“Wan Saen Long Skae”

WAN tok blong bifo i talem se: “Taem skae i red long naet, bambae weta i gud,/Taem skae i red long moning, bambae weta i nogud.” Tede, oli yusum ol satelaet, ol stadi long tempraja we kompyuta i givim, Doppler radar, mo ol narafala rod long sayens blong faenemaot weta we bambae i kamaot long nekis dei. Mo tede ol toktok long saed blong weta plante taem i stret wetem olfala tok ya antap.

Wan dei ol enemi blong Jisas Kraes, long saed blong skul oli askem hem long “wan bigfala saen, long paoa blong heven,” wan samting we i defren blong pruvum se hem i Mesaea. Hem i talem se: “Taem san i godaon, yufala i save talem se ‘Bambae i gud taem tumora, from we skae ya i red.’ Mo long eli moning, yufala i save talem se ‘Bambae i gat ren tede, from we skae ya i red, mo i gat klaod.’ Yufala i save luk ol saen long skae blong makem we taem bambae i olsem wanem. ?Ale, olsem wanem yufala i no save luksave ol saen blong taem ya blong mi? Yufala we i laef naoia, yufala i wantem luk saen. Be yufala i man nogud, yufala i stap mekem i krangke long God, olsem woman we i stap mekem i krangke long man blong hem. Bambae yufala i no gat saen. Saen blong Jona bifo, hemia nomo God i save givim long yufala.”​—Matyu 16:​1-4.

Ol enemi blong Jisas oli save talemaot weta we bambae i kamaot be oli no save kasem save long ol samting long saed blong speret. ?Eksampel, olsem wanem long “saen blong Jona bifo”? Afta we profet blong God, Jona, i spenem tri dei insaed long bel blong wan bigfala fis, hem i go prij long Nineve mo olsemia nao hem i kam olsem wan saen long bigfala taon ya blong Asiria. Ol man long taem blong Jisas oli gat “saen blong Jona” taem Kraes i spenem tri dei insaed long gref mo i laef bakegen long ded. Ol disaepol blong hem oli talemaot pruf blong samting ya, mo olsemia nao Jisas i wan saen long ol man long taem ya blong hem.​—Matyu 12:​39-41.

Long wan narafala taem, ol disaepol blong Jisas oli askem hem wan “saen” blong soem se “hem i stap finis” taem hem i kasem Kingdom paoa long fyuja. Long ansa, hem i talem wan saen we i gat ol defren haf long hem, olsem ol faet, ol bigfala graon i seksek, kakae i sot, mo wok blong talemaot long olgeta ples long wol Kingdom blong God we i stanap finis long heven.​—Matyu 24:​3-14, NW.

?Yu yu luksave saen ya we i soemaot we Kraes i stap finis olsem King long heven we yumi no save luk wetem prapa ae blong yumi? Ol defren haf blong hem oli stap kamtru long ol man long taem ya blong yumi. (Matyu 24:34) ?Mo olsem wanem long fyuja? I tru Baebol i no soemaot nomo se en blong rabis fasin blong naoia i kolosap, be hem i soem tu se i no longtaem nyufala dei we God i promes long hem bambae i kam klia mo i saen long olgeta man.​—2 Pita 3:13.