Wan Nambawan Rul Blong Wan Taosen Yia i Kam Kolosap

“Nao mi luk sam bigfala jea olsem jea blong king oli stap. Mo ol man we i stap sidaon long ol jea ya, God i givim paoa long olgeta blong jajem ol man. Nao mi luk speret blong olgeta ya tu we ol man oli katemaot hed blong olgeta bifo, from we oli stap talemaot trutok ya we Jisas i wetnes long hem se i tru, mo oli stap talemaot tok blong God. Olgeta ya oli no mekem wosip samtaem long anamol ya we i nogud, mo long pija blong hem. Mo oli no gat mak blong anamol ya long fes blong olgeta, mo long han blong olgeta. Nao oli laef bakegen, oli joen wetem Kraes, we hem i king, nao oli rul wetem hem, gogo wan taosen yia i pas.” “Hem [God] bambae i ravemaot wora blong ae blong olgeta [ol man]. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 20:4; 21:4.

BAEBOL i talem longtaem finis se Kraes mo wan kampani blong king bambae oli rul tugeta long heven long Wan Taosen Yia. Maet yu yu gat tingting se profet tok ya i olsem drim nomo, hem i no save kamtru samtaem. Be tru tumas, Wan Taosen Yia Rul blong Kraes bambae i kamtru long fyuja. Plante gudfala risen oli save pulum yumi blong bilif long hem.

Fastaem, sipos yu yu stadi long Baebol wetem wan Wetnes, bambae yu luksave olsem wanem Baebol i storeyan gud long saed blong ol sikis taosen yia we i pas finis long histri. Mo tu, Baebol i wan buk blong profet tok, mo bighaf blong ol profet tok ya oli kamtru finis olsem we Baebol i talem.a From we ol tok blong Baebol oli kamtru oltaem, yumi save trastem promes we hem i mekem long saed blong Wan Taosen Yia Rul blong Kraes. Maet yu yu wantem save ol tok we Baebol i talem long saed blong rul ya. ?Wanem samting bambae i hapen long taem ya? ?Olsem wanem samting ya i kasem yu tu? ?Laef blong yu i save jenis from?

Wan Presen We Yumi Lusum

Baebol i soemaot we long Wan Taosen Yia Rul blong hem, Kraes bambae i givim wan presen long ol “pikinini” blong hem. Presen ya i gudfala tumas. ?Be presen ya i olsem wanem? ?Mo hu nao ol “pikinini” blong Kraes? Bifo we oli ded, plante taem ol papa mama oli seraotem ol samting we oli gat long ol pikinini blong ol. Taswe, ol pikinini wanwan oli gat jans blong kasem wan presen. Taem Adam, bubu blong yumi, hem i brekem loa we God i givim long hem, hem i lusum presen we God i givim long hem fastaem, se laef blong olwe long wan paradaes long wol. Hem mo ol narafala man we bambae oli kam biaen long hem oli no moa gat raet blong stap harem gud long nambawan laef we God i givim long Adam fastaem. Long rod ya nao, Adam i pasem sam nogud samting long ol pikinini blong hem, olsem fasin blong mekem sin, mo ded, mo ol fasin blong harem nogud long bodi.​—Jenesis 3:​1-19; Rom 5:12.

Jisas i tekem bodi blong man mo hem i kam long wol blong halpem ol man, blong mekem se oli winim bakegen ol samting we Adam i bin lusum. Blong mekem olsem, Jisas i soemaot we hem i fasgud olgeta long God, nao hem i mekem sakrafaes long laef blong hem blong pemaot ol man. (Jon 3:16) Taem hem i stap long wol, Jisas i gat wan laef we i stret olgeta, hem i no mekem wan sin nating. Taswe, hem i gat raet blong hem wan i kasem laef we i no save finis long Paradaes long wol. Jisas i winimbak samting ya we Adam i bin lusum. Be nating, Jisas i neva yusum laef ya blong olwe we hem i gat raet blong kasem long wol. Nating we Jisas i ded mo i girap bakegen long ded blong go laef long heven, be hem i no lusum raet ya we God i givim long hem. Taswe, i klia nomo se Jisas i gat raet blong givim gudfala presen ya long ol “pikinini” blong hem.​—Rom 5:​18, 19.

Olgeta We Jisas i Mekem Presen Long Olgeta​—Oli “Pikinini” Blong Hem

Profet tok we i stap long Aesea 9:​6 i kolem Jisas “Papa blong olwe.” Jisas i kam olsem ‘Papa blong olwe’ blong ol man we hem i pemaot olgeta. Nao hem i lukaot long olgeta, olsem we man i lukaot long sam pikinini we oli no stret pikinini blong hem. Taswe hem i save givim presen long olgeta. (Matyu 20:28; Ridim Ol Sam 37:​18, 29.) Samting ya i klia nomo long promes we Jisas i mekem: “Yufala i kam. Papa blong mi i mekem i gud tumas long yufala finis. Taem we hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.” Mo hem i talem tu se: “Olgeta we oli kwaet man oli save harem gud, from we bambae oli kasem wol ya i blong olgeta.”​—Matyu 5:​5, NW; 25:34.

Blong ol man oli harem glad long wol ya we God bambae i presen long olgeta, ol fasin blong laef long wol tede oli mas jenis fulwan, oli mas kam stret olgeta. Evri samting we God i wokem bambae oli mas stap laef long pis mo oli mas joen gud tugeta. (Aesea 11:​6-9) Sin we i stap long ol man i mas finis olgeta, mo ded tu i mas lus. (1 Korin 15:​25, 26) Samting ya i min se ol dedman we God i pemaot olgeta finis, bambae oli mas girap bakegen long ded. Long rod ya nomo, bambae ol man oli save kasem ol presen we Kraes i wantem givim long olgeta ‘pikinini’ blong hem.​—Jon 5:​28, 29.

Yes, Wan Taosen Yia Rul blong Kraes bambae i wan hapi taem from we long taem ya nao, sloslou ol man bambae oli “fri long olgeta sin” mo oli kam stret olgeta. (Rom 8:21) Sam bigfala buk blong wol tu oli luksave se nyufala Rul blong Taosen Yia hem i wan taem blong mekem wok ya. Wan Engglis diksonari (Webster’s Ninth New Collegiate Dictionary, 1985 edition) i talem se “Rul Blong Wan Taosen Yia” i olsem “wan bigfala hapi taem, nao ol man bambae oli kam stret olgeta.”

Rul Ya i Bitim Rul Blong Solomon

Blong skelem gud Taosen Yia Rul blong Kraes, yumi save tingbaot rul blong Solomon. King ya i rul long ol man Isrel bifo long 40 yia. Ol man ya oli stap long pis, mo oli harem gud nomo. (1 King 4:​24, 25, 29) Taem kwin blong Seba i visitim Solomon, woman ya i talem long king Solomon se: “Tok ya we mi bin harem long kantri blong mi i rili tru. Ol man oli talem plante samting long saed blong yu mo long saed blong waes blong yu. Be mi mi no trastem ol tok ya blong olgeta, gogo mi kam long ples ya, ale mi luk ol samting ya long prapa ae blong mi. Naoia mi luksave se ol man ya oli no talemaot stret haf blong ol samting we yu mekem. Waes blong yu mo olgeta samting we yu yu gat oli bitim ol samting we ol man oli talem mo we sora blong mi i harem. !Ol man blong yu oli save harem gud! !Olgeta we oli mekem wok blong yu mo oli stap long fes blong yu oltaem mo oli lesin long waes blong yu, olgeta ya oli save harem gud tru!”​—1 King 10:​6-8.

Aninit long rul blong King Solomon, Isrel i stap long pis, mo evri samting i oraet nomo from we Solomon i yusum waes we God i givim long hem blong lidim ol man. Kwin blong Seba i sapraes long hem fom we hem i no ting se Solomon i gat bigfala paoa olsem. Kwin blong Seba i sapraes long rul blong king Solomon bifo, be naoia Jisas i olsem bigfala Solomon we i stap long heven. !Taswe i klia nomo se Rul blong Wan Taosen Yia blong Jisas Kraes bambae i bitim evri samting we man i save drim long hem! Jisas hem wan i talem se hem i “waes moa long Solomon.” (Matyu 12:42) Traem tingbaot nambawan laef we man i save kasem. Sipos pis i stap long olgeta famle wanwan, bambae ol man oli harem gud tumas mo oli hapi nomo. Sipos yu tekem taem blong tingtinggud long ol samting ya, bambae yu luksave se Wan Taosen Yia Rul blong Kraes bambae i halpem ol man long wan fasin we i bigwan moa, i bitim rul blong king Solomon.

?Bambae Rul Ya i Stat Long Namba Tri Taosen Yia We i Kam?

Stat long 1914, ol samting we oli hapen long olgeta ples long wol oli pruvum se yumi laef long “en blong fasin ya blong wol.” Jisas i talem tu se ol man we oli stap laef long taem we ol samting ya we hem i talem oli kamaot, bambae oli no save ded evriwan, ‘gogo bambae olgeta samting ya bambae oli kamtru.’ ?Olsem wanem? ?Samting ya i min se Wan Taosen Yia Rul blong Kraes bambae i stat stret long yia 2000?​—Matyu 24:​3-21, 34.

Jisas i givim advaes long ol disaepol blong hem, se oli no mas westem taem blong olgeta blong traem faenem wanem dei mo yia blong rul blong hem i kamtru. Hem i talem long olgeta se: “I no blong yufala i save ol taem ya mo ol dei ya we Papa blong mi nomo i gat raet blong jusumaot.” (Ol Wok 1:7) Long saed blong ‘dei mo taem’ we ol samting ya oli mas kamtru long hem, Jisas i talem se Papa blong hem nomo, Jeova God i save long olgeta. (Matyu 24:36) Tede i gat sam profet mo sam grup blong man oli stap kam plante moa oltaem. Ol man ya oli putum finis taem we bambae sam bigfala trabol oli kamtru long hem. Long tingting blong olgeta, en blong wol bambae i kamtru long ol man long laswan naet blong yia 1999. Be Baebol i no talem olsem.

Ol samting we oli hapen long wol tede oli pruvum gud se rabis wol ya we i stap long tudak “kolosap bambae i finis,” mo Taosen Yia Rul blong Kraes kolosap “i kamtru long yumi.” (Rom 13:12) Taswe, i no taem blong traem talemaot wanem dei mo yia bambae ol samting ya oli kamtru long hem. Be yumi mas traehad blong save ol samting we yumi mas mekem blong bambae God i sevem yumi. (Jon 17:3) Long fasin olsem, bambae yu yu save stap wetem olgeta we Jisas bambae i talem long olgeta se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.” (Matyu 25:34) Ol Wetnes blong Jeova oli naf blong givhan long yu. Oli glad nomo sipos yu tu yu save gat jans blong stap wetem ol man we bambae oli harem gud long Wan Taosen Yia we i stap kam.b

[Ol futnot]

[Tok blong makem poen long pej 6]

“Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala”