Smoltaem afta we Jisas i baptaes, wan speret man, we nem blong hem Devel Setan, i traem hem. Baebol i tokbaot wan long ol traem ya, i se: “Setan i tekem Jisas i go antap long wan bigfala hil, nao i soemaot long hem olgeta kantri long wol ya wetem ol gudgudfala samting we oli gat.” (Matyu 4:8) Nao Setan i talem long Jisas, i se: ‘Bambae mi mi putum olgeta paoa blong rul long ol kantri ya, wetem olgeta gudgudfala samting blong olgeta, oli stap long han blong yu. From we oli stap long han blong mi finis, mo mi mi save givim long hu man we mi wantem givim long hem. Oraet, sipos yu yu nildaon long mi, yu mekem wosip long mi, bambae olgeta samting ya i blong yu.’​—Luk 4:​6, 7.

Setan i talem se hem i bos long olgeta kantri, no gavman, blong wol ya. ?Jisas i ansa olsem wanem? ?Hem i talem se tok ya blong Setan i gyaman? No gat. Long wan narafala taem, hem i soemaot se tok ya i tru, taem hem i talem se Setan i “masta blong wol ya.”​—Jon 14:30.

Baebol i talem se, Setan i wan rabis enjel we i gat bigfala paoa. Kristin aposol Pol i talem se Setan i joen wetem ol ‘rabis speret,’ mo se oli ‘rul long wol ya we i stap long tudak.’ (Efesas 6:​11, 12) Mo tu, aposol Jon i talem se, ‘fulwol i stap long paoa blong Setan.’ (1 Jon 5:19) Buk blong Revelesen i talem se Setan i “gyaman long olgeta man long wol finis, i lidim olgeta oli go krangke.” (Revelesen 12:9) Mo tu, Revelesen i tokbaot Setan olsem wan bigfala algita, we i givim ‘paoa blong hem long ol politik gavman blong wol ya, i mekem oli sidaon long bigfala jea blong hem, mo i givim paoa long olgeta blong wokem plante samting.’​—Revelesen 13:2.

Ol samting we oli stap hapen long wol, oli soem se wan nogud paoa i stap wok, i stap kontrolem ol man blong spolem olgeta nomo. ?I gat wan narafala risen we i save mekem se ol gavman blong man oli no naf blong putum pis? ?Wanem narafala samting bakegen i save pulum ol man blong no laeklaekem olgeta nating mo blong kilkilim olgeta oli ded? Long wan faet we i kamaot bitwin ol man long wan kantri, wan woman we hem i harem nogud tumas blong lukluk ol dedbodi olbaot mo ol man ya we oli stap kilkilim olgeta, i talem se: “Mi no save olsem wanem samting olsem i save hapen. Hem i bitim fasin blong no laekem nating narafala. Wan rabis speret i stap yusum ol man ya blong kilkilim olgeta bakegen.”

Risen From Wanem God i Letem Setan i Rul

?Yu yu save tingbaot samting we Setan i talem long Jisas long saed blong fasin blong rul long wol? Setan i talem se: ‘Bambae mi mi putum olgeta paoa blong rul long ol kantri ya, i stap long han blong yu. . . . From we hem i stap long han blong mi finis.’ (Luk 4:6) Tok ya i soem se, Devel Setan i stap rul from we God i letem hem nomo. ?Be from wanem God i letem Setan i rul?