-
?Kingdom Blong God Hem i Wanem?!Enjoem Laef Olwe!—Baebol Kos
-
-
LESEN 31
?Kingdom Blong God Hem i Wanem?
Men mesej blong Baebol hemia Kingdom blong God. Jehova bambae i yusum Kingdom ya blong mekem stamba tingting blong hem i kamtru long wol. ?Kingdom hem i wanem? ?Olsem wanem yumi save se hem i stat rul finis? ?Wanem samting we hem i mekem finis? ?Mo bambae hem i mekem wanem long fiuja? Bambae yumi faenem ol ansa long lesen ya wetem tufala nekis lesen.
1. ?Wanem ya Kingdom blong God, mo hu i King long hem?
Kingdom hem i wan gavman we Jehova God i stanemap. Kingdom ya i stap long heven, mo Jisas Kraes nao i King long hem. (Matiu 4:17; Jon 18:36) Baebol i talem se, “bambae hem i rul . . . blong olwe.” (Luk 1:32, 33) King Jisas bambae i rulum evri man long wol.
2. ?Hu i rul wetem Jisas?
Jisas i no rul hem wan. Ol man blong “olgeta traeb, mo long olgeta lanwis, mo long olgeta grup blong man, mo long olgeta nesen . . . bambae oli king, oli rul long olgeta man long wol.” (Revelesen 5:9, 10) ?Hamas man bambae oli rul wetem Kraes? Taem Jisas i stap long wol kam kasem naoia, plante milian Kristin oli kam man blong hem. Be 144,000 man nomo oli go long heven blong rul wetem Jisas. (Ridim Revelesen 14:1-4.) Ol narafala Kristin we oli stap long wol oli kam sitisen blong Kingdom ya.—Ol Sam 37:29.
3. ?Olsem wanem Kingdom blong God i gud moa i bitim gavman blong man?
Nating se ol man we oli rul oli wantem mekem ol gudfala samting, be oli no naf blong mekem evri samting. Mo sam narafala maet oli no intres mo kea long nid blong ol sitisen blong olgeta. Be King blong Kingdom, hemia Jisas, bambae hem i rul blong olwe. God “i stanemap wan kingdom we bambae i neva foldaon.” (Daniel 2:44) Jisas bambae i rulum fulwol, mo bambae hem i lavem evri man i no sam man nomo. Hem i gat lav, i kaen, mo i mekem i stret long ol man, mo bambae hem i tijim ol man blong oli gat sem fasin.—Ridim Aesea 11:9.
DIGIM MOA
Faenemaot from wanem Kingdom blong God i gud moa i bitim gavman blong man.
4. Wan gavman we i gat paoa bambae i rulum fulwol
Jisas Kraes i gat moa paoa i bitim eni narafala rula. Ridim Matiu 28:18, mo tokbaot kwestin ya:
?From wanem rul blong Jisas i hae moa i bitim rul blong ol man?
Rul blong ol man i stap jenis oltaem, mo i neva gat wan we i rulum fulwol. ?Be olsem wanem long Kingdom blong God? Ridim Daniel 7:14, mo tokbaot ol kwestin ya:
?From wanem i wan gudfala samting we Kingdom blong God “i neva foldaon”?
?From wanem i wan gudfala samting we Kingdom bambae i rulum fulwol?
5. Rul blong ol man i mas finis
?From wanem Kingdom blong God i mas finisim ol gavman blong man? Plei VIDEO, mo tokbaot ol kwestin ya.
?Wanem i stap hapen aninit long rul blong man?
Ridim Prija 8:9, mo tokbaot ol kwestin ya:
?I stret we Kingdom blong God i finisim rul blong ol man? ?From wanem?
6. Ol rula blong Kingdom oli savegud yumi
From we King blong yumi Jisas i bin laef long wol, hem i “savegud we yumi no gat paoa, nao hem i gat sore long yumi.” (Hibru 4:15) Mo ol 144,000 man mo woman we Jehova i jusumaot olgeta blong oli rul wetem Jisas, oli “kamaot long olgeta traeb, mo long olgeta lanwis, mo long olgeta grup blong man, mo long olgeta nesen.”—Revelesen 5:9.
?Yu yu glad we Jisas wetem ol 144,000 man, oli savegud laef blong yumi? ?From wanem?
Jehova i jusum ol man mo woman long ol defdefren bakgraon blong oli rul wetem Jisas
7. Loa blong Kingdom i gud moa i bitim blong ol man
Ol gavman oli putumap ol loa blong i givhan mo protektem ol sitisen blong olgeta. Kingdom blong God tu i gat ol loa we ol sitisen blong hem oli mas folem. Ridim 1 Korin 6:9-11, mo tokbaot ol kwestin ya:
?Yu ting se wol bambae i olsem wanem sipos evriwan i folem ol rul blong Kingdom?a
?Yu ting se i stret we Jehova i ekspektem ol sitisen blong hem, blong oli respektem ol rul blong Kingdom? ?From wanem?
?Wanem i soemaot se ol man we oli no obei long loa ya, oli save jenis?—Luk vas 11.
Ol gavman oli stanemap ol loa blong protektem mo givhan long ol sitisen blong olgeta. Be Kingdom i gat ol loa we oli gud moa blong protektem mo givhan long ol sitisen blong hem
MAET MAN I ASKEM SE: “?Wanem ya Kingdom blong God?”
?Bambae yu ansa olsem wanem?
SAMARI
Kingdom blong God i wan trufala gavman long heven we bambae i rulum fulwol.
Tingtingbak
?Hu olgeta we bambae oli rul long Kingdom blong God?
?Olsem wanem Kingdom ya i gud moa i bitim rul blong ol man?
?Jehova i ekspektem ol sitisen blong Kingdom, blong oli mekem wanem?
FAENEMAOT
Jisas i tokbaot Kingdom se i stap wea.
“?Kingdom Blong God i Stap Insaed Long Hat Blong Yu?” (Web atikol)
?From wanem ol Witnes blong Jehova oli jusum blong obei long Kingdom blong God, i bitim rul blong man?
Faenemaot samting we Baebol i talem long saed blong ol 144,000 we Jehova i jusumaot olgeta blong rul wetem Jisas.
?Wanem i givhan long wan man we i stap traehad blong winim ol sosol problem, blong i luksave se Kingdom blong God nomo i save winim ol problem ya?
“How I Found the Answer to Injustice” (Wekap!, Novemba 2011)
-
-
?Stap Nutrol i Minim Wanem?!Enjoem Laef Olwe!—Baebol Kos
-
-
LESEN 45
?Stap Nutrol i Minim Wanem?
Jisas i talem se ol man blong hem oli “no blong wol ya.” (Jon 15:19) Stap nutrol i min se man i no tekem saed blong politik o blong ol faet. Blong talem stret, i no isi oltaem blong stap nutrol. Mo tu, maet ol man oli jikim yumi. ?Olsem wanem yumi save stap nutrol mo holemstrong long Jehova?
1. ?Ol tru Kristin oli gat wanem tingting long ol gavman?
Ol Kristin oli respektem gavman. Yumi mekem ol samting we Jisas i talem, hemia se “ol samting we oli blong Sisa, [yumi] givimbak long Sisa.” Eksampol, yumi obei long loa blong kantri we i talem se yumi mas pem takis. (Mak 12:17) Baebol i talem se ol gavman oli stap, from we Jehova i letem olgeta oli rul. (Rom 13:1) So yumi kasem save se ol gavman oli no olsem God we i gat ful otoriti blong rul. Yumi lukluk i go long God mo long Kingdom blong hem we i stap long heven blong i stretem ol problem blong ol man.
2. ?Olsem wanem yumi save soemaot se yumi nutrol?
Olsem Jisas, yumi no joen long politik. Taem ol man oli luk wan long ol merikel we Jisas i mekem, oli traem blong putumap hem i king, be hem i no wantem. (Jon 6:15) ?From wanem? Samtaem biaen, hem i talem se, “Kingdom blong mi i no blong wol ya.” (Jon 18:36) Yumi ol disaepol blong Jisas yumi soemaot se yumi stap nutrol long plante defren rod. Eksampol, yumi no joen long ol faet. (Ridim Maeka 4:3.) Yumi respektem ol saen blong kantri, olsem ol flag, be yumi no salut long hem from we hemia i olsem we yumi mekem wosip long hem. (1 Jon 5:21) Mo yumi no sapotem o agensem eni politik pati o kandidet. Long rod ya, yumi soemaot se yumi sapotem fulwan Kingdom o gavman blong God.
DIGIM MOA
Faenemaot ol situesen we oli save mekem se i had blong stap nutrol. Mo luk ol desisen we yu save tekem blong mekem Jehova i glad.
3. Ol tru Kristin oli stap nutrol
Jisas mo ol man blong hem oli soem wan gudfala eksampol long yumi. Ridim Rom 13:1, 5-7 mo 1 Pita 2:13, 14. Biaen, plei VIDEO mo tokbaot ol kwestin ya.
?From wanem yumi mas respektem ol haeman blong gavman?
?Yumi save mekem wanem blong soemaot se yumi obei long olgeta?
Long taem blong wo, sam nesen oli talem se oli nutrol be oli sapotem tugeta saed long faet ya. ?Be stap nutrol i rili minim wanem? Ridim Jon 17:16. Biaen, plei VIDEO mo tokbaot kwestin ya.
?Stap nutrol i minim wanem?
?Olsem wanem sipos gavman i askem yu blong mekem wan samting we i agensem loa blong God? Ridim Ol Wok 5:28, 29. Biaen, plei VIDEO mo tokbaot ol kwestin ya.
?Sipos loa blong gavman i agensem loa blong God, bambae yumi obei long weswan?
?Yu yu tingbaot sam situesen we i save mekem se ol Kristin oli no obei long ol haeman?
4. Stap nutrol long tingting mo aksen
Ridim 1 Jon 5:21. Biaen, plei VIDEO mo tokbaot ol kwestin ya.
Long video ya, ?from wanem Ayenge i no joen long wan politik pati o salut long flag?
?Yu ting se desisen blong hem i waes?
?Wanem sam narafala situesen we i save traem yumi blong stap nutrol? Plei VIDEO, mo tokbaot ol kwestin ya.
?Olsem wanem yumi save stap nutrol taem yumi wajem ol intenasnal spot?
?Olsem wanem yumi save stap nutrol taem ol man blong politik oli tekem wan desisen we i afektem yumi?
?Olsem wanem ol nius we yumi harem mo storian blong ol fren i save afektem yumi?
?Wetaem wan Kristin i save stap nutrol long tingting mo aksen blong hem?
MAET MAN I ASKEM SE: “?From wanem yu no wantem sapotem wan pati?”
?Bambae yu ansa olsem wanem?
SAMARI
Ol Kristin oli traehad blong no tekem saed blong politik long ol toktok, tingting mo aksen blong olgeta.
Tingtingbak
?Yumi mas gat wanem tingting long ol haeman blong gavman?
?From wanem yumi mas stap nutrol oltaem?
?Wanem sam situesen we i save mekem se i had blong stap nutrol?
FAENEMAOT
?Wanem sam sakrefaes we yumi mas mekem blong yumi save stap nutrol?
?Ol famle oli save mekem wanem naoia blong stap nutrol?
?From wanem fasin ya blong faet from kantri i no beswan ona we wan man i save kasem?
Taem yu stap jusum wan wok, tingbaot se yumi “no blong wol ya.”
“Evri Man i Gat Basket Blong Hem Blong Karem” (Wajtaoa, 1 Eprel 2006)
-