“Faenem Wan Perel We i Nambawan”

“Ol man oli stap traehad blong kasem kingdom blong heven. Mo olgeta we oli gohed blong traehad bigwan, oli save kasem.”​—MATIU 11:​12, NW.

1, 2. (a) ?Wanem gudfala fasin blong sam man we Jisas i tokbaot long wan parabol blong hem long saed blong Kingdom? (b) ?Jisas i talem wanem long parabol blong gudfala ston ya perel?

?I GAT wan samting we yu yu tinghae tumas long hem, we long tingting blong yu i nambawan, mo we yu yu rere blong lego evri samting blong yu from? Plante man oli rere blong wok strong blong kasem wan samting we oli wantem, maet mane, haenem, paoa, no posisen. Be i no plante man we oli rere blong lego evri samting we oli gat, blong kasem wan samting we oli tinghae long hem. Jisas Kraes i tokbaot gudfala fasin ya we sam man nomo oli gat, long wan parabol blong hem we i pulum tingting blong yumi i go long Kingdom blong God.

² Parabol ya we Jisas i talemaot long ol disaepol blong hem nomo, plante man oli kolem parabol blong gudfala ston ya perel. Jisas i talem se, kingdom blong heven i olsem “wan bisnesman we hem i stap lukaot ol gudgudfala ston ya perel. Taem hem i faenem wan perel we i nambawan, hem i go salemaot olgeta samting we hem i gat, nao i go pem perel ya i tekem i blong hem.” (Matiu 13:​36, 45, 46) ?Jisas i wantem tijim ol disaepol blong hem long wanem samting? ?Mo olsem wanem ol tok ya blong Jisas oli save givhan long yumi?

Ston Ya Perel i Sas

3. ?From wanem ol gudgudfala perel oli sas long taem bifo?

³ Stat long taem bifo olgeta, ol man oli tinghae long ol perel olsem ol gudfala ston we oli sas. Wan buk i talemaot tok blong man Rom ya we i raetem ol buk, Elda Pliny, se ston ya perel “i sas moa i bitim ol narafala gudfala ston.” Perel i defren long plante narafala sas ston olsem gol mo silva, from we ol laef samting nao oli wokem ol perel. Sam kaen osta oli save jenisim ol smosmol ston we oli ravravem olgeta, oli kam ol naesfala perel. Oli kavremap ol smosmol ston ya bakegen mo bakegen wetem samting we nem blong hem nacre, gogo ol ston ya oli kam perel. Long taem bifo, ol man oli faenem ol beswan perel long Red Si, Galf blong Pesia, mo solwota blong India, hemia ol ples longwe long kantri blong Isrel. Ating from samting ya nao Jisas i tokbaot “wan bisnesman we hem i [“wokbaot longwe blong,” NW] stap lukaot ol gudgudfala ston ya perel.” Blong faenem ol gudgudfala perel, man i mas traehad bigwan.

4. ?Jisas i talem parabol ya blong gudfala ston ya perel blong tijim ol man long wanem samting?

⁴ Yes, longtaem finis i kam, ol man oli pem bigfala mane blong kasem ol gudgudfala perel. Be Jisas i no stap tijim ol man blong hem long saed blong bigfala praes blong ol perel, nogat. Jisas i no talem nomo se Kingdom blong God i olsem wan gudfala perel, be hem i pulum tingting blong yumi i go long “wan bisnesman we hem i stap lukaot ol gudgudfala ston ya perel,” mo long fasin blong bisnesman ya taem hem i faenem wan perel we i nambawan. Bisnesman ya i no wan bisnesman olbaot nomo. Hem i wan spesel kaen bisnesman we i wokbaot olbaot blong faenem ol nambawan perel, maet yumi save talem se hem i wan speselis long saed blong ol perel. Hem i lan finis blong luksave ol gudgudfala perel, hem i luk ol smosmol samting we oli mekem se perel ya i nambawan, we ating ol narafala man oli no save luk. Hem i luksave ol perel we oli nambawan, mo hem i no save letem wan man i salem wan giaman perel long hem no wan perel we i no gudwan.

5, 6. (a) ?Wanem samting we i mekem bisnesman ya long parabol blong Jisas i defren long ol narawan? (b) ?Parabol blong bokis mane we i stap long wan pis graon i soemaot wanem long saed blong bisnesman ya?

⁵ I gat wan narafala samting tu long saed blong bisnesman ya. Sipos hem i wan bisnesman olbaot, maet fastaem hem i tingbaot wanem praes i stret blong pem, blong hem i save win taem hem i salem perel ya bakegen. Maet hem i tingbaot tu sipos plante man bambae oli wantem pem wan perel olsem, from we hem i wantem salem perel ya bakegen kwiktaem. Hemia i min se hem i wantem winim mane kwiktaem long perel ya, hem i no wantem holem perel ya i blong hem. Be bisnesman long parabol blong Jisas hem i defren. Hem i no tingbaot mane we bambae hem i winim. Defren olgeta, hem i rere blong salemaot “olgeta samting we hem i gat”​—ating graon mo olting blong hem—​blong kasem perel ya we hem i wokbaot longwe blong faenem.

⁶ Long tingting blong plante bisnesman, man ya long parabol blong Jisas i no waes. Wan waes bisnesman i no save mekem olsem man ya, from we bambae hem i fraet se hem i save lusum bigfala mane. Be bisnesman long parabol blong Jisas hem i no tingbaot mane, hem i ting se wan narafala samting i moa impoten. Hem i no wantem winim mane, be hem i wantem haremgud mo glad from we hem i gat wan samting blong hem we i sas tumas. Yumi luksave tingting ya blong hem long wan narafala parabol blong Jisas long saed blong Kingdom. Jisas i talem se kingdom blong heven i olsem “wan bigfala bokis mane we wan man i bin haedem long wan pis graon. Mo wan narafala man i faenem bokis mane ya, nao i berem bakegen. Hem i harem gud tumas from samting ya, nao hem i go salemaot olgeta samting we hem i gat, mo i kam pemaot pis graon ya i blong hem.” (Matiu 13:44) Yes, glad we man ya i kasem taem hem i faenem bokis mane ya mo i tekem i blong hem, i pulum hem blong lego evri samting we hem i gat. ?Olsem wanem? ?I gat sam man olsem tede? ?Wanem samting we i sas tumas, we samfala oli rere blong lego evri samting blong olgeta blong oli kasem?

Olgeta We Oli Tinghae Long Kingdom

7. ?Olsem wanem Jisas i soemaot se hem i tinghae long Kingdom olsem wan samting we i sas tumas?

⁷ Long parabol ya, Jisas i stap tokbaot kingdom blong heven. Hem wan i tinghae long Kingdom olsem wan samting we i sas tumas. Ol Gospel oli soemaot samting ya. Afta we Jisas i tekem baptaes long yia 29 K.T.,a hem i “stap prij, i talem se, ‘Yufala i mas tanem tingting blong yufala from ol sin blong yufala, from we [Kingdom blong heven] i kam klosap finis.’” Blong tri yia haf, hem i tijim fulap man long saed blong Kingdom. Hem i stap wokbaot olbaot, “i stap pas long ol taon mo long ol vilej. Hem i stap prij, mo i stap talemaot gud nius ya” blong Kingdom blong God.​—Matiu 4:​17; Luk 8:1.

8. ?Wanem ol bigbigfala wok blong Jisas we oli soemaot samting we Kingdom bambae i mekem long ol man?

⁸ Jisas i tekemaot sik blong plante man, i givim kakae long sam man we oli hanggri, i mekem bigfala win mo solwota i stap kwaet, mo i mekem dedman i laef bakegen. Ol bigbigfala wok ya we Jisas i mekem long plante ples, oli soemaot ol samting we Kingdom blong God bambae i mekem long ol man. (Matiu 14:​14-​21; Mak 4:​37-​39; Luk 7:​11-​17) Long en blong laef blong hem tu, Jisas i pruvum se hem i stap tru long God mo Kingdom blong hem, taem hem i ded long wan pos olsem wan man we ol narafala oli kilim hem from bilif blong hem. Jisas i olsem bisnesman ya we i rere blong salemaot evri samting we hem i gat blong pem “wan perel we i nambawan.” Jisas i yusum ful laef blong hem blong leftemap Kingdom, mo i ded tu from Kingdom ya.​—Jon 18:37.

9. ?Wanem gudfala fasin we ol faswan disaepol blong Jisas oli gat?

⁹ Yes, Jisas i yusum ful laef blong hem blong leftemap Kingdom. Long semtaem, hem i hivimap wan smol grup blong man blong oli folem hem. Olgeta ya tu oli tinghae long Kingdom olsem wan samting we i sas tumas. Wan long olgeta ya, Andru, fastaem hem i wan disaepol blong Jon Baptaes. Andru i harem tok blong Jon se Jisas i olsem “smol sipsip blong God,” nao wantaem nomo, hem wetem wan narafala disaepol blong Jon, maet wan pikinini blong Sebedi we hem tu nem blong hem Jon, tufala i bilif long Jisas mo tufala i folem hem. Nao tufala i pulum sam moa man. Andru i hareap blong go luk brata blong hem Saemon, i talem long hem se: “Ei, mifala i faenem Mesaea finis.” Kwiktaem nomo, Saemon (we biaen ol man oli singaot hem se Kefas, no Pita) wetem Filip mo fren blong hem Nataniel, trifala i luksave se Jisas i Mesaea. Nataniel i talem stret long Jisas se: “!Yu yu Pikinini blong God! !Yu yu King blong ol laen blong Isrel!”​—Jon 1:​35-​49.

Oli Tekem Aksin

10. ?Ol disaepol oli mekem wanem taem Jisas i singaot olgeta bakegen samtaem afta we hem i mitim olgeta fastaem?

¹⁰ Taem Andru, Pita, Jon, mo sam narafala oli faenem Mesaea, oli glad we oli glad. Oli olsem bisnesman ya we i faenem nambawan perel ya. ?Nao olgeta ya oli mekem wanem? Ol Gospel oli no talem plante samting long saed blong wanem we oli mekem jes afta we oli mitim Jisas. I luk olsem we bighaf blong olgeta oli gobak long wok we oli stap mekem fastaem finis. Be samwe long sikis manis no klosap wan yia afta, Jisas i luk Andru, Pita, Jon, mo brata blong hem Jemes bakegen, taem fofala i stap pulum fis long Lugun blong Galili.b Nao Jisas i singaot fofala ya se: ‘Yufala i biaen long mi, yufala i kam man blong mi. Bambae mi mi mekem yufala i man blong pulum man.’ ?Fofala i mekem wanem? Gospel blong Matiu i tokbaot Pita mo Andru se: “Wantaem nomo, tufala i livim ol net blong tufala, tufala i biaen long hem.” Long saed blong Jemes mo Jon, Matiu i talem se: “Wantaem nomo, tufala i girap, tufala i livim papa blong tufala i stap long bot, nao tufala i biaen long Jisas.” Gospel blong Luk i talem se “oli livim olgeta samting blong olgeta, oli biaen long Jisas.”​—Matiu 4:​18-​22; Luk 5:​1-​11.

11. ?Ating ol disaepol oli tekem aksin kwiktaem from wanem?

¹¹ ?Olsem wanem? ?Ol disaepol ya oli hareap tumas blong tekem disisen ya? ?Oli no tingting gud fastaem? !Si oli tingting gud! Nating se oli gobak long wok blong olgeta blong pulum fis afta we oli mitim Jisas, be i klia se ol samting we oli luk mo harem taem oli stap wetem Jisas, i gat bigfala paoa long hat mo tingting blong olgeta. Klosap wan yia afta, Jisas i jes luk olgeta bakegen. Long ol manis ya, oli gat plante taem blong tingting gud. Naoia oli mas tekem wan disisen. ?Bambae oli sem mak long bisnesman ya we i haremgud tumas taem hem i faenem perel ya we i nambawan, nao “hem i go” kwiktaem blong salemaot olting blong hem blong i save pem perel ya? Yes. Ol samting we ol disaepol ya oli luk mo harem finis i tajem hat blong olgeta. Oli luksave se oli mas tekem aksin. Taswe, wantaem nomo oli lego evri samting blong folem Jisas.

12, 13. (a) ?Plante man we oli harem tok blong Jisas oli mekem wanem? (b) ?Jisas i talem wanem long saed blong ol trufala disaepol blong hem? ?Ol tok ya blong hem oli minim wanem?

¹² !Ol trufala man ya blong Jisas oli defren olgeta long sam narafala we ol Gospel oli tokbaot! Plante man we Jisas i tekemaot sik blong olgeta mo i givim kakae long olgeta, oli gohed nomo long prapa bisnes blong olgeta. (Luk 17:​17, 18; Jon 6:​26) Samfala oli mekem eskius taem Jisas i singaot olgeta blong oli biaen long hem. (Luk 9:​59-​62) Jisas i talem sam tok we i soem se ol trufala man blong hem oli gat defren fasin, i se: “Stat long taem blong Jon Baptaes, ol man oli traehad blong kasem kingdom blong heven. Mo olgeta we oli gohed blong traehad bigwan, oli save kasem.”​—Matiu 11:​12, NW.

¹³ ?Tufala tok ya “traehad” mo “traehad bigwan,” tufala i minim wanem? Wan buk (Vine’s Expository Dictionary of Old and New Testament Words) i tokbaot stamba blong tufala tok ya long lanwis Grik i se: “Stamba tok ya i minim se man i mas hadwok.” Wan man we i stadi dip long Baebol, Heinrich Meyer, i talem long saed blong vas ya se: “Ol tok ya i soemaot olsem wanem ol man ya oli gohed nomo blong wokhad mo faet strong from kingdom blong Mesaea we i klosap . . . Oli intres bigwan long kingdom ya, oli wantem tumas, mo oli wok strong blong kasem (oli no moa stap kwaet mo wet nomo).” Yes, smol grup ya i olsem bisnesman long parabol blong Jisas. Oli luksave kwiktaem samting we i nambawan, mo oli lego evri samting we oli gat from Kingdom ya.​—Matiu 19:​27, 28; Filipae 3:8.

Sam Narafala Tu Oli Lukaot Perel Ya

14. ?Jisas i mekem wanem blong rerem ol aposol blong oli talemaot Kingdom? ?Mo wanem i kamaot from?

¹⁴ Taem Jisas i gohed blong prij, hem i trenem sam narafala tu, i halpem olgeta blong oli traehad blong kasem Kingdom ya. Fastaem, hem i jusumaot 12 disaepol blong hem blong oli kam ol aposol, hemia ol spesel man we hem i sanemaot olgeta. Jisas i tijim olgeta olsem wanem blong mekem wok blong prij, mo i givim woning long olgeta long saed blong ol trabol mo traem we bambae oli kasem. (Matiu 10:​1-​42; Luk 6:​12-​16) Blong bitim tu yia, oli folem Jisas taem hem i wokbaot blong prij, mo oli frengud wetem hem. Oli harem ol tok blong hem, oli luk ol bigbigfala wok we hem i mekem, mo oli lukluk eksampol we hem i soemaot. (Matiu 13:​16, 17) I klia se ol samting ya i tajem hat blong olgeta, taswe oli gat fasin olsem bisnesman ya, oli wok strong wetem fulhat blong olgeta blong kasem Kingdom.

15. ?Jisas i talem wanem samting we i rili save mekem ol man blong hem oli glad?

¹⁵ Afta ol 12 aposol ya, Jisas i “jusumaot seventi . . . narafala man blong hem bakegen. Hem i wantem sanem olgeta oli go tutu, blong oli go fastaem, hem i kam biaen. Olgeta ya bambae oli go long ol vilej mo ol narafala ples we bambae, i no longtaem, hem i save pas long olgeta.” Hem i givim woning long olgeta tu long saed blong ol trabol mo hadtaem we bambae oli kasem, mo hem i tijim olgeta blong talemaot long ol man se: “Naoia, long taem blong yufala, [“kingdom blong God i kam klosap finis,” NW].” (Luk 10:​1-​12) Taem ol 70 man ya oli kambak long Jisas, oli glad tumas, oli talem long hem se: “!Masta! Nating we ol devel, be taem mifala i tok long olgeta long nem blong yu, olgeta oli obei long mifala.” Be maet oli sapraes taem Jisas i talem long olgeta se bambae oli save kasem bigfala glad moa long fiuja from we oli bin wok strong long saed blong Kingdom. Hem i se: “I nogud yufala i stap glad nomo, from we ol devel ya oli stap obei long yufala, i moa gud yufala i glad from we God i raetemdaon nem blong yufala, i stap long heven finis.”​—Luk 10:​17, 20.

16, 17. (a) ?Jisas i talem wanem long ol gudfala aposol blong hem long laswan naet we hem i stap wetem olgeta? (b) ?Wanem bigfala glad mo promes we Jisas i givim long ol aposol ya?

¹⁶ Long Naesan 14, 33 K.T., long laswan naet we Jisas i stap wetem ol aposol blong hem, hem i stanemap Lodsapa, mo i talem long olgeta se oli mas mekem lafet ya bakegen mo bakegen. Long naet ya, Jisas i talem long ol 11 gudfala aposol blong hem se: “Yufala ya nao, oltaem yufala i stap wetem mi long olgeta hadtaem we mi mi gotru long hem. Nao olsem we Papa blong mi i putumap mi blong bambae mi mi King, mi tu mi putumap yufala, blong bambae yufala i save sidaon wetem mi blong kakae wetem mi long taem ya we mi bambae mi King. Mo long taem ya, bambae yufala tu i gat ol gudfala jea blong yufala, olsem jea blong king. Nao bambae yufala i hed blong ol twelef laen blong Isrel, blong rul long olgeta.”​—Luk 22:​19, 20, 28-​30.

¹⁷ !Taem ol aposol oli harem tok ya blong Jisas, ating hat blong olgeta i kam fulap long glad! Hem i givim janis long olgeta blong kasem ona mo blesing we i bigwan moa i bitim enikaen narafala blesing mo ona we man i save kasem. (Matiu 7:​13, 14; 1 Pita 2:9) Olsem bisnesman ya, ol aposol oli bin lego evri samting blong folem Jisas mo blong kasem Kingdom. Naoia Jisas i promes long olgeta se oli no lego ol samting ya blong nating nomo.

18. ?Antap long ol 11 aposol, hu bakegen bambae oli kasem blesing from Kingdom ya?

¹⁸ I no ol aposol ya we oli stap wetem Jisas long naet ya nomo we bambae oli kasem blesing from Kingdom. Jeova i wantem se 144,000 man oli joen long kontrak ya blong Kingdom, nao bambae oli rul wetem Jisas Kraes long nambawan Kingdom blong heven. Antap long hemia, aposol Jon i luk wan vison blong wan bigfala kampani blong man, “i no gat man i save kaontem olgeta, . . . oli stap stanap long fran blong bigfala jea blong king, mo long fes blong smol Sipsip ya, . . . oli talem se, ‘God blong yumi, hem i King, i stap sidaon long bigfala jea blong hem. Hem wetem Smol Sipsip ya, tufala ya nao i wokem rod blong sevem mifala.’” Bigfala kampani ya, hemia ol man we bambae oli laef long wol ya aninit long rul blong Kingdom ya.c​—Revelesen 7:​9, 10; 14:​1, 4.

19, 20. (a) ?Ol man blong olgeta kantri, oli gat wanem janis? (b) ?Bambae yumi faenem ansa blong wanem tufala kwestin long nekis stadi?

¹⁹ Smoltaem bifo we Jisas i go antap long heven, hem i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.” (Matiu 28:​19, 20) Taswe, plante man long olgeta kantri blong wol, bambae oli kam disaepol blong Jisas Kraes. Olgeta ya tu bambae oli mekem sem mak olsem bisnesman ya. Bambae oli traehad wetem fulhat blong olgeta blong kasem Kingdom, nating se oli kasem blesing ya long heven no long wol.

²⁰ Ol tok blong Jisas oli soemaot se wok blong pulum ol man oli kam disaepol bambae i gohed gogo “wol ya i finis.” ?Olsem wanem? ?Long taem blong yumi, i gat sam man yet we oli olsem bisnesman ya? ?Samfala oli rere blong lego evri samting blong olgeta, blong kasem Kingdom blong God? Bambae yumi faenem ansa blong tufala kwestin ya long nekis stadi.

[Ol Futnot]

Lukaot “Perel We i Nambawan” Tede

“Gud nius ya blong Kingdom, bambae ol man oli talemaot long olgeta ples long wol, blong oli witnes long hem.”​—MATIU 24:​14, NW.

1, 2. (a) ?Wanem tingting we ol man Jiu long taem blong Jisas oli gat long saed blong Kingdom? (b) ?Jisas i mekem wanem blong halpem olgeta blong kasem save gud long Kingdom, mo wanem i kamaot from?

TAEM Jisas i stap long wol, ol man Jiu oli intres bigwan long Kingdom blong God. (Matiu 3:​1, 2; 4:​23-​25; Jon 1:​49) Be bighaf blong olgeta, fastaem oli no kasem save long bigfala wok we Kingdom ya bambae i mekem, mo bigfala paoa blong hem. Mo oli no kasem save tu se Kingdom ya i wan gavman long heven. (Jon 3:​1-5) Samfala we oli biaen long Jisas, olgeta tu oli no kasem save se Kingdom blong God i olsem wanem, mo oli no save wanem we oli mas mekem blong kasem blesing ya blong rul wetem Jisas Kraes.​—Matiu 20:​20-​22; Luk 19:11; Ol Wok 1:6.

² Sloslo, Jisas i tijim ol disaepol blong hem wetem longfala tingting. Wan bigfala samting we hem i tijim olgeta long hem, hemia parabol blong gudfala ston ya perel we yumi tokbaot long laswan stadi. Hem i makem long tingting blong olgeta se oli mas traehad bigwan, sipos oli wantem kasem Kingdom blong heven. (Matiu 6:​33; 13:​45, 46; Luk 13:​23, 24) Ating tok blong Jisas i tajem hat blong olgeta, from we, afta long taem ya, oli wokhad wetem strong tingting blong talemaot gud nius blong Kingdom go kasem ol laswan ples blong wol. Buk blong Ol Wok i soemaot bigfala wok ya we oli mekem.​—Ol Wok 1:8; Kolosi 1:​23.

3. ?Long saed blong Kingdom mo taem blong yumi, Jisas i talem wanem?

³ ?Olsem wanem long taem blong yumi? Plante milian man tede oli stap harem gud nius ya long saed blong ol blesing blong paradaes long wol, aninit long rul blong Kingdom ya. Long bigfala profet tok blong Jisas long saed blong taem we klosap “wol ya i finis,” hem i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:​3, 14, NW; Mak 13:10) Hem i talem tu se plante man bambae oli traehad blong blokem bigfala wok ya blong talemaot Kingdom, bambae ol man blong prij oli mas fesem plante traem mo bambae ol man oli ronem olgeta mo mekem i nogud long olgeta. Be Jisas i mekem promes ya se: “Man we i stanap strong gogo olgeta samting ya i finis, bambae God i sevem hem.” (Matiu 24:​9-​13) Blong stanap strong go kasem en, oli mas rere blong lego samting we olgeta nomo oli wantem, mo yusum ful laef blong olgeta long wok blong Kingdom. Oli mas gat sem fasin olsem bisnesman we Jisas i tokbaot long parabol blong hem. ?Olsem wanem? ?I gat sam man tede we oli soemaot bilif olsem, mo we oli wok strong blong lukaot Kingdom ya?

Glad Blong Faenem Trutok

4. ?Trutok blong Kingdom i save mekem wanem long man tede?

⁴ Bisnesman ya long parabol blong Jisas i glad tumas taem hem i faenem “wan perel we i nambawan.” Glad ya i givim paoa long hem blong mekem evri samting we hem i naf blong mekem blong kasem perel ya. (Hibrus 12:1) Long sem fasin, trutok blong God long saed blong Kingdom i pulum tingting blong plante man tede, mo i givim paoa long olgeta blong tekem aksin. Brata A. H. Macmillan we i raetem buk ya Faith on the March, i tokbaot olsem wanem hem i traehad blong faenem God mo kasem save long stamba tingting we God i gat long saed blong ol man. Hem i se: “Samting ya we mi mi faenem finis, evri yia plante taosen man oli stap faenem yet. Olgeta ya oli man olsem yumi nomo, sam oli olfala, sam oli yangfala, mo oli kamaot long ol defdefren kantri, kala, mo kalja. I no samfala nomo we oli save kasem trutok. Trutok i save pulum enikaen man nomo.”

5. ?Ripot blong sevis yia 2004 i soem wanem gudfala frut we i kamaot?

⁵ Tok blong brata ya i tru tumas, from we evri yia, gud nius blong Kingdom blong God i tajem hat blong plante taosen gudfala man, mo i pulum olgeta blong oli givim laef blong olgeta i go long Jeova blong mekem wok blong hem. Samting ya i hapen tu long sevis yia blong 2004, we i stat long Septemba 2003 mo i finis long Ogis 2004. Long 12 manis ya, 262,416 man oli tekem baptaes blong soemaot long fored blong ol narafala se oli givim laef blong olgeta i go long Jeova. Ol man ya oli stap long 235 kantri. Long ol kantri ya, ol Witnes blong Jeova oli mekem 6,085,387 Baebol stadi evri wik long haos blong ol man we oli kamaot long ol defdefren kantri, laen, lanwis, mo kalja. Long rod ya oli givhan long ol man ya blong oli kasem trutok blong Baebol we i save givim laef long olgeta.​—Revelesen 7:9.

6. ?From wanem plante moa man oli kam long Jeova evri yia?

⁶ ?Wanem i mekem ol gudfala frut ya i kamaot? I klia se Jeova i stap pulum ol man we hat blong olgeta i stret blong oli kam long hem. (Jon 6:​65; Ol Wok 13:48) Be yumi no mas fogetem tu, ol man we oli wok strong blong talemaot Kingdom ya. Oli no tingbaot samting we olgeta nomo oli wantem, be oli gohed nomo blong talemaot Kingdom we oli no spel. Taem Brata Macmillan i gat 79 yia blong hem, hem i raetem se: “Stat long taem we mi mi jes harem promes blong Baebol se sik mo ded bambae i finis, kam kasem naoia, mi neva lusum strong tingting we mi mi gat long ol tok ya blong Baebol. Stat long taem ya, mi mi mekemap tingting blong mi blong faenemaot moa long saed blong ol tijing blong Baebol. Taswe, mi mi kam naf blong givhan long ol narafala we oli olsem mi, we oli stap lukaot save long saed blong God ya we i gat olgeta paoa, Jeova, mo ol nambawan plan we hem i gat blong ol man.”

7. Talem wan stori we i soemaot olsem wanem glad i save pulum olgeta we oli faenem trutok blong Baebol blong oli wantem halpem ol narafala.

⁷ Plante man blong Jeova tede tu oli gat strong tingting ya. Wan long olgeta ya, hemia Daniela we i stap long taon ya Vienna long kantri blong Ostria. Hem i se: “Stat long taem we mi mi pikinini nomo, God i stap olsem besfren blong mi. Mi bin wantem tumas blong save nem blong hem, from we long tingting blong mi, tok ya ‘God’ i no wan prapa nem. Be mi bin wet go kasem we mi gat 17 yia blong faenemaot samting ya. Long taem ya, ol Witnes blong Jeova oli kam luk mi, nao oli eksplenem evri samting we mi mi wantem save long saed blong God. !Saye mi faenem trutok, mo mi haremgud bitim mak! Bigfala glad ya i pulum mi blong prij long olgeta man we mi mitim olgeta.” From we Daniela i talemaot gud nius ya long olgeta man, i no longtaem ol fren blong hem long skul oli jikim hem. Daniela i talem se: “Long tingting blong mi, i olsem we oli stap mekem wan profet tok blong Baebol i kamtru. Mi mi kasem save finis long tok blong Jisas se ol man bambae oli no laekem nating ol man we oli holem nem blong hem, mo bambae oli mekem i nogud long olgeta. Taswe, taem oli agensem mi, mi sapraes olsem wanem tok ya i kamtru, mo mi glad tu.” I no longtaem, Daniela i givim laef blong hem i go long Jeova, i tekem baptaes, mo i traehad blong kasem mak we hem i naf blong kam wan misinari. Afta we Daniela i mared, hem wetem man blong hem, Helmut, tufala i prij long ol man Afrika, Jaena, Filipin, mo India we oli stap long taon ya Vienna. Naoia, Daniela mo Helmut tufala i stap mekem wok blong misinari long saotwes Afrika.

Oli No Lego

8. ?Plante man oli folem wanem gudfala rod blong soem se oli lavem God mo se oli stanap strong long Kingdom blong hem?

⁸ Tru ya, wok blong misinari i wan rod we plante man blong Jeova tede oli folem blong soemaot se oli lavem God, mo se oli stap stanap strong long Kingdom blong hem. Olgeta ya oli olsem bisnesman long parabol blong Jisas. Oli rere blong wokbaot i go long ol kantri farawe, blong mekem wok blong Kingdom. I tru, ol misinari ya oli no wokbaot blong faenem gud nius blong Kingdom, be oli tekem gud nius ya i go long ol man we oli stap long ol laswan kona blong wol. Oli tijim ol man ya, mo oli pulum olgeta blong oli kam ol disaepol blong Jisas Kraes. (Matiu 28:​19, 20) Long plante kantri, ol misinari oli kasem bigfala hadtaem. Be taem oli stanap strong, oli kasem plante blesing tu.

9, 10. ?Wanem sam gudfala frut we ol misinari oli kasem long ol kantri farawe, olsem Ripablik blong Sentrol Afrika?

⁹ Tingbaot kantri ya Ripablik blong Sentrol Afrika. Las yia, i gat 16,184 man oli kam long Memoriol blong ded blong Kraes long kantri ya, hemia seven taem antap long namba blong ol pablisa blong Kingdom. Long plante ples long kantri ya i no gat lektrik, ale ol man oli mekem wok blong olgeta afsaed, long sado blong ol tri. Taswe ol misinari tu oli folem fasin ya. Oli mekem Baebol stadi wetem ol man long sado blong ol tri. Olsemia oli kasem freswin, mo tu, oli save yusum laet blong san blong lukluk buk. Be i gat wan narafala gudfala samting we i save kamaot tu. Ol man long ples ya oli laekem tumas blong tokbaot Baebol. Maet long sam narafala kantri ol man we oli kam wanples oli tokbaot spot no weta, be long kantri ya ol man oli tokbaot skul. Ale, plante taem wan man we i stap pas long rod, i luk we wan misinari i stap mekem stadi long wan man, nao hem i kam joen long storian ya.

¹⁰ Wan misinari i stap stadi wetem wan man afsaed, nao wan yangfala man we haos blong hem i stap long narasaed rod, i kam. Hem i talem se ol Witnes oli no bin kam long haos blong hem yet, taswe misinari ya i mas kam mekem Baebol stadi long hem tu. Misinari ya i glad, mo naoia, yangfala man ya i stap gohed gud long stadi blong hem. Long sem kantri ya, plante taem ol polis oli stopem ol Witnes long rod. Be oli no mekem olsem blong arestem ol Witnes no blong givim faen long olgeta. Oli stopem olgeta from we oli wantem ol niufala Wajtaoa mo Wekap!, no maet oli wantem talem tangkiu from wan stori we oli bin ridim long ol magasin ya.

11. ?Nating se i gat sam hadtaem, wanem tingting blong ol misinari we oli mekem wok ya longtaem finis?

¹¹ Plante man mo woman we oli bin mekem wok blong misinari blong 40 no 50 yia, oli stap gohed strong yet. !Tru ya, olgeta ya oli givim nambawan eksampol long saed blong bilif mo longfala tingting! Wan man mo woman blong hem, tufala i bin mekem wok blong misinari blong 42 yia long tri defren kantri. Man ya i talem se: “Mitufala i bin fesem sam hadtaem. Blong 35 yia, mitufala i traehad blong winim sik ya malaria. Nating se i olsem, neva mitufala i harem nogud long disisen we mitufala i mekem blong kam misinari.” Woman blong hem i talem se: “Oltaem i gat plante samting we mitufala i save talem tangkiu from. Wok blong prij i givim bigfala glad, mo i isi nomo blong statem ol Baebol stadi. Taem ol studen oli kam joen long ol miting mo oli stat savsave olgeta, mitufala i luk se oli olsem wan bigfala famle nomo we i joen wanples.”

‘Luk Olgeta Samting Blong Bifo Olsem Samting Blong Lus’

12. ?Wan man we i rili tinghae long Kingdom, hem i rere blong mekem wanem?

¹² Taem bisnesman ya i faenem perel ya we i nambawan, “hem i go salemaot olgeta samting we hem i gat, nao i go pem perel ya i tekem i blong hem.” (Matiu 13:46) Hem i rere blong lego olgeta samting we hem i gat, blong kasem perel ya. Hemia sem fasin we ol man oli gat taem oli rili tinghae long Kingdom. Aposol Pol we i gat janis blong joen wetem Kraes long Kingdom blong heven, i talem se: “Mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.”​—Filipae 3:8.

13. ?Olsem wanem wan man long Jek Ripablik i soemaot se hem i laekem Kingdom tumas?

¹³ Long sem fasin, plante man tede oli rere blong jenisim sam bigfala samting long laef blong olgeta, blong oli save kasem ol blesing blong Kingdom. Wan hed tija long Jek Ripablik we i gat 60 yia blong hem, hem i mekem samting ya. Long Oktoba 2003, hem i faenem wan buk we i tokbaot Baebol, nem blong buk ya Save Blong Lidim Yu Long Laef We i No Save Finis. Hem i ridim buk ya, nao wantaem nomo hem i singaot ol Witnes blong Jeova blong oli kam mekem Baebol stadi long hem. Hem i gohed gud, mo i no longtaem hem i kam long ol miting. Be hem i bin mekem plan se bambae hem i wan kandidet blong eleksen blong kam mea, mo blong kam memba blong palemen. ?Olsem wanem long plan ya? Hem i tekem disisen blong mekem wan defren wok, hemia blong talemaot Kingdom. Hem i se: “Mi mi givimaot plante buk long ol studen blong mi, blong eksplenem Baebol long olgeta.” Long Julae 2004, long wan asembli, hem i tekem baptaes blong soemaot se hem i givim laef blong hem i go long Jeova.

14. (a) ?Gud nius blong Kingdom i pulum plante milian man blong mekem wanem? (b) ?Wanem ol kwestin we yumi wanwan i mas tingting gud long olgeta?

¹⁴ Plante milian narafala man long olgeta ples blong wol oli mekem sem mak taem oli harem gud nius blong Kingdom. Oli livim ol fasin blong rabis wol ya, oli sakemaot olfala laef blong olgeta, oli lego ol fren blong olgeta, mo oli no moa ronem ol samting blong wol. (Jon 15:19; Efesas 4:​22-​24; Jemes 4:4; 1 Jon 2:​15-​17) ?From wanem? From we oli tinghae long ol blesing blong Kingdom blong God, i bitim eni samting we olfala wol ya i save givim long olgeta. ?Olsem wanem long yu? ?Yu tu yu tinghae olsem long gud nius blong Kingdom? ?Nius ya i pulum yu blong wantem jenisim sam samting long laef blong yu, mo blong jenisim tingting blong yu long saed blong ol samting we oli moa impoten? ?Hem i pulum yu blong wantem jenisim sam mak we yu yu stap traehad blong kasem, blong mekem oli laenap wetem samting we Jeova i wantem? Sipos yes, bambae yu save kasem ol nambawan blesing naoia mo long fiuja.

Taem Blong Karem Kakae Long Garen Klosap i Finis

15. ?Profet tok i talem se ol man blong God bambae oli mekem wanem long ol laswan dei bifo we wol ya i finis?

¹⁵ Man blong raetem Ol Sam i talem se: “Long dei ya we bambae yu go faet long ol enemi blong yu, ol man blong yu bambae oli glad blong kam joen long yu.” Long olgeta ya we oli kam joen, i gat ‘ol nambawan man blong faet we oli olsem wota blong naet,’ mo i gat ‘plante woman we oli talemaot [gud] nius.’ (Ol Sam 68:11; 110:3) ?Wanem frut blong hadwok blong ol man mo woman ya, ol olfala mo ol yangfala, we oli livim plante samting blong mekem wok blong Jeova long ol laswan dei bifo we wol ya i finis?

16. Talem wan stori we i soem olsem wanem ol man blong God oli stap traehad blong tijim ol defdefren kaen man long saed blong Kingdom.

¹⁶ Long India, wan Witnes woman we hem i paenia (i min se hem i talemaot Kingdom fultaem), i tingbaot tu milian man India we sora blong olgeta i fas, mo wanem we hem i save mekem blong givhan long olgeta blong kasem save long Kingdom. (Aesea 35:5) Nao hem i tekem wan kos long Bangalore blong lanem blong toktok wetem han blong hem. Taem hem i stap tekem kos ya, hem i gat janis blong serem gud nius blong Kingdom wetem plante man we sora blong olgeta i fas. Ale, samfala oli hivap long ol smosmol grup blong stadi Baebol. Afta we sam wik i pas, bitim 12 man mo woman oli stat kam long ol miting long Haos Kingdom. Smoltaem afta long samting ya, paenia ya i stap long wan lafet blong mared, nao hem i mitim wan yangfala man Calcutta we sora blong hem i fas. Man ya i askem plante kwestin, mo i wantem save moa long saed blong Jeova. Be problem se, yangfala ya i mas gobak blong skul long Calcutta, hemia wan trip blong 1,600 kilometa, mo i no gat wan Witnes long Calcutta we i save toktok wetem han blong hem. Ale yangfala ya i toktok gud wetem papa blong hem, nao papa ya i letem hem i skul nomo long taon ya Bangalore. Olsem nao hem i save gohed blong stadi Baebol. Yangfala ya i gohed gud, mo afta we wan yia i pas, hem i givim laef blong hem i go long Jeova. Naoia hem i stap mekem Baebol stadi long plante narafala man we sora blong olgeta i fas, wan long ol man ya hem i wan fren blong yangfala ya stat long taem we tufala i pikinini nomo. Naoia, hed ofis blong ol Witnes long India i stap mekem plan se sam paenia bambae oli lanem blong toktok wetem han blong olgeta, blong oli save givhan long ol man we sora blong olgeta i fas.

17. Lukluk ripot blong yia 2004 long pej 19 kasem 22, nao talem wan samting we i leftemap tingting blong yu.

¹⁷ Long pej 19 kasem 22 blong Wajtaoa ya, bambae yu luk ripot blong yia 2004, long saed blong wok blong ol Witnes blong Jeova long fulwol. I gud yu tekem smoltaem blong ridim ripot ya, nao bambae yu luksave se ol man blong Jeova raon long wol oli stap wok strong blong lukaot “perel ya we i nambawan.”

Gohed Blong ‘Lukaot Kingdom Fastaem’

18. ?Wanem save we Jisas i no givim long parabol blong gudfala ston ya perel? ?From wanem hem i no givim save ya?

¹⁸ Tingbaot parabol blong Jisas bakegen, long saed blong gudfala ston ya perel. ?Long parabol ya, Jisas i tokbaot wanem samting we bisnesman ya bambae i mekem blong kasem naf mane blong laef, taem hem i salemaot olgeta samting blong hem blong pem perel ya? Nogat. Taswe, maet samfala oli askem se: ‘?Olsem wanem bisnesman ya bambae i pem kakae, klos, mo haos blong hem, sipos hem i yusum evri mane blong hem blong pem perel ya? Nating se perel ya i nambawan, be i no save givhan long hem blong kasem ol samting ya blong laef.’ I tru, ol kwestin ya oli stret sipos yumi gat tingting olsem ol man blong wol. Be Jisas i soem se yumi mas gat defren tingting. Hem i talem long ol disaepol blong hem se: “Yufala i mas gohed blong lukaot kingdom mo stret fasin blong hem fastaem. Nao bambae [God] i givim olgeta narafala samting ya tu long yufala.” (Matiu 6:​31-​33, NW) Taswe, bigfala tingting long parabol ya, hemia se man i mas onagud long God mo wok wetem fulhat blong hem blong talemaot Kingdom. ?Ale, parabol ya i save tijim yumi long wan samting?

19. ?Wanem bigfala samting we yumi lanem long parabol blong Jisas long saed blong gudfala ston ya perel?

¹⁹ Maet yumi harem nambawan nius ya blong Kingdom i no longtaem tumas. No maet yumi bin lukaot Kingdom mo talemaot ol blesing blong hem blong plante yia finis. Nating se i olsem wanem, be yumi mas gohed nomo blong putum Kingdom i stap long fasples long laef mo tingting blong yumi. Naoia, laef i had, be yumi save bilif strong se samting ya we yumi stap traehad blong kasem, hem i tru mo i nambawan​—olsem perel ya we bisnesman i faenem. Ol samting we i stap hapen long wol mo ol profet tok blong Baebol we oli stap kamtru, oli soemaot klia se yumi stap long taem we klosap “wol ya i finis.” (Matiu 24:3) Taswe, i gud we yumi gat sem fasin olsem bisnesman ya long parabol blong Jisas. Yumi mas mekem wok blong Kingdom blong God wetem fulhat blong yumi, mo yumi mas glad tumas long blesing we yumi gat blong talemaot gud nius ya.​—Ol Sam 9:​1, 2.