu oli harem nogud tumas from.”​—1 Timote 6:10.

8. ?Olsem wanem ol tingting blong wol long saed blong seks i kam bigwan tede, mo wanem trabol hem i givim?

⁸ Ol narafala tingting hem i long saed blong ol nogud fasin blong seks. Yumi luksave se ol sinman oli laekem tingbaot ol samting long saed blong seks from we fasin blong lesin long ol rabis toktok long telefon i kam antap, ol man oli save ring long sam telefon namba mo oli lesin long ol rabis mesej long saed blong seks. Long Amerika, bisnes blong givim ol rabis mesej long saed blong seks long telefon i wan bigfala bisnes we i winim bigfala mane from. ?Sipos yumi stap tingbaot ol nogud fasin blong seks, ating yumi gat tu fes ya, ating yumi stap soem nomo long lukluk blong ol man se yumi ol klin Kristin? ?Mo ating trabol i stap se ol tingting olsem oli save lidim man blong mekem i nogud long saed blong seks? Samting ya i bin kamaot mo oli sakemaot sam man long Kristin kongregesen from we oli stap slip wanples oli no mared no oli stilim man no woman blong narafala man. Tok blong Jisas long Matyu 5:​27, 28, i se olgeta we oltaem oli stap tingbaot ol tingting olsem oli mekem nogud finis wetem woman no man long hat blong olgeta.

9. ?Wanem gudfala advaes we Baebol i givim long saed blong ol tingting blong wol?

⁹ Blong winim slak fasin blong hat blong yumi ol sinman, blong yumi no stap tingbaot ol tingting ya, yumi mas tingbaot woning blong Pol, se: “I no gat wan samting nating long wol ya we God i mekem, we i save haed long fes blong God. Olgeta samting oli stap olsem long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.” (Hibrus 4:13) Oltaem yumi mas wantem mekem olsem Moses, hem i “stap luk God ya we man i no save luk long ae blong hem.” (Hibrus 11:27) Yes, oltaem yumi mas talem long yumi wanwan se ol tingting blong wol Jeova i no laekem nating mo ol tingting ya oli save spolem yumi nomo. Yumi mas tingbaot blong wokem ol frut blong tabu speret blong God, olsem fasin blong bos long tingting, yumi no save ronwe long trutok ya se sipos yumi stap planem ol samting long saed blong bodi, bambae yumi kasem ol rabis frut nomo long saed blong bodi.​—Galesia 5:​22, 23; 6:​7, 8.

Ol Trufala Samting Blong Kingdom

10, 11. (a) ?Wanem samting i soemaot se God i stap? (b) ?Wanem pruf i stap se Baebol i rili Tok blong God? (c) ?Wanem samting i soemaot se King blong Kingdom blong God i rili stap?

¹⁰ Gudfala rod blong sakem ol tingting blong wol i blong stap gohed blong lukaot ol trufala samting blong Kingdom. Ol trufala samting blong Kingdom we God i wokem oli defren olgeta long ol tingting blong wol. ?God i tru? I no gat kwestin long saed ya se God i stap, no hem i no stap. Ol samting we oli stap raonabaot long yumi oli soemaot klia samting ya. (Rom 1:20) Yumi tingbaot bakegen tok ya we oli bin raetem bitim wan handred yia finis long buk ya The Divine Plan of the Ages, we Watch Tower Sosaete i wokem. Hem i talem se: “Man we i lukluk i go antap long skae wetem glas no wetem prapa ae blong hem, mo i luk bigfala wok blong God, ol samting long skae oli stap gud, oli luk naes, mo ol samting oli stap long stret ples blong olgeta, oli wok gud tugeta mo oli plante tumas, sipos man i no bilif yet se i gat wan Man we i i hae moa long hem mo i wokem ol samting ya long waes mo paoa blong hem, no man ya i ting se ol samting ya oli kamaot olsem nomo, i no gat Man i wokem olgeta, man ya i aot olgeta long stret tingting no hem i lusum hed, i stret we Baebol i singaotem man olsem, se hem i wan krangke man (man we i no wantem luksave no hem i no save tingtinggud).”​—Ol Sam 14:1.[3]

¹¹ Olgeta samting we yumi lanem long saed blong Kingdom oli stap long Tabu Tok ya Baebol. ?I tru we Baebol i Tok blong God? Yes hem i Tok blong God from, yumi luk se ol tok blong hem oli laenapgud, hem i stret wetem sayens, mo hem i gat paoa blong jenisim laef blong ol man mo from we ol profet tok blong hem oli stap kamtru.a ?Olsem wanem long King ya blong Kingdom blong God, Jisas Kraes? ?Hem i rili stap? Ol store blong Gospel mo ol leta blong Kristin Grik haf blong Baebol we God i yusum ol man blong oli raetem oli talemaot mo oli pruvum histri blong laef blong Jisas Kraes. Long saed blong histri blong Jisas, i gat pruf tu long store (Talmud) blong ol man Jyu, we i tokbaot hem olsem wan man. Mo tu long ol man blong raetem histri we oli man Jyu mo oli man Rom long faswan handred yia K.T. oli mekem sem mak.

12, 13. ?Wanem samting oli soemaot se Kingdom blong God i tru?

¹² ?Olsem wanem long Kingdom ya? Krisendom i no wantem luksave Kingdom ya, olsem wan haeman blong Presbyterian i talem: “Bitim tate yia finis we mi no moa harem wan pasta i traem blong eksplenem long ol man blong hem se Kingdom i rili stap.” Be, hemia nao stampa tok blong Baebol se Kingdom bambae i mekem nem blong God i tabu. God nomo i mekem faswan promes long saed blong Kingdom, hem i se: “Yu mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli stap badfren long olgeta. Nao ol pikinini ya blong hem bambae oli stap smasem hed blong ol pikinini ya blong yu, mo ol pikinini ya blong yu bambae oli stap kakae leg blong ol pikinini ya blong hem.” (Jenesis 3:15) Nesen blong Isrel i pija blong Kingdom ya, olsem long taem blong rul blong King Solomon. (Ol Sam 72) Biaen, taem Jisas i prij, Kingdom i stampa tok blong hem. (Matyu 4:17) Hem i yusum plante parabol blong tokbaot Kingdom ya, olsem ol parabol we oli stap long Matyu japta 13. Jisas i talem long yumi blong prea from Kingdom ya mo blong stap lukaotem Kingdom ya fastaem. (Matyu 6:​9, 10, 33) Kristin Grik haf blong Baebol i tokbaot Kingdom blong God kolosap 150 taem.

¹³ Kingdom ya i wan trufala gavman, hem i gat paoa mo hem i save rul antap long man, mo hem bambae i mekem ol samting we man oli stap wantem oli kamtru. Hem i gat ol loa blong hem, we oli stap long Baebol. Kingdom ya i mekem plante samting oli kamtru finis. Hem i gat ol man we oli stap aninit long hem​—bitim fo milyan Wetnes blong Jeova. Long 211 kantri ol Wetnes oli stap talemaot gud nyus blong Kingdom blong God, olsem Matyu 24:14 i talem. Long wok blong olgeta long 1991, oli spenem 951,870,021 haoa blong talemaot mesej blong Kingdom ya. Yumi luk se wok ya i karem frut, ol frut we i save stap blong olwe olsem we bigfala hif blong ol man oli stap lanem “klin lanwis” blong trutok blong Baebol.​—Sefanaea 3:9.

Lukaotem Ol Trufala Samting Blong Kingdom

14. ?Olsem wanem yumi save mekem bilif blong yumi se Kingdom i rili stap i strong moa?

¹⁴ ?Olsem wanem yumi save lukaotem ol trufala samting blong Kingdom? Hop blong yumi i mas stanap strong long strong bilif. Promes blong God long nyufala wol i mas olsem wan trufala samting long yumi. (2 Pita 3:13) Mo yumi mas gat bilif long promes ya se God “bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:4) ?Olsem wanem yumi save se hemia i no wan drim nomo? Hem i mas kamtru long prapa taem blong God, from we God i no save gyaman. (Taetas 1:​1, 2; Hibrus 6:18) Yumi mas tingting dip long ol promes ya. Tingbaot olsem wanem yumi save stap long nyufala wol ya blong God mo haremgud long ol blesing blong hem, hemia i no wan gyaman tingting be fasin ya i soemaot se yumi gat bilif. Olsem Pol i tokbaot mining blong bilif i se, “Fasin ya we yumi bilif long God, hem i soemaot long yumi we olgeta samting ya we yumi stap putum tingting blong yumi i strong long hem, be oli tru. Fasin ya i soemaot long yumi we olgeta samting ya we yumi no save luk, be oli stap.” (Hibrus 11:1) I gud yumi mekem bilif blong yumi i strong taem yumi stadi oltaem long Tok blong God mo ol Kristin buk blong givhan long yumi blong save Baebol mo mekem ol save ya i wok long laef blong yumi. Sipos yumi yusum moa taem blong talemaot Kingdom long ol narafala man, long ol haos wanwan mo taem yumi tekem jans blong toktok wetem olgeta, yumi stap mekem bilif blong yumi i kam strong moa mo hop blong yumi long Kingdom i kam klia moa.

15. ?Wanem samting yumi mas mekem long saed blong Kristin minista wok blong yumi?

¹⁵ Mo tu yumi mas wok folem ol trufala samting blong Kingdom ya olsem yumi kamgud moa long minista wok blong yumi. ?From we i gat plante wok blong mekem yet, olsem wanem yumi save mekem? (Matyu 9:​37, 38) Tok ya blong ol man i tru se, i no gat man we i olfala tumas blong i no moa save lanem sam samting. Nating se yumi mekem wok blong prij long plante yia finis, yumi save kamgud moa long wok ya. Sipos yumi kamgud moa long fasin blong yumi blong yusumgud Tok blong God bambae yumi save kamgud moa blong givhan long ol narafala man blong harem tok blong King Jisas Kraes. (Lukluk Jon 10:16.) Taem yumi tingbaot se ol man oli save laef no oli save ded blong olwe long fyuja yumi mas wantem wokemgud teritori blong yumi blong yumi save givim jans long ol man blong oli soemaot se oli stap long saed blong hu, long saed blong ol man olsem “sipsip” no long saed blong ol man olsem “ol nani.” (Matyu 25:​31-46) Tru ya, i minim se yumi mas raetemgud nem blong ol man we oli no stap long haos mo nem blong olgeta we oli intres long mesej blong Kingdom.

Gohed Blong Lukaotem Kingdom

16. ?Hu i givim wan gudfala eksampel long fasin blong lukaotem ol trufala samting blong Kingdom, mo olsem wanem oli “faet” blong kasem Kingdom ya?

¹⁶ I nidim fasin traehad blong gohed blong lukaotem ol trufala samting blong Kingdom. ?Olsem wanem, eksampel blong ol Kristin we tabu speret i makemaot olgeta i leftemap tingting blong yumi? Olgeta oli stap lukaotem ol trufala samting blong Kingdom long plante yia finis. Jisas i tokbaot fasin ya blong olgeta olsem: “I stat long taem ya we Jon Baptaes i stat prij, i kam kasem tede, be ol man oli stap faet long ol man we God i kam king blong olgeta finis. Mo ol man blong faet oli stap traem blong pulumaot ol man ya, blong oli kam man blong olgeta.” (Matyu 11:12) Tingting long vas ya i no se ol enemi oli tekem Kingdom. No gat. Be, hem i soemaot wok blong olgeta we oli blong go insaed long Kingdom ya. Wan studen blong Baebol i se: “Long fasin ya hem i tokbaot se ol man oli wantem tumas, oli stap traehad oltaem mo oli stap traehad blong kasem kingdom blong Mesaea we i stap kam.” Ol Kristin we tabu speret i makemaot olgeta oli traehad blong kasem Kingdom ya. Sem mak ol “narafala sipsip” oli mas traehad tu blong kasem mak we oli naf blong stap aninit long Kingdom blong God long heven.​—Jon 10:16.

17. ?Ol man we oli stap gat ol tingting blong wol bambae oli kasem wanem?

¹⁷ Tru ya, yumi stap laef long wan spesel taem blong wok. Olgeta we oli stap lukaotem ol tingting blong wol, bambae wan dei oli sek mo bambae oli luk ol trufala samting. Bambae i olsem tok ya i talem: “Bambae i mas kamaot olsem. Taem wan man we i hanggri i stap drim mo i olsem we hem i stap kakae, be taem hem i wekap, hem i hanggri; mo olsem wan man we i tosta hem i stap drim mo i olsem we hem i stap dring, be taem hem i wekap long drim blong hem, hem i taed tumas mo hem i no moa gat wora long bodi blong hem.” (Aesea 29:8) Sem mak olsemia, ol tingting blong wol bambae oli no mekem wan man i haremgud no i kasem ol samting we hem i wantem.

18. ?Long saed blong ol trufala samting blong Kingdom, wanem rod yumi mas folem, mo wanem samting yumi save tingbaot blong kasem?

¹⁸ Kingdom blong Jeova i wan trufala samting. Hem i stap rul naoia, be rabis fasin blong wol ya i stap go long wan bigfala trabol blong finisim hem olgeta. Taswe tingbaot advaes ya blong Pol, i se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud.” (1 Tesalonaeka 5:6) I gud yumi stap putum hat mo tingting blong yumi long ol trufala samting blong Kingdom mo haremgud long ol blesing blong hem blong olwe. Mo i gud sipos bambae yumi harem tok blong King blong Kingdom ya se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.”​—Matyu 25:34.

[Futnot]

?Olsem Wanem Yu Yu Ansa?

◻ ?Wanem ya ol tingting blong wol, mo from wanem yumi mas sakemaot olgeta?

◻ ?Wanem eksampel oli soemaot ol nogud samting we i kamaot taem man i stap tingbaot ol samting blong wol?

◻ ?Wanem samting oli pruvum se God i stap, Baebol i Tok blong Hem, Jisas Kraes mo Kingdom i rili stap?

◻ ?Olsem wanem yumi save mekem bilif blong yumi long ol trufala samting blong Kingdom i kam strong moa?

[Tok Blong Pija Long Pej 15]

Ol tingting blong wol oli kamaot taem man i wantem tumas ol rij samting

[Tok Blong Pija Long Pej 16]

Wok blong talemaot gud nyus hem i wan rod blong lukaotem ol trufala samting blong Kingdom

[Tok Blong Pija Long Pej 17]

?Yu yu stap lukaotem ol trufala samting blong Kingdom taem yu traehad blong stadi long Tok blong God?