Hem i talem se: “Nao biaen, puaman ya i ded, mo ol enjel oli kam karem i go stap kolosap long saed blong Ebraham, long heven. Nao rijman ya tu i ded, mo ol man oli berem hem, mo hem i stap harem i nogud tumas, long ples blong ol dedman. Nao hem i lukluk i go antap, i luk Ebraham we i stap longwe, mo Lasros we i stap long saed blong hem.”

Ol man we oli gat fasin olsem Lasros, oli gat tingting daon, nao oli tanem tingting blong olgeta from sin blong olgeta. I olsem we oli ded, from we oli livim olfala laef blong olgeta, we oli hanggri long saed blong speret, nao oli kasem plante blesing long God. Bifo, oli dipen long ol lida blong skul blong olgeta blong givim hafkakae long saed blong speret we i foldaon long tebel blong olgeta. Be nao, from we Jisas i stap tijim trutok blong Baebol long olgeta, oli fulap gud long ol kakae long saed blong speret. From samting ya, i olsem we oli go stap kolosap long saed blong Bigfala Ebraham, Jeova God. Hem i glad long olgeta.