-
?Stap Nutrol i Minim Wanem?!Enjoem Laef Olwe!—Baebol Kos
-
-
LESEN 45
?Stap Nutrol i Minim Wanem?
Jisas i talem se ol man blong hem oli “no blong wol ya.” (Jon 15:19) Stap nutrol i min se man i no tekem saed blong politik o blong ol faet. Blong talem stret, i no isi oltaem blong stap nutrol. Mo tu, maet ol man oli jikim yumi. ?Olsem wanem yumi save stap nutrol mo holemstrong long Jehova?
1. ?Ol tru Kristin oli gat wanem tingting long ol gavman?
Ol Kristin oli respektem gavman. Yumi mekem ol samting we Jisas i talem, hemia se “ol samting we oli blong Sisa, [yumi] givimbak long Sisa.” Eksampol, yumi obei long loa blong kantri we i talem se yumi mas pem takis. (Mak 12:17) Baebol i talem se ol gavman oli stap, from we Jehova i letem olgeta oli rul. (Rom 13:1) So yumi kasem save se ol gavman oli no olsem God we i gat ful otoriti blong rul. Yumi lukluk i go long God mo long Kingdom blong hem we i stap long heven blong i stretem ol problem blong ol man.
2. ?Olsem wanem yumi save soemaot se yumi nutrol?
Olsem Jisas, yumi no joen long politik. Taem ol man oli luk wan long ol merikel we Jisas i mekem, oli traem blong putumap hem i king, be hem i no wantem. (Jon 6:15) ?From wanem? Samtaem biaen, hem i talem se, “Kingdom blong mi i no blong wol ya.” (Jon 18:36) Yumi ol disaepol blong Jisas yumi soemaot se yumi stap nutrol long plante defren rod. Eksampol, yumi no joen long ol faet. (Ridim Maeka 4:3.) Yumi respektem ol saen blong kantri, olsem ol flag, be yumi no salut long hem from we hemia i olsem we yumi mekem wosip long hem. (1 Jon 5:21) Mo yumi no sapotem o agensem eni politik pati o kandidet. Long rod ya, yumi soemaot se yumi sapotem fulwan Kingdom o gavman blong God.
DIGIM MOA
Faenemaot ol situesen we oli save mekem se i had blong stap nutrol. Mo luk ol desisen we yu save tekem blong mekem Jehova i glad.
3. Ol tru Kristin oli stap nutrol
Jisas mo ol man blong hem oli soem wan gudfala eksampol long yumi. Ridim Rom 13:1, 5-7 mo 1 Pita 2:13, 14. Biaen, plei VIDEO mo tokbaot ol kwestin ya.
?From wanem yumi mas respektem ol haeman blong gavman?
?Yumi save mekem wanem blong soemaot se yumi obei long olgeta?
Long taem blong wo, sam nesen oli talem se oli nutrol be oli sapotem tugeta saed long faet ya. ?Be stap nutrol i rili minim wanem? Ridim Jon 17:16. Biaen, plei VIDEO mo tokbaot kwestin ya.
?Stap nutrol i minim wanem?
?Olsem wanem sipos gavman i askem yu blong mekem wan samting we i agensem loa blong God? Ridim Ol Wok 5:28, 29. Biaen, plei VIDEO mo tokbaot ol kwestin ya.
?Sipos loa blong gavman i agensem loa blong God, bambae yumi obei long weswan?
?Yu yu tingbaot sam situesen we i save mekem se ol Kristin oli no obei long ol haeman?
4. Stap nutrol long tingting mo aksen
Ridim 1 Jon 5:21. Biaen, plei VIDEO mo tokbaot ol kwestin ya.
Long video ya, ?from wanem Ayenge i no joen long wan politik pati o salut long flag?
?Yu ting se desisen blong hem i waes?
?Wanem sam narafala situesen we i save traem yumi blong stap nutrol? Plei VIDEO, mo tokbaot ol kwestin ya.
?Olsem wanem yumi save stap nutrol taem yumi wajem ol intenasnal spot?
?Olsem wanem yumi save stap nutrol taem ol man blong politik oli tekem wan desisen we i afektem yumi?
?Olsem wanem ol nius we yumi harem mo storian blong ol fren i save afektem yumi?
?Wetaem wan Kristin i save stap nutrol long tingting mo aksen blong hem?
MAET MAN I ASKEM SE: “?From wanem yu no wantem sapotem wan pati?”
?Bambae yu ansa olsem wanem?
SAMARI
Ol Kristin oli traehad blong no tekem saed blong politik long ol toktok, tingting mo aksen blong olgeta.
Tingtingbak
?Yumi mas gat wanem tingting long ol haeman blong gavman?
?From wanem yumi mas stap nutrol oltaem?
?Wanem sam situesen we i save mekem se i had blong stap nutrol?
FAENEMAOT
?Wanem sam sakrefaes we yumi mas mekem blong yumi save stap nutrol?
?Ol famle oli save mekem wanem naoia blong stap nutrol?
?From wanem fasin ya blong faet from kantri i no beswan ona we wan man i save kasem?
Taem yu stap jusum wan wok, tingbaot se yumi “no blong wol ya.”
“Evri Man i Gat Basket Blong Hem Blong Karem” (Wajtaoa, 1 Eprel 2006)
-
-
Yu Yu Naf Blong Stanap Strong!Enjoem Laef Olwe!—Baebol Kos
-
-
I no longtaem, evri Kristin bambae oli fesem fasin agens. ?Olsem wanem? ?Yumi sapraes long samting ya?
1. ?From wanem yumi no sapraes sipos ol man oli agensem yumi?
Baebol i talem se: “Olgeta man we oli wantem soem long laef blong olgeta se oli fasgud long God from we oli joen long Kraes Jisas, bambae ol man oli mekem i nogud long olgeta tu.” (2 Timoti 3:12) Ol man oli mekem i nogud long Jisas, from we hem i no joen long wol ya blong Setan. Mo yumi tu yumi no joen long wol ya, taswe yumi no sapraes taem ol gavman mo ol jos oli stap mekem i nogud long yumi.—Jon 15:18, 19.
2. ?Olsem wanem blong rere bifo we ol man oli agensem yumi?
Yumi mas trastem Jehova moa naoia. Yu mas tekem taem blong prea mo ridim Baebol evri dei mo joen oltaem long ol miting. Ol samting ya oli save halpem yu blong fesem fasin agens, nating se i kam long ol famle blong yu. Plante taem aposol Pol i fesem fasin agens, mo hem i talem se: “Jehova nao i stap halpem mi. Bambae mi no fraet.”—Hibru 13:6.
Yumi save mekem tingting blong yumi i strong taem yumi prij oltaem. Wok blong prij i tijim yumi blong trastem Jehova mo winim fraet we yumi gat long ol man. (Ol Proveb 29:25) Sipos yu gat strong tingting blong prij naoia, bambae yu rere gud blong gohed blong prij nating se gavman i putum tabu long wok blong yumi.—1 Tesalonaeka 2:2.
3. ?Yumi kasem wanem blesing taem yumi stanap strong?
I tru se yumi no glad taem ol man oli mekem i nogud long yumi, be taem yumi stanap strong tru long ol taem ya, bilif blong yumi i kam strong moa. Taem yumi harem se yumi wantem givap be yumi luk se Jehova i halpem yumi blong gohed, hemia i mekem yumi kam klosap moa long Hem. (Ridim Jemes 1:2-4.) Jehova i harem nogud taem yumi safa, be hem i glad taem yumi stanap strong. Baebol i talem se: “God i glad sipos yufala i safa from we yufala i mekem samting we i gud, nao yufala i stanap strong.” (1 Pita 2:20) Pei we Jehova bambae i givim long olgeta we oli stanap strong, hemia laef olwe long wan wol we i nogat man i agensem trufala wosip.—Matiu 24:13.
DIGIM MOA
Makem from wanem i posibol blong stanap strong nating se ol man oli agensem yumi mo luk blesing we i kamaot from.
4. Yu save stanap strong taem ol famle oli agensem yu
Jisas i talem se ol famle oli save agensem desisen blong yumi blong wosipim Jehova. Ridim Matiu 10:34-36, mo tokbaot kwestin ya:
?Ol famle oli save mekem wanem taem wan long olgeta i jusum blong wosipim Jehova?
Blong luk wan eksampol, plei VIDEO, mo tokbaot kwestin ya.
?Bambae yu mekem wanem sipos wan famle o wan fren i traem stopem yu blong wosipim Jehova?
Ridim Ol Sam 27:10 mo Mak 10:29, 30 mo askem sem kwestin we i stap, afta we yu ridim wanwan vas:
?Olsem wanem promes ya i save halpem yu taem ol famle mo fren oli agensem yu?
5. Gohed blong wosipim Jehova nating se ol man oli agensem yu
Yumi nidim strong tingting blong wosipim Jehova taem ol narafala oli traem blokem yumi. Plei VIDEO, mo tokbaot kwestin ya.
?Wanem ol eksampol long video ya we i save mekem se yu gat strong tingting?
Ridim Ol Wok 5:27-29 mo Hibru 10:24, 25 mo askem sem kwestin we i stap, afta we yu ridim wanwan vas:
?From wanem i impoten blong gohed blong wosipim Jehova nating se ol man i putum tabu long wok blong prij o long ol miting?
6. Jehova bambae i halpem yu blong stanap strong
Ol Witnes blong Jehova, nating se oli yangfala, olfala, o oli kamaot long ol defdefren bakgraon, be olgeta evriwan oli gohed blong wosipim Jehova nating se ol narafala oli mekem i nogud long olgeta. Blong save wanem i hapen long olgeta, plei VIDEO. Mo tokbaot kwestin we i stap.
Long video ya, ?wanem i halpem ol Witnes blong stanap strong?
Ridim Rom 8:35, 37-39 mo Filipae 4:13 mo askem sem kwestin we i stap, afta we yu ridim wanwan vas:
?Olsem wanem yu save holemstrong nating se yu fesem ol traem?
Ridim Matiu 5:10-12, mo tokbaot kwestin ya:
?From wanem yu save stap glad nating se ol man oli mekem i nogud long yu?
Plante milian man blong wosipim Jehova oli naf blong stanap strong taem ol narafala oli agensem olgeta. !Yu tu yu save mekem!
SAM MAN OLI SE: “Mi harem se bae mi no naf blong stanap strong taem ol narafala oli agensem mi.”
?Bambae yu soem wanem vas blong givim strong tingting long hem?
SAMARI
Jehova i tinghae long traehad we yumi mekem blong stanap strong nating se ol man oli agensem yumi. !Bambae hem i halpem yumi blong stanap strong!
Tingtingbak
?From wanem ol Kristin oli no mas sapraes taem i gat fasin agens?
?Yu save mekem wanem naoia blong rere bifo we yu fesem fasin agens?
?Wanem i save halpem yu blong holemstrong long Jehova taem yu fesem ol traem?
FAENEMAOT
Wan brata i eksplenem olsem wanem Jehova i halpem hem blong stanap strong long kalabus.
Makem samting we i halpem wan kapol blong mekem wok blong Jehova plante yia nating se i gat fasin agens.
Lanem blong gat strong tingting blong fesem fasin agens.
?Yumi mas gat wanem tingting long ol famle we oli agensem yumi? ?Mo olsem wanem yumi save gat pis wetem olgeta mo gohed holemstrong long Jehova?
“Trutok i ‘No Karem Pis i Kam, Be i Karem Naef Blong Faet’” (Wajtaoa, Oktoba 2017)
-